2 Samuel 13 - Qheshwa Biblia DC

Amnonqa Tamarta p'enqaypi rikhurichin

¹ Davidpa wawan Absalompata uj warmi panan karqa may k'achitapuni, Tamar sutiyoj. Chay qhepamantaj Davidpa ujnin wawan Amnonqa Tamarta sinch'itapuni munakorqa.

² Amnonqa llakikuywan onqoykorqapuni. Panan Tamar manaraj qharita rejserqarajchu, chayrayku mana imatapis ruwanampaj jinachu karqa.

³ Amnompatari tiyarqa uj kausaqen Jonadab sutiyoj, payqa ch'aukiyanapaj wapu runa karqa, chantá payqa Davidpa hermanon Simeaj wawan karqa.

⁴ Uj diataj Jonadabqa taporqa: Reypa wawan, imataj qhatirisunki jinamanta jina astawan tulluyanaykipajrí? Manachu willariwanki?, nispa. Amnontaj kuticherqa: Sinch'ita munakushani wauqey Absalompa panan Tamarta.

⁵ Chaypacha Jonadabqa umacharqa: Yaykuy kamaykiman, onqosqamantaj tukuy. Maypachachus tatayki watukusoj jamojtintaj, ninki khuyaspa kachamunasunta panayki Tamarta, mikhuyta qonasumpaj, chay kikimpi wayk'unampaj, chaypi qan payta rikunaykipaj, jaywasusqantataj mikhunaykipaj.

⁶ Amnontaj camanman yaykuporqa, onqosqamantaj tukorqa. Rey payta watukoj rejtintaj, Amnonqa nerqa: Mañarikuyki ari! Panay Tamar jamuchun, kay kikimpitaj iskay t'antitasta ruwarqochun, pay kikintaj jaywariwachun.

⁷ Chaypacha Davidqa Tamarta wasinman kacharqa, nerqataj: Riy ari, hermanoykej Amnompa wasinman, mikhunampajtaj wakerqochimpuy.

⁸ Jinataj Tamarqa rerqa hermanon Amnompa wasinman, Amnontaj camapi kasharqa. Tamartaj jak'uta oqharispa puñaytawan chay kikimpi t'antasta ruwaspa ninapi chayacherqa.

⁹ Chaymantataj paylata jap'ispa, chay t'antasta jaywamorqa. Amnontaj mikhuyta mana munarqachu, kamacherqataj chaypi tukuy kajkuna llojsinankuta.

¹⁰ Tukuy llojsejtinkukamataj, Amnonqa Tamarman nerqa: Apamuway chay mikhuyta puñunay wasiman, qan kikiykitaj mikhuchiway. Tamartaj chay ruwasqan t'antasta jap'ispa hermanon Amnompa puñunanman aparqa.

¹¹ Mikhuchinampaj Tamar qayllaykojtintaj payqa jap'iykorqa, nerqataj: Jamuy panáy, kaypi noqawan puñusunchej, nispa.

¹² Paytaj kuticherqa: Ama hermanóy, ama honrayta t'akachiwaychu, chay imasqa Israel ayllu ukhupeqa mana ruwakunchu. Ama chay millay ruwaytaqa ruwaychu!

¹³ Maymantaj riyman chay p'enqayniywanri? Qanrí, tukuy Israel ayllu ukhupeqa millay ruwaj runapaj qhawasqa kawaj. Mañayki reyman parlanaykita, payqa mana jark'akonqachu qampa warmiyki kanaytaqa.

¹⁴ Amnontaj mana kasorqachu, Tamarmanta aswan kallpayoj kasqanraykuri, kallpanman atienisqa paywan puñuykorqa.

¹⁵ Chaymantataj Amnonqa sinch'ita chejnikuyta qallarerqa Tamartaqa, munakusqanmanta astawanraj chejnikorqa. Ajinamanta kamacherqa: Jatarispa ripuy, nispa.

^16-17 Tamartaj kuticherqa: Mana, hermanóy, kaymanta wijch'uwasqaykeqa, aswan jucharaj kanman kay sajrata ruwawasqaykimanta nisqaqa! Amnontaj mana kasorqachu, manachayqa ujnin kamachinta wajyaspa kamacherqa: Jawaman wijch'uy kay warmita, chantá sumajta punkuta wisq'aykuy!, nispa.

¹⁸ Chay kamachintaj wasimanta jawaman wijch'orqa, chaymantataj sumajta punkuta wisq'aykorqa. Chaypacha Tamarqa p'achallisqa kasharqa, reypa doncella ususisnimpa churakunanku sumaj p'achawan.

¹⁹ Chaypacha Tamarqa umanman ushphata qhallaykukorqa, chay churakusharqa chay p'achantataj llik'irparerqa, makisninta uman pataman churaykukuspataj sinch'ita waqaspa wasinman riporqa.

²⁰ Chaypacha hermanon Absalonqa taporqa: Hermanoyki Amnonchu chayta ruwasorqa?, nispa. Jina chayqa ama pimampis willaychu panáy, pay hermanoyki kasqanrayku. Ama chaymantaqa chhikata llakikuychu. Tamartaj chay hermanon Absalompapi, may llakisqa qhepakorqa.

²¹ Rey Davidtaj chay tukuymanta yachaspa mayta phiñakorqa; manataj k'amerqachu kuraj wawan kasqanrayku, munakusqanraykutaj.

²² Absalonqa mana imatapis nerqachu Amnontaqa, chaywampis payta sinch'ita chejnikorqa, panan Tamarpa honranta t'akasqanmanta.

Absalón vengakun Amnonwan

²³ Iskay wata qhepamantaj Absalompa runasnenqa ovejasninta ruthusharqanku Efraín llajta qayllapi, Baal-hazorpi, chaymantaj Absalonqa, reypa tukuy wawasninta wajyarerqa mikhuyta jaywarinampaj.

²⁴ Chay jawaqa reyta watukoj rillarqataj, chaypitaj nerqa: Kunanqa runasníy ovejasniyta ruthushanku, munaymantaj qan, chantá yanapaj runasniyki imaqa kay kamachiykita waturinawaykichejta.

²⁵ Rey Davidtaj kuticherqa: Mana wawáy, mana riyta atiykumanchu tukuyniykoqa, ama chhika q'arus kanaykupaj. Chaywampis Absalonqa mañallarqapuni rinanta, reytaj mana riyta munarqachu, jinapis bendicionninta qorqa.

²⁶ Chaypacha Absalonqa nerqa: Qan rinayki mana atikojtenqa, reyníy, kamachiy ari hermanoy Amnonllapis jamuspa watunawaykuta, nispa. Reytaj nerqa: Imaraykutaj Amnón rinanta munankiri?

²⁷ Absalontaj sinch'ita kutin kutinta mañasqanrayku, reyqa saqerqa Amnón chay wakin wawasnin ima paywan rinankuta. Absalontaj uj reypaj jinapuni wakiykuchisqa mikhuykunasta.

²⁸ Absalontaj kamachi runasninta kamachisqa: Sumajta qhawankichej Amnonta, umanta vino muyuchejtinñaqa, noqa nisqaykichej wañuchinaykichejta, qankunataj chaypacha wañuchinkichej. Ama manchachikunkichejchu chayta ruwayta, noqa jinata kamachisusqaykichejrayku. Ajinaqa kallpachakuychej wapuchakuychejtaj.

²⁹ Chayrayku, Absalompa kamachisqanta junt'aspa, chay runasnenqa Amnonta wañucherqanku. Chaypacha reypa tukuy wawasnenqa jatarikuspa mulasninkuman lloq'aykuytawan ayqerqanku.

³⁰ Chay ayqejkuna ñanllapiraj kashajtinkutaj, Davidman willarqanku tukuynin wawasninta Absalón wañuchisqanta, mana uj puchuyojta.

³¹ Chaypacha reyqa jatarikuspa p'achanta llik'ikorqa llakikusqanrayku, pampamantaj siriykorqa. Chaypi paywan kajkuna yanapaj runasnimpis p'achasninkuta llik'illarqankutaj.

³² Chaypacha Davidpa hermanon Simeaj wawan Jonadabqa parlaspa nerqa: Reyníy, ama yuyaychu tukuy wawasniykita wañuchisqankuta, manachayqa Amnonllata wañuchinku, ajinatapuni Absalonqa ruwananta umachakorqa, panan Tamarpa honranta t'akachisqanrayku.

³³ Chayrayku, reyníy, ama creeychu tukuy wawasniyki wañusqankuta. Amnón sapallan wañun.

³⁴ Absalón ayqerikapunankamaqa, qhawasharqa chay soldadoqa qhawarispa rikorqa, ashkha runas jamushasqankuta Horonaim ñanninta, chay orqo kinraynintaña. Chaypacha chay qhawaj soldadoqa reyman willamorqa chay ashkha runas Horonaim ñanninta uraykamushajta rikusqanmanta.

³⁵ Jonadabtaj reyman nerqa: Jamushankuña wawasniykeqa reyníy, noqa kamachiykeqa nisharqaykipuni chaytaqa.

³⁶ Chayta nejtinkamataj reypa wawasnin chayamorqanku, sinch'ita qhaparispataj waqaj churakorqanku. Ajinallatataj reypis chay yanapajkunasnin ima may sinch'ita waqarqanku.

^37-38 Absalontaj ayqespa, Gesurmanta rey Amiudpa wawan Talmaipaman riporqa, kinsa wata junt'atataj chaypi qhepakorqa. Davidtaj sapa día waqarqa Amnón wawanmantaqa.

³⁹ Chay wawan Amnón wañusqanmanta sonqon tiyaykurejtinñaqa, Davidqa sinch'itapuni Absalón wawanta rikuyta munarqa.