2 Samuel 11 - Qheshwa Biblia DC

Davidwan Betsabewan juchallikusqankumanta

¹ Chay qhepan kaj watapi, reykuna maqanakuman llojsinku chay tiempopi, Davidqa kacharqa Joabta, yanapajkunasninta, chantá tukuy israelita soldadostawan khuska, paykunaqa amonitasta maqanakupi atipaykorqanku, Rabá llajtatataj muyuykorqanku. Chaykamataj Davidqa Jerusalempi qhepakorqa.

² Uj tardepirí, Davidqa camapi samakusqanmanta jatarikuspa palacio wasi patasnimpi puriyachashaspa, rikorqa uj may k'achita warmita yakuwan mayllarikushajta.

³ Chaypacha Davidqa, pichus chay warmi kasqanta yachamojta kacharqa, chay yachamojkunataj nerqanku Eliampa wawan, jinataj hitita Uriaspa warmin Betsabé kasqanta.

⁴ Chaypacha Davidqa kachasninta kamacherqa chay warmita pusamunankuta, paywantaj puñuykaporqa, chaymantataj chay warmeqa wasinman riporqa. Chay warmitaj chaypachallaraj yawarnin uraykamuyninmanta llimphuchakushasqa.

⁵ Chay warmitaj wijsallisqa rikhurispa chayta Davidman willacherqa.

⁶ Davidtaj chaypacha kacharqa Joabman willachispa hitita Uriasta kachamunanta, Joabtaj chay nisqanta ruwarqa.

⁷ Uriasqa Davidpaman rerqa, paytaj taporqa, Joab jinataj soldadospis imaynachus kashasqankumanta, maqanaku imaynachus rishasqantapis tapullarqataj.

⁸ Chaymantataj kamacherqa wasinman rispa chakisninta mayllakamunanta. Reypa palacionmanta Urías llojsejtinkamataj, reyqa payman apacherqa uj mikhuyta t'inkata jina.

⁹ Uriastaj wasinman ripunantaqa, chay palacio punkupi qhawaj soldadoswan khuska puñorqa chay ch'iseqa.

¹⁰ Davidman willajtinku Urías wasinman mana ripusqanta, chaypacha Davidqa payta taporqa: Imaraykutaj wasiykiman mana riporqankichu, chay karu ñan puriymanta chayampuytawanrí?, nispa.

¹¹ Uriastaj Davidman kuticherqa: Señorpa trato ruwasqa cajonnin, Israelmanta jinataj Judamanta soldadospis ch'ajramanta ruwasqa ramadas urallapi kashanku, jinallatataj señorniy Joabpis, kamachisniykipis q'ara pampallapi puñushanku. Noqataj riyman kasqa wasiyman mikhoj, ujyaj, warmiywan puñukamojtaj? Qan reyniypa kausayniykirayku mana chaytaqa ruwasajchu!

¹² Davidtaj, Uriasman nerqa; Kunantawan qhepakuyraj, q'ayalla kachapusqayki. Ajinamanta Uriasqa Jerusalempi qhapakorqa q'ayantinkama.

¹³ Davidtaj mikhuyta jinataj ujyanata qorqa, machaykucherqataj. Ch'isiyaykuytañataj Uriasqa llojsiporqa, palaciota qhawaj soldadoswantaj puñumorqa, manataj wasinman rerqachu.

¹⁴ Davidtaj, q'ayantin paqarenqa Joabman uj cartata qelqarqa, chaytataj Uriasllawantaj apacherqa.

¹⁵ Chay cartapitaj kay jinata nerqa: Uriasta ñaupaj kaj sinch'i maqanakuman churaychej, chantá sapantataj saqerpariychej chaypi maqachikuspa wañunampaj.

¹⁶ Ajinaqa, Joabqa maypachachus maqanakunankupaj chay llajtata muyuykojtinkoqa, maypichá yacharqa aswan wapu soldados enemigosmanta kashasqankuta chayman Uriasta churarqa.

¹⁷ Llajtata jark'ajkunamanta soldados uj rato llojsimuytawan, Joabpa contrampi jamuspa maqanakorqanku, chaypitaj wañorqanku wakinkuna Davidpa soldadosninmanta, chaykunawan khuskataj Urías wañullarqataj.

^18-21 Joabtaj Davidman tukuy imaschus maqanakupi pasasqanta willacherqa. Chay kachanmantaj kay jinata yachaykucherqa: Maypachachus reyman maqanakumanta willayta tukojtiykikamataj, ichapis rey phiñakunman, tapusunkimantaj: Imaraykutaj chhikata llajtaman k'askaykorqankichejrí? Manachu yachankichej paykunaqa perqa patamanta tukuy imasta choqamusqankuta? Pitaj Jerobaalpa wawan Abimelecta wañucherqa, manachu uj warmilla perqa patamanta uj kutana rumita choqamuspa, Tebespi payta wañurparicherqarí? Imaraykutaj ari perqaman chhikatapuni k'askaykorqankichejrí?, nispa. Chaypacha qan kutichinki kay jinata: Hitita Urías yanapajniykipis wañullantaj, nispa.

²² Chay kachataj rerqa, Davidman chayaspataj willarqa tukuy imastachus Joab kamacherqa willananta chaykunata.

²³ Chay kachataj Davidman nerqa: Chay soldados llajtamanta llojsimojkuna noqaykuwan waputa maqanakorqanku, chaywampis noqaykoqa llajta punkukama ithiricherqayku.

²⁴ Chaypachataj perqa patamanta runasqa, flechasninkuta kacharimorqanku soldadosniykej contrampi, wañuchispa wakin yanapajkunasniykita, wañullarqataj yanapajniyki Urías hititapis.

²⁵ Davidtaj chay kachaman kuticherqa: Niy Joabman ama chhikata llakikunanta, maqanakupeqa imapis pasampuni. Llajtaj contrampi astawan sinch'ita maqanakuchun atipanankama. Qantaj astawan paytaqa kallpachariy.

²⁶ Uriaspa warmintaj qosan wañupusqanta yachaytawan, llakiy p'achata churakorqa.

²⁷ Chay llakiy pasajtinñari, Davidqa kamacherqa palacionman pusamunankuta, chaypitaj casarakorqa, chanta uj qhari wawata nacechikorqa. Chaywampis Davidpa chay jinata ruwasqanqa, Señorman mana walejchu rijch'arqa.