2 Samuel 17 - Qheshwa Biblia DC

Husaí pantachin Ahitofelpa ruwanasninta

¹ Chaymantaqa Ahitofelqa Absalonman nerqa: Saqeway chunka iskayniyoj waranqa runasta ajllanayta, kunan ch'isipacha Davidpa qhepanta llojsinaypaj.

² Pay llauchhu mana kallpayoj kashajtin payman phinkiykusaj, manchariykuchisajtaj, paywan kashajkuna runasnintaj ayqerikaponqanku. Wañuchisaj rey sapallanta.

³ Chaymantataj tukuy aylluta qantawan allinyachisqayki, imaynatachus recién casarakoj warmeqa qosanwan allinyakun ajinata. Qanqa mask'anki uj runaj wañunallanta, tukuynin ayllutaj kusisqas kanqanku.

⁴ Chay yuyaychakusqanqa sumajman rijch'arqa Absalonman, jinataj Israelpa kurajkunasninmampis.

⁵ Absalonqa kamachillarqataj arquita Husaita wajyanankuta, imachus yuyaynimpi kasqanta ninampaj.

⁶ Husaeqa Absalonman chayajtintaj, payqa kay jinata nerqa: Ahitofelqa kay jinata yuyan. Ruwasunmanchu chayta, chayri amachu? Niwayku ari, qan ima ninkitaj.

⁷ Husaitaj kuticherqa: Kay kutipeqa Ahitofelpa yuyaychasqanqa mana walejchu.

⁸ Qan sumajta yachanki tataykiwan chay runasninwan imaqa sinch'i wapus kanku, kunantaj imaynatachus monte china osamanta uñasninta qhechojtinku phiñakun, jinatachari phiñakushanku. Chay jawaqa tataykeqa maqanakuyman yachasqa, runasninwan khuskataj mana uj ch'isitapis puñonqachu.

⁹ Kunampis uj chhanqa jusk'upichari pakakushan, chayri may cheqanejpichus. Chay jawari ñaupaj kutipi runasniykimanta wañurasqankuta uyariytawankama, wakinkunaqa yuyanqanku runasniyki atipachikusqankuta.

¹⁰ Aswan wapu león jina phiña kaj runapis sinch'ita iskayrayanqanku, chaywampis tukuy Israel ayllupi yachanku tataykeqa soldadosnimpis sinch'i wapus kasqankuta.

¹¹ Kunanqa yuyaychaykiman tukuynin israelitas qanwan tantakunankuta Danmantapacha Beerseba llajtakama, chay chhika kanku mar qochaj cantompi t'iyu jinapuni, qan kikiykitaj maqanakupi kamachiwaj.

¹² Jinamanta tataykitaqa maqaj wakiykusunchej maypichá tarikonqa chaypi. Paymantaj urmaykusunchej imaynatachus pampaman chhulla urmaykun jinata, soldadosninta payta ima mana ujniyojta wañuchisunchej.

¹³ Chaywampis mayqen llajtapipis pakakunman chayqa, tukuy israelitas waskhasta apasqayku llajtaj tukuy kaj rumisninta, ujmanta ujmanta chay wayq'okama qharastanaykupaj, chaypi mana uj rumillapis puchunankama.

¹⁴ Absalón tukuy israelitas imaqa yuyarqanku Husaipa nisqanqa aswan allin kasqanta, Ahitofelpamanta nisqaqa. Señorqa nisqaña Ahitofelpa yuyasqanqa mana ruwakunanta, Absalompa patanman llakiyta apachimunampaj.

¹⁵ Chaymantataj Husaeqa sacerdote Sadocman, Abitarman ima willarqa, Ahitofel umachayta qosqanta Absalonman jinataj Israelmanta kurajkunamampis, jinallataj pay kikimpa umachayta qosqantapis.

¹⁶ Jinamanta aswan usqhayta rey Davidman willamunankupaj ama chay ch'in pampaspi puñunanta, manachayqa Jordán mayu chimpamampuni chimpapunanta, ama wañuchinankupaj payta nitaj soldadosnintapis.

¹⁷ Jonatanwan Ahimaaswan, En-rogel chaynejpi kasharqanku, paykunaqa llajta ukhupi mana rikuchikuyta munarqankuchu, uj warmi kamachitaj rispa willamorqa paykunaman, chay ratopachataj paykunaqa rey Davidman willaj rerqanku.

¹⁸ Chaywampis uj ch'iti rikuspa Absalonman rispa willamorqa. Chaymantataj paykunaqa usqhayta rispa chayarqanku Bahurim llajtapi uj runaj wasinman, pakaykukorqankutaj patiompi karqa chay pujyu ukhuman.

¹⁹ Chay wasiyoj warmitaj pujyoj siminta uj mantawan qhataykorqa, chay patampitaj trillasqa trigota churaykorqa. Manataj pipis chaymanta yacharqachu.

²⁰ Absalonta qhatejkuna runas chayaspataj chay warmita taporqanku: Maypitaj kashanku Ahimaaswan Jonatanwanrí?, nispa. Chay warmitaj kuticherqa: Kayninta pasarqanku mayu ladoman, nispa. Chaypacha Absalompa runasnenqa mask'amoj rerqanku, mana tarispataj Jerusalenman kutiporqanku.

²¹ Chay runas ripusqankutawantaj Ahimaaswan Jonatanwanqa pujyumanta llojsiytawankama, usqhayta rispa Davidman willamorqanku; nerqankutaj chay rato jatarikuspa mayuta chimpananta, Ahitofel paykunaj contrankupi chay jinata umachasqanrayku.

²² Chaypacha Davidqa tukuy runasninwan ima usqhayta Jordán mayuta chimparqanku. Q'ayantin paqarimpajtaj mana ujpis qhepakorqachu Jordán mayuta mana chimpaspaqa.

²³ Ahitofeltaj chay yuyasqanman jina mana junt'akusqanta rikuspataj, burronta sinchaykuspa wasinman riporqa, maypichus tiyakoj chay llajtaman. Wasimpi ayllusninwan imachus ruwanasninta junt'aytawankama rispa sipikamorqa. P'ampamorqankutaj tatampa p'ampakunan covachaman.

Davidqa Mahanaimman chayan

²⁴ Davidqa Mahanaiman chayarqa, chaykamataj Absalonqa Jordán mayuta tukuynin israelitaswan chimparqa.

²⁵ Absalonqa churarqa soldadosta kamachejta ismaelita Itraj wawan Amasata, payqa Joabpa cuentanmanta kamachinampaj. Itraqa tantakorqa Nahaspa warmi wawan Abigailwan, paypa hermanantaj Joabpa maman Sarvia karqa.

^26-27 Absalonqa jarakorqa israelitaswan khuska Galaad jallp'api, David maypachachus chayarqa Mahanaimman. Chaypacha payman llojsimorqanku taripaj Nahaspa wawan Sobi, pay karqa Amompi Rabá llajtamanta, chantá Lodebar llajtamanta Amielpa wawan Maquir, chantá Galaadmanta chay Rogelim llajtamanta Barzilaipis.

^28-29 Aparqankutaj camasta, jarrasta, t'uru mankasta, jinataj trigota, cebadata, jak'uta, cebada jank'ata, habasta, lentejasta, misk'ita, ñojñ'uta, waka quesota, oveja quesota ima, David jinataj paywan rejkuna runaspis mikhunankupaj; paykunaqa yuyarqanku ch'in pampamanta chayamuspaqa sayk'usqas, yarqhasqas, ch'akisqastaj chayamusqankuta.