2 Samuel 16 - Qheshwa Biblia DC

Davidqa Sibawan parlan

¹ David uj chhikatawan orqo puntata pasasqantawankama Mefi-bosetpa kamachin Siba llojsimorqa Davidwan tinkoj. Payqa chajnasniyoj iskay burrosta qhatimorqa, chaypitaj iskay pachaj t'antasta aparqa, pachaj chhullchu uvas k'isasta, chay tiempopi poqojkunamanta pachaj chhullchustawan, jinataj uj qara bota vinotawan.

² Reytaj payta taporqa: Imapajtaj kayta apamunki?, nispa. Sibataj kuticherqa: Kay burrosqa reypa wawasnin chaypi rinankupaj, t'antas jinataj poqoykunaspis soldados mikhunankupaj, vinotaj ch'in pampapi sayk'ojkuna ujyanankupaj.

³ Maypitaj kashan uywaqeykej allchhinrí?, nispa rey tapurerqa. Sibataj kuticherqa: Jerusalempi qhepakun; ayqa yuyan israelitasqa jatun tatampa karqa chay reinonta kutichipunankuta, nispa.

⁴ Reytaj kuticherqa: Kunanqa qampataña, Mefi-bosetpata tukuy imasninchus karqa chaykunaqa, nispa. Sibataj reypa ñaupaqempi umanta k'umuykuspa nerqa: Walej kanman qan reyniypa khuyakuynenqa noqallawampuni kanan!

^5-7 Rey Davidqa Bahurim llajtaman chayamojtinkama, Saulpa ayllunmanta kaj uj runa chaymanta llojsimorqa. Payqa karqa Geraj wawan Simei sutiyoj. Maldicispataj risharqa, Davidpa contrampi rumista ch'anqaraspa, jinataj chay yanapajkunasnimpa contrampipis. Reyqa jark'asqa kasharqapis payta qhawajkuna soldadosninnejta jinataj runasnejtapis, Simeitaj maldicisharqa kay jinata: Llojsiy kaymanta, qan runa wañuchi, sajra runa!

⁸ Señor jasut'isunki Saulpa ayllunmanta kajkunata wañurachisqaykimanta, paypa cuentanmanta kamachinaykipaj! Kunantaj Señorqa reinoykita jaywan wawayki Absalonman. Qhaway kunanqa chay ruwasqasniykiman jina llakiypi kanki. Qanqa runa wañuchipuni kanki!

⁹ Chaypacha Sarviaj wawan Abisaeqa reyman nerqa: Imaraykutaj kay alqo wañusqa runaqa qan reyniypa contrampi qhayqakushanrí? Kunampacha umanta noqa qholumusaj!

¹⁰ Reytaj kuticherqa: Kay ruwayqa mana qankunapajchu. Pay jinata nishan chayqa, Señor kamachisqanraykuchari. Jina kajtenqa pitaj parlarinman imaraykuchus chayta ruwasqanmantarí?

¹¹ Chaymantataj Abisaiman jinataj chay yanapajkunasninman kuticherqa kay jinata nispa: Wawallaytaj wañuchiyta munashawajtinri, Benjamimpa ayllunmanta kajqa astawanraj atinman! Saqeychej jinata contraypi parlamojta, Señorchá jinata kamachin!

¹² Ichapis Señorqa uyariwanqa kay llakiyniyta rikuspa, bendicionesninta apachimuwanman chay maldicionespa cuentanmantaqa.

¹³ Davidwan runasninwanqa ñanninkuta ripullarqankupuni, chaykamataj Simeeqa chay orqoj uj lado kinrayninta rerqa maldicispa, rumista ch'anqaraspa, jallp'ata qhallarakuspa ima.

¹⁴ Reyqa paywan risharqanku chay runasninwan imaqa, uj cheqaman may sinch'i sayk'usqas chayaspa chaypi samarikorqanku.

Absalonqa Jerusalenman yaykun

¹⁵ Chaykamataj, Jerusalenman Absalón yaykorqa, israelitaswan jinataj Ahitofelwan ima.

¹⁶ Chaymantataj Davidpa kausaqen Husai arquitaqa rerqa Absalonwan tinkumoj qhaparispa kay jinata: Jatunchasqa kachun reyqa, jatunchasqa kachun reyqa!

¹⁷ Chaypachataj Absalonqa tapurerqa: Ajinatachu amigoykita saqerparinkí? Imaraykutaj mana paywan riporqankichu?

¹⁸ Husaitaj kuticherqa: Mana atiymanchu riyta nispa, noqaqa pitachus Señor ayllarqa reypaj jinataj Israel ayllupis ajllarqa chaywan kanay tiyan.

¹⁹ Qhepantarí, pitachus sirvinay kanman chayqa, kausaqeypa wawallantaj kachun. Ajinamanta noqaqa sirvisaj qan reyniyta imaynatachus tataykita sirverqani ajinata.

²⁰ Aswan qhepaman Absalonqa Ahitofelta taporqa: Imatataj umachawaykuman ruwanaykutari?

²¹ Ahitofeltaj Absalonman kuticherqa: Tatayki saqerqa palaciota qhawanankupaj chay tanta warmisninwan rispa puñuykamuy. Ajinamanta tukuy israelitas tataykiwan phiñanakusqaykita yachanqanku, jinamanta astawan kallpachakonqanku qanman kutisqas kashanku chaykunaqa.

²² Chaypacha wasi patapi uj toldota churaporqanku Absalompaj, chaypitaj tatampa chay tanta warmisninwan puñuykakaporqa tukuy Israel aylloj rikunanta.

²³ Chay tiempopeqa Ahitofelpa umachasqanta jap'ikoyqa, Diospa palabranta jap'ikuywan ninakorqa. Ahitofelqa chay jina uyarisqa karqa Davidpaj jinataj Absalompajpis.