2 Samuel 1 - Qheshwa Biblia DC

David yachan Saulpa wañusqanmanta

¹ Saúl wañusqanmanta qhepata, Davidqa kuterqa Siclag llajtaman amalecitasta atipaytawan, chaypitaj iskay diasta qheparikorqa.

² Chay minchhantintaj, Saulpa jaranmanta chayamorqa uj runa, llik'isqa p'achayoj umantaj jallp'awan qhallaykusqa, llakiyniyoj kasqanta yachanankupaj. David chayman chayamuspataj umanta pampakama k'umuykucherqa napaykuspa.

³ Davidtaj tapurerqa: Maymantataj jamushankiri?, nispa. Chay runataj kuticherqa: Israelitaspa jarankumanta ayqekamushani, nispa.

⁴ Davidtaj tapullarqataj: Willariway ari! Imataj chaypi karqari? Chay runataj kuticherqa: Israel soldados maqanakumanta ayqekorqanku, ashkhastaj wañurarqanku. Saúl, jinataj wawan Jonatampis wañullarqankutaj!

⁵ Imaynapitaj yachanki, Saulwan wawan Jonatanwan wañusqankuta?, nispataj kuticherqa Davidqa, willayta apamorqa chay runaman.

⁶ Chay runataj kuticherqa: Mana rinallamanta, Gilboa orqoman wicharerqani, chaypitaj rikorqani Saulta lanzan pataman urmaykushajta, chaypachapunitaj enemigosnin carrospi maqanakojkuna jinataj caballospi maqanakojkunapis, payman taripaykusharqankuña.

⁷ Chay kikin ratopunitaj wasaman qhawarimorqa, rikumuwaspataj wajyamuwarqa. Noqataj kasorqani.

⁸ Chaymanta tapuwarqa pichus kasqayta, noqataj nerqani uj amalecita runa kasqayta.

⁹ Chaymantarí mañawarqa payman qayllaykuspa ujtakama wañurparichinayta, ñak'ariypi kaspa manataj wañuyta atisqanrayku.

¹⁰ Ajinaqa payman qayllaykorqani wañurparicherqanitaj, manaña kausanampaj jinachu kasqanrayku chay urmasqanmanta qhepamanqa. Chaymantataj pillunta orqhorparerqani umanmanta, makinmantataj brazaletenta, qanmantaj apamorqayki wiraqochíy.

¹¹ Chaypacha, Davidwan runasnimpiwan ima, p'achasninkuta llik'erqanku llakikusqankurayku.

¹² Jinaspataj waqarqanku, llakikorqankutaj, Saulwan wawan Jonatanwan wañusqankumanta, ajinallatataj Señorpa soldadosnin israelitas maqanakupi atipaykuchikusqankumanta, inti yaykuykamataj ayunarqanku.

¹³ Chaymantataj Davidqa chay willayta apamorqa chay runaman taporqa: Qan maymantataj kankirí? nispa. Paytaj kuticherqa: Mana kay llajtayojchu kani, manachayqa amalecita kani, nispa.

¹⁴ Davidtaj sinch'iwan chay runaman nerqa: Imaraykutaj mana manchachikorqankichu Señorpa ajllasqampa contrampi makiykita oqhariytarí? nispa.

^15-16 Ujnin kamachinta wajyaspataj Davidqa nerqa: Riy, wañuchimuytaj!, nispa. Paytaj, sinch'ita t'ojsispa wañurparicherqa chay amalecitataqa. Davidtaj nerqa: Qan kikiyki juchayoj kanki wañunaykipaj, qanllataj simiykiwan ch'ataykukunki Señorpa ajllasqan reyta wañuchisqaykita willaspa.

Llakiy waqaykunas Saulwan Jonatanwan wañusqankumanta

¹⁷ Davidta takerqa kay llakiy takiyta, Saulwan wawan Jonatanwan wañupusqankumanta.

¹⁸ Kamacherqataj tukuy Judá ayllu ukhupi kay takiyta yachachinankuta. Kay llakiy takeyqa qelqasqa kashan Justojta nisqa librompi:

¹⁹ Israel ayllúy! May uyarisqa kasqaykeqa chay orqosniykipi chinkachisqa karqa! Imaynatataj chay wapu runas urmarqanku!

²⁰ Ama willaychejchu Gat llajtapi, nillataj willaraychejchu Ascalón llajtapipis, ama chay filistea warmis kusikunankupaj, Diosta mana rejsejkuna warmis kusiywan ama phinkiykachanankupaj.

²¹ Gilboa orqokuna, amaña qankuna patamanqa parachunchu nitaj chhullachunchu, amañataj qankunapi imapis poqochunchu! Chaypi wapu runaspa jark'anasninku sarusqas karqanku. Chaypi, Saulpa jark'akunampa lliphipiynin chinkaporqa.

²² Ni jayk'aj Saulwan Jonatanwanqa kutipojchu kanku espadankuta nitaj wach'inasninkutapis chay wapu maqanakojkunaspa yawarninman chayri wirasninkumampis mana chhapuspaqa.

²³ Saulwan Jonatanwanqa, munasqas, k'achastaj mana t'aqanakorqankuchu kausayninkupi, nitaj wañupushaspapis. Aguilasmanta aswan usqhayta phawarejkuna karqanku! Leonesmantapis aswan kallpasniyoj karqanku!

²⁴ Israelpa ususisnin Saulmanta waqaychej. Payqa puka fino linomanta p'achallichisoj kasunkichej, ima k'achata p'achasniykichejta qoriwan k'achanchasorqachej!

²⁵ Imaynatataj chay wapu runas maqanakupi urmarqanku! Jonatanqa chay orqosniyki patapi wañorqa!

²⁶ Jonatán, qanmanta sinch'i llakisqapuni kashani, munasqa wauqéy! May misk'i munakuywan parlapayaykuwaj kanki! Qampa munakuyniykeqa, warmispa munakuyninmantapis aswan misk'i noqapajqa karqa.

²⁷ Imaynatataj chay wapu runasqa urmarqanku! Armasninkupis phirisqas karqanku!