2 Samuel 14 - Qheshwa Biblia DC

Joab kutichimun Absalonta

^1-2 Sarviaj wawan Joabtaj, yacharqa reyqa sinch'itapuni Absalonta watukusqanta, ajinaqa, Tecoa llajtamanta uj sumaj yuyayniyoj ch'aukiyaj warmita pusachimorqa maypichus tiyakorqa chaymanta. Nerqataj: Llakiyniyoj warmiman tukuy, yana p'achatataj churakuy, amataj q'apaj jampiwan jawikunkichu, may unayñapis llakiy p'achawan p'achallisqa kasqaykita rikuchikunki piniyki wañusqanmantapis kanman jina.

³ Chaymantataj reyman rinki, kay imastachus nisqayki chaytataj kikinta nimunki, nispa. Joabtaj yachacherqa imastachus chay warmi, reyman nimunanta.

⁴ Chantataj Tecoamanta warmeqa reypaman rerqa, reypa ñaupaqempitaj k'umuykukorqa pampakama, chaypitaj nerqa: Yanapariway ari, reyníy!, nispa.

⁵ Reyqa taporqa: Imataj qhatirisunkiri?, nispa. Paytaj kuticherqa: Noqaqa warmi sapa kani, qosaytaj wañupunña.

⁶ Kay kamachiykejtaqa iskay qhari wawasnin karqa, paykunaqa campopi maqanakorqanku, mana pipis t'aqaj kajtintaj ujnin kaj chay ujninta maqaspa wañurparicherqa.

⁷ Kunantaj tukuy ayllusniy contraypi oqhariykukunku, munankutaj noqa jaywanayta chay pichus hermanonta wañuchejta, vengakuspa wañuchinankupaj, pay sapallan herenciata jap'inan kasqanrayku. Jinamanta thasnonqanku chay k'ata nina brasayta, qosaytaj mana piniyojta saqenankupaj manaña pi sutinta kay pachapi apanampaj.

⁸ Chaypitaj reyqa chay warmiman kuticherqa: Ripullay wasiykiman, noqa qanta khuyaspa allinniykipaj kamachisaj.

⁹ Chay warmitaj kuticherqa: Reyníy, wiraqochíy, sichus pipis juchachasqa kanqa chayqa, noqa aylluyman ima juchachasqas kasqayku; manataj qan reyniychu nitaj reinoykipischu juchayoj kanqa.

¹⁰ Reytaj kuticherqa: Pichus imanayta munasojtaqa kayman pusamuwanki, manañataj ujtawan imanasonqachu.

¹¹ Chay warmirí nillarqataj: Mañayki qan reyniyta Señor Diosniykirayku ninawaykita, mayqen ayllumpis waway wañusqanmanta vengakuspa, ama astawan llakiyta yapanampaj ujnin kaj wawaytawan wañuchispa. Reytaj nerqa: Señorpa sutimpi jurayki, wawaykej umanmantaqa mana uj chujchallampis urmanqachu!

¹² Chay warmitaj nillarqapuni: Qan, reyníy, saqeriway uj imatawan nirinasuyta. Reytaj nerqa: Parlallay, nispa.

¹³ Chaypacha chay warmeqa tapullarqataj: Imaraykutaj qan reyneyqa kay jinallatataj ruwayta munashanki Diospa ayllumpa contrampiri? Chay nisqaykirayku qan reyllataj juchayoj rikhurinki, pichus wijch'usqa kajta mana kutimunanta saqespa.

¹⁴ Tukuypis wañunanchejpuni kashan, imaynatachus yaku pampaman jich'asqa mana ujtawan oqharikuyta atikunñachu, noqanchejpis jinallataj kanchej. Chaywampis Diosqa mana pimantapis kausayta qhechunchu, mana chayqa imatapis ruwan, pichus wijch'usqa karqa chayqa, amaña karunchasqallapuni kanampaj.

¹⁵ Señorníy, ajinamanta noqaqa jamorqani kayta qanman nisoj runas manchachiwasqankurayku; chayraykumá kay kamachiyki warmeqa parlaj churakusorqa, ichapis reyneyqa chay mañasqayta uyariwanman nispa.

¹⁶ Qan, reyníy, uyariwanki chayqa, jark'ayta atiwasqayku noqatawan wawaytawan pichus chinkachiyta munawasqayku Diospa jallp'anmanta, chaymantaqa.

¹⁷ Kay kamachiyki warmeqa suyashan qan, reyníy, imatachus ninaykita, sonqon tiyaykunampaj. Qan, reyneyqa, yachanki imachus allin, imachus mana allin kasqantapis, Diospa angelnin jina. Señor Dios qan reyniywan qhepakuchun!

¹⁸ Reytaj chay warmiman kuticherqa: Mañayki mana imatapis pakanawaykita, imatachus tapusqayki chaymanta. Warmitaj kuticherqa: Parlallay, reyníy, nispa.

¹⁹ Chaypacha reyqa taporqa: Manachu kay tukuy imastaqa Joab umachaykusunki? Chay warmitaj kuticherqa: Qan reyniyrayku jurayki, chay nisqaykeqa cheqampuni kasqanta. Qampa yanapajniyki Joabpuni kachamuwarqa, payllataj yachachiwarqa kay tukuy imasta qanman nisunayta.

²⁰ Chay tukuyta kamachiyki Joab ruwarqa waj jinamanta, kay imasta yachanaykipaj. Chaywampis, qan reyneyqa, sumaj yachayniyoj kanki, Diospa angelnin jinataj tukuy imaschus jallp'anchejpi kasqanta yachanki.

²¹ Chaypacha reyqa Joabman nerqa: Ñapis imatachus ruwanayta niniña. Riy, kutichimuytaj chay wayna Absalonta.

²² Chaypacha, Joabqa qonqoriykukuspa k'umuykorqa pampakama, respetonta rikuchinanrayku, reyta bendicerqa, nerqataj: Kunan yachani qan, reyníy, khuyawasqaykita, ruwashankitaj kay kamachiyki imatachus ruwayta munasharqa chayta.

²³ Chay ratopacha, Joabqa sayarikuspa, Gesur llajtaman rerqa Absalonta pusamunampaj Jerusalenman.

²⁴ Reytaj kamacherqa, Absalón wasinman cheqanta ripunanta, reypa ñaupaqenman mana chayaspa, chayrayku Absalonqa wasinman riporqa, reypa uyanta mana rikuspa.

²⁵ Tukuynin Israel ayllu ukhupi, mana tarikorqachu ujpis Absalon jina k'achitoqa, sumaj uyarisqa runataj. Chaki puntanmanta uma puntankama mana imampis mana allenqa karqachu.

²⁶ Chujchasnintarí sapa wata tukuypi k'utukoj anchata llasasqanrayku. Chujchasnenqa iskay kilosta jina pesarqa chay reypa wasimpi kaj pesaskunapeqa.

²⁷ Absalompataqa kinsa qhari wawasnin tiyarqa, ujtaj warmi wawan Tamar sutiyoj, paytaj may k'achitapuni karqa.

²⁸ Iskay watasta Absalonqa Jerusalempi karqa reypa uyanta mana rikuspa.

²⁹ Chayrayku Absalonqa wajyaspa Joabta kacharqa, reyta watumunampaj paypa sutimpi, Joabtaj mana munarqachu riyta. Uj kutitawampis Absalonqa nillarqataj reyman rinanta, chay kutipipis Joabqa manallataj rerqachu.

³⁰ Chaypacha Absalonqa kamachisninman nerqa: Qhawaychej, Joabpa jallp'anqa noqaj jallp'asniywan tinkuypi kashan: chaytaj cebada chajrayoj kashan. Riychej chayman, ninatataj jap'iykuchimuychej! Absalompa kamachisnintaj rispa Joabpa cebada chajrasninman ninata jap'iykuchimorqanku.

³¹ Joabtaj chay ratopacha Absalompa wasinman rispa payta taorqa: Imaraykutaj chay kamachi runasniyki chajrasniyman ninata jap'iykuchinkuri?, nispa.

³² Absalontaj kuticherqa: Wajyachimorqayki kayman jamunaykita reypaman kachasunaypaj, nimunaykipaj imapajchus Gesur llajtamanta kutichimuwasqanta, noqamantaqa aswan walej kanman karqa chayllapi qhepakunay. Kunanqa reywan tinkuyta munani, sichus imapi juchayoj kayman chayqa, wañuchiwachun, nispa.

³³ Chaypacha Joabqa reypaman rerqa, Absalompa nisqanta willamorqa, reytaj payta wajyacherqa. Absalontaj reypa ñaupaqenman chayaspa qonqorikorqa k'umuykuspa pampakama. Reytaj Absalonta much'aykorqa.