2 Samuel 15 - Qheshwa Biblia DC

Absalonqa Davidpa contrampi oqharikun

¹ Mana unayninmanchu, Absalonqa maqanakupaj nisqa carrota wakichikorqa, caballosta ima, phishqa chunka runastawan wajyakorqa paywan khusqa kanankupaj.

^2-3 Tuta tutamanta jatarikuspa ñan cantoman rej, chay llajta pukunejman, pillapis reyta mask'aj jamojtin ima ch'ajwamantapis justiciata ruwanampaj, chay runataqa wajyaspa tapoj ima llajtamantachus jamusqanta. Sichus chay runa Israelpa ujnin kaj llajtamanta kasqanta nej chayqa, Absalonqa kay jinata nej: Cheqamanta demandaykeqa cheqantaj maychus kajtaj kashan, chaywampis mana pipis reypa churasqan jina cheqanta ruwaj kanchu.

⁴ Nillajtaj: Imaynapichus noqata churawankuman kay jallp'anchejpa kamachejnin kanaypaj. Chaypacha noqaman jamuwankuman tukuy cheqa demandasniyoj kajkuna, noqataj cheqan justiciata ruwayman!, nispa.

⁵ Chay jawari, pillapis napaykurej qhayllaykojtenqa, makinta jaywajpacha, abrazaykoj, much'aykojtaj.

⁶ Chay jinata ruwaj tukuy llajtaman yaykoj israelitaswan, reyta watukoj rejkunawan justiciata mask'aspa, jinamanta tukuy israelitaspa sonqonta suwaj.

⁷ Tawa watas pasasqanmantaña, Absalonqa reyman nerqa: Reyníy, mañarikuyki Hebronman rejta saqenawaykita, Señorman qosaj nisqayta junt'amunaypaj.

⁸ Noqa kamachiyki Siriamanta Gesur llajtapi tiyakushajteyqa, Señorman nerqani, sichus Pay Jerusalenman kutichimuwanman chayqa, noqa Payta yupaychanayta.

⁹ Reytaj kuticherqa: Rillay, allintaj risuchun, nispa. Chayrayku Absalonqa Hebronman riporqa.

¹⁰ Chaypachallataj tukuy Israel ayllusman kachasta kacharqa willachispa, putututa waqajta uyarejtinkukama, willanankupaj Hebrón llajtapi Absalón reypaj ajllasqa kasqanta.

¹¹ Chay jawari Jerusalenmanta iskay pachaj runasta pusakorqa. Paykunaqa allin yuyaywan rerqanku mana yachaspa imachus kashasqanta.

¹² Ajinallataj Absalonqa, Gilo llajtamanta wajyachimorqa Davidpa umachajnin Ahitofelta, Señorman uywa ñak'asqasta jaywashajtin paywan khuska kanampaj. Jinamanta reypa contrampi oqharikoyqa astawan wiñasharqa, Absalonta qhatejkunaqa yapakushallarqankupuni.

Davidqa Jerusalenmanta ayqekun

¹³ Uj runataj Davidman willaj rerqa israelitas Absalonman kutikapushasqankuta.

¹⁴ Chaypacha Davidqa kamacherqa tukuy Jerusalempi kasharqanku chay yanapajkunasninta: Kunampacha ayqenachej, manachayqa Absalonmanta ayqeyta mana atisunchu! Jakuchej usqhayta, pajtataj taripaspa sinch'i llakiyta ruwawasunman, tukuy llajtapi kajkunatataj espadawan wañurachinman!

¹⁵ Paykunataj reyman kuticherqanku: Noqaykoqa wakisqas kashayku imatachus qan reyniyku kamachiwasqaykuta ruwanaykupaj.

¹⁶ Ajinamanta rey llojserqa palacio wasipi tukuy ayllusnin kajwan khuska, chunka tanta warmisnillanta saqerqa palaciota qhawanankupaj.

¹⁷ Reywan chay runasnimpiwan llojsisqankumantaña llajta cantopi kaj wasipiraj qheparikorqanku.

¹⁸ Reypa ladonman tukuy yanapajkunasnin churakorqanku, chanta reyta qhawajkuna soldados cereteosmanta, peleteosmantapis paypa ñaupaqenta pasarqanku, chaymanta sojta pachaj geteo runas pasallarqankutaj, paykunaqa Gat llajtamantapacha reyta qhatimusqanku.

¹⁹ Reytaj Gat llajtamanta kaj Itaita nerqa: Imaraykutaj qampis noqaykuwan jamunkiri?, nispa. Kutipuy chay mosoj reywantaj qhepakamuy, chaywampis qanqa mana kay llajtayojchu kanki, manachayqa llajtaykimanta wijch'usqa kanki.

²⁰ Qaynallaraj qan chayamorqanki. Imaynatataj nisqayki maymampis risqayman noqawan rinaykitari? Kutipullay, kay llajta masisniykitawan pusakapuy. Señorqa munakuyninta rikuchisuchun, qanwampunitaj kachun!

²¹ Itaitaj reyman kuticherqa: Señorpa sutimpi, qampa sutiykipiwan jurani, mayllamampis qan, reyníy, rejtiykeqa, chaypipuni kanqa kamachiykeqa wañunapajpis kausanapajpis.

²² Jina kajtenqa jamuy noqaykuwan, nispa, Davidqa kuticherqa: Ajinamanta Itaeqa Davidwan rerqa, tukuy runasninwan jinataj tukuy ayllusninkuwan khuska.

²³ Tukuyninku chaypi kajkunaqa sinch'i llakiyta waqarqanku. Tukuyninkutaj pasarqanku Cedrón wayq'ota; qhepantataj rey pasallarqataj, tukuy runastaj ñaupaqenta rerqanku ch'in pampaman rej ñanninta.

²⁴ Sadocpis rillarqataj levitaswan khuska, apaspa Dioswan trato ruwasqa cajonta, chaytataj Abiatarpa ladonman saqerqanku tukuy runas llajtamanta llojsinankukama.

²⁵ Reytaj Sadocman nerqa: Watejmanta llajtaman kutichipullaytaj kay Doispa cajonnintaqa. Sichus Señor khuyawanqa chayqa, Pay munanqa kutimunayta rikunaypaj trato cajonninta maypichus kashan chaytawampis.

²⁶ Sichus niwanman Payman mana allin rijch'asqayta chayqa, kaypi kani. Paytaj noqawan ruwachun imachus allin rijch'asqanta.

²⁷ Reyqa sacerdote Sadocman nillarqataj: Qanwan Abiatarwan ima, llajtaman rillaychej iskaynin wawasniykichejpiwan ima, qanqa wawayki Ahimaaswan, Abiatartaj wawan Jonatanwan.

²⁸ Chaykama noqaqa qhepakusaj chay ch'in pampanejpi, qankunaj willaykunasniykichej chayamunawankama.

²⁹ Sadocwan Abiatarwanqa Diospa trato ruwasqan cajonninta Jerusalenman watejmanta apallarqankutaj, chaypitaj qhepakorqanku.

³⁰ Davidqa Olivos orqo wichayta q'ara chakilla, waqaspa, uman qhatasqataj wicharerqa. Tukuy paywan kajkunapis uman qhatasqas waqaspallataj wicharerqanku.

³¹ Davidman willajtinkukamataj, Ahitofelpis Absalonman kutisqa kasqanta, chaypacha Davidqa Señormanta mañarqa Ahitofelpa umachayninta pantachinampaj.

³² Maypichus Diosta yupaychaj kanku chay orqo puntaman David chayajtinñaqa, arquitaspa ayllunmanta kaj Husaeqa chaypi paywan tinkumoj rerqa, p'achasnin llik'isqa, umantaj jallp'awan qhallaykusqa.

³³ Davidtaj nerqa: Sichus qan noqawan jamunki chayqa, mana yanapayta atiwankichu.

³⁴ Sichus Jerusalenman kutiwaj, Absalonmantaj kay jinata niwaj: Reyníy, kay kamachiykeqa qanta sirvisonqa imaynatachus tataykej serviciompi karqa ajinata, chayqa; chaypacha yanapawankiman Ahitofelpa umachasqasninta pantachiyta.

³⁵ Chaypi qanwan kashanqanku sacerdote Sadocwan, Abiatarwan ima. Chayrayku, paykunaman willarinki imastachus palaciopi uyarisqasniykita.

³⁶ Iskaynin wawasninku, Sadocpa wawan Ahimas, jinataj Abiatarpa wawan Jonatampis chayllapitaj kashanku, ajinaqa tukuy yachasqaykichejtaqa paykunanejta willachimuwankichej.

³⁷ Davidpa kausaqen Husaeqa Jerusalenman chayarqa, Absalón chay llajtaman yaykushajtimpuni.