2 Reyes 9 - Qheshwa Biblia DC

Eliseoqa Jehuta jawiykun Israelpi kamachejpaj

¹ Profetasmanta ujnin kajta, Eliseoqa wajyaspa nerqa: P'achasniykita wakichikuy, kay aceite yuru aparisqa Ramot Galaadman riy, nispa.

² Jaqayman chayaspataj, Nimsej allchhinta, Josafatpa wawan Jehuta rikunki, payta kausaqesnimpa chaupinmanta wajyarispa waj wasiman pusaykunki.

³ Chay yurupi aceitewantaj, paypa umanman jich'aykunki, ninkitaj: Señorqa ajinata nisunki, Israelpi kamachej kanaykipaj noqa churayki. Wasi punkuta kichariytawantaj chay rato ayqekamunki mana sayarispa.

⁴ Chay wayna profetaqa Galaadpi Ramotman rerqa.

⁵ Chayaytawantaj soldadospa kurajkunasninta tiyarashajta tariparqa, nerqataj: Wiraqochíy, uj palabrata nisunay tiyan. Jehutaj nerqa: Tukuyniykumanta mayqen kajta? Paytaj nerqa: Qanta wiraqochíy.

⁶ Jehutaj sayarispa wasiman yaykorqa. Profetataj Jehoj umanman aceitewan jawiykorqa, nerqataj: Israelpa Señor Diosnenqa kay jinata nin: Kunanqa noqa jawiykuyki Israel llajtapi kamachej kanaykipaj.

⁷ Wiraqochiykej Acabpa ayllunmanta kajkunata tukuchinki, Jezabel warmi profetasniyta, kamachisniytawan wañuchisqanmanta vengakunaypaj.

⁸ Acabpa wasimpi kajkuna qharista, kamachista, mana kamachistawan, tukuyninkuta Israelpi chinkachisaj.

⁹ Imaynatachus Nabatpa wawan Jeroboampa mirayninta ruwarqani, ajinata, Ahiaspa wawan Baasaj miraynintapis, kikinta Acabpa mirayninta ruwasaj.

¹⁰ Jezabeltataj Jezreel pampapi alqos mikhuranqa, manataj pipis paytaqa p'ampajqa kanqachu. Chayta niytawan wasi punkuta kicharpayaytawan ayqeamporqa.

¹¹ Chanta Jehoqa wiraqochimpa kamachisnimpaman llojsimojtin, paykuna nerqanku: Imataj tiyanri? Imamantaj chay t'ojpisqa jamusqari?, nispa. Paytaj nerqa; Qankunaqa yachallankichejña pichus chay runaj parlasqantapis.

¹² Paykunataj kuticherqanku: Llullakushanki, allinta willawayku. Jehutaj kuticherqa: Kay jinata nispa payqa willawan: Señorqa kay jinata nin: Israelpi kamachej kanaykipaj noqa jawiykuyki, nispa.

¹³ Chanta paykunaqa usqhayllata p'achasninkuta orqhokuspa, sarunas pataman mast'aykukuytawan, chay pataman Jehuta tiyaykucherqanku, putututa waqachispataj nerqanku: Kunanqa Jehu kamachejqa, nispa.

Jehoqa Joramta wañuchin

¹⁴ Nimsej allchhin Josafatpa wawan Jehoqa, Jorampa contrampi oqharikorqa. Joramtaj tukuynin israelitaswan Galaadpi Ramot llajtata waqaychasharqanku, Siriamanta rey Hazael paypa contrampi maqanakoj llojsimusqanrayku.

¹⁵ Joramqa Jezreelman kutipusqa, Siriamanta rey Hazaelpa contrampi maqanakoj risqampi nanarpachisqanku chaymanta jampikunampaj. Jehutaj nerqa: Qankunaj munayniykichej chayqa, kay llajtamanta ama pipis ayqespa Jezreelman willamuchunchu.

¹⁶ Chaymanta Jehoqa caballompi lloq'aykuytawan Jezreelman kachaykukorqa. Joramqa chaypi onqosqa kasharqa. Judamanta rey Ocoziaspis Joramta watukoj uraykamusqa.

¹⁷ Jezreel llajtapi torre patamanta qhawajtaj rikorqa Jehoj soldadosnin jamojta, nerqataj: Ashkha soldadosta jamushajta rikuni, nispa. Joramtaj nerqa: Uj soldadota caballopi kachay, pichus kasqanta rejsimuchun, allin sonqowanchus jamushasqantapis, nispa.

¹⁸ Uj soldadoqa caballopi rejsimoj rerqa, nispa: Reyqa kay jinata nin: Tukuy imapis allillanchu?, nispa. Jehutaj nerqa: Allimpis imapis kachun ima dakusunkiri? Noqawan khuska kutiriy, nispa. Chantataj torre patamanta qhawajqa reyman willacherqa: Kachasqanchejqa taripanankama chayan, manataj kutimunchu, nispa.

¹⁹ Ujtañataj caballopi kacharqa, paytaj taripaytawan nerqa: Tukuy imapis allillanchu? Jehutaj payman nerqa: Allimpis imapis kachun ima dakusunkiri, noqawan khuska kutiriy, nispa.

²⁰ Torre patamanta llajtata qhawajqa reyman willachillarqataj: Paypis chayallantaj, manataj kutimunchu, chay carretata aysajqa Nimsej allchhin Jehuman rijch'akun, imaraykuchus usqhaytapuni jamun.

²¹ Chanta Joramqa nerqa: Carretayta caballosman wataykuychej, nispa. Carretan ñapis wataykusqaña kajtin Israelmanta rey Joram, Judamanta rey Ocoziaswan llojserqanku Jehuta taripaj sapa ujninku carretasninkupi. Paytataj Jezreelpi Nabotpi huertampi tariparqanku.

²² Joramtaj Jehuta rikuytawan nerqa: Tukuy ima allillanchu?, nispa. Paytaj kuticherqa: Imatá imapis allin kanmanri, Jezabel mamaykej tukuy qhenchachakusqasninwanri, chay chhika layqeriosninwan imari?

²³ Chanta Joramqa carretanta muyurichiytawan ayqekorqa, Ocoziásmantaj nerqa: Kayqa wasanchay, Ocozías!, nispa.

²⁴ Chanta Jehoqa flechanta orqhokuytawan payman kachaykorqa, chaytaj Jorampa wasanman yaykuspa sonqonnejta llojserqa, kikin carretampitaj wijch'ukorqa.

²⁵ Jehutaj kamachin Bidcarman nerqa: Oqharispa wijch'umuy, Jezreelpi Nabotpa jallp'an chaynejman. Yuyarinkichu, qanwan noqawan tatan Acabpa runasninwan khuska rishajtinchej, Señorqa kaymanta sut'inchawasqanchejta:

²⁶ Imaynatachus qayna noqa Nabotpa yawarninta rikorqani, wawasnimpa yawarnintapis. Señorqa nerqa: Kay kikin cheqallapitaj qanmanta vengakusqayki, nispa. Kunantaj jap'ispa Nabotpa jallp'annejman aysarpariy, Señorpa nisqanman jina junt'akunampaj.

Jehú Ocoziasta wañuchin

²⁷ Judamanta reytaj paypis kay jinata rikuspa ayqekorqa huerta ñanta. Jehutaj qhatiykorqa, nispa: Paytapis wañuchiychej. Carretampi wañucherqanku Gurman llojsina chaynejpi Iblean qayllapi. Ocoziastaj Meguidoman ayqekorqa, chaypitaj wañuporqa.

²⁸ Kamachisnintaj carretampi Jerusalenman apakaporqanku, jaqaypitaj tatasnimpi covachampi Davidpa llajtampi p'amparqanku.

²⁹ Acabpa wawan Joram chunka ujniyoj watataña kamachishajtin Ocoziasqa Judapi kamachiyta qallarerqa.

Jezabelpa wañupusqan

³⁰ Chanta Jehoqa Jezreelman jamporqa. Jezabeltaj chayta yachaytawan, ñawisninta pintaykukorqa, chujchasnintapis simp'aykukorqa. Ventanamantataj payta qhawaj chimpaykorqa.

³¹ Jehú llajta punkunejtaña yaykumushajtintaj, payqa nerqa: Wiraqochinta wañuchej, Zimri, imaynataj kashankiri?, nispa.

³² Jehoqa ventananejta qhawarispa nerqa: Pistaj noqawan kashankichejri? Pitajri?, nispa. Chantataj kamachejkunamanta iskaychus kinsachus payta qhawamorqanku.

³³ Paytaj nerqa: Uraman chay warmita wijch'uykamuychej. Paykunataj uraman wijch'uykamorqanku. Wakin yawarnenqa perqaman ch'allparqa, caballosmanwan. Jehutaj carretanwan saruykucherqa.

³⁴ Chanta yaykuytawan mikhuykuspa, ujyaykuspataj nerqa: Kunanqa riychej qhawarimuychej chay sajra warmita, reypa wawan kasqanraykutaj p'ampaykuychej.

³⁵ P'ampamoj rispataj Jezabelpataqa uma tullullanta, chakisninta, makisnintawan tarerqanku.

³⁶ Kutimuspataj Jehuman willarqanku. Paytaj nerqa: Kayqa Señorpa palabran junt'akushan, tisbita Eliaspa sut'inchasqanman jina. Payqa nerqa: Jezreel jallp'api Jezabelpa ayanta alqos mikhuranqa, nispa.

³⁷ Jezabelpa ayantaj Jezreel jallp'api wanu jina jich'aykachakonqa. Ajinamanta ni pipis niyta atenqachu, kayqa Jezabelqa nispa.