2 Reyes 7 - Qheshwa Biblia DC

¹ Chanta Eliseoqa nerqa: Señorpa palabranta uyariychej: Ajinata Señorqa nin: Q'aya p'unchay kay horasta Samaria llajta punkupi uj arroba jak'u uj qolqepi, iskay arroba cebadapis, uj qolqepi vendekonqa.

² Reypa yanapajnintaj Diospa runanman nerqa: Sichus Señorqa janaj pacha ventanasta kicharinman chayqa, qampa nisqaykiman jinachu kanman? Paytaj nerqa: Kayqa kunan qan ñawisniykiwan rikunki. Chaywampis chaymantaqa mana qanqa mikhunkichu.

³ Samaria llajtaj punkumpitaj tawa runas lepra onqoyniyoj karqanku. Chaykunataj paykuna ukhu ninakorqanku: Imapajtaj noqanchej kaypi kashanchej wañunanchejkamari?

⁴ Sichus llajta ukhuman yaykusunman chayqa, yarqhaymanta wañusunchej, kay kikimpi qhepakusun chaypis wañullasuntaj. Jaku rinachej siriospa jarankuman. Sichus paykuna kausayta qowasun chayqa kausasunchej, wañuchiwasun chaypis wañupusunchej.

⁵ Ch'isiyajtinkamataj siriospa jarankuman rerqanku. Siriospa jarankuman chayanankupajtaj, mana pipis chaypichu karqa.

⁶ Imaraykuchus siriospa jarankupi Señorqa uyarichisqa ashkha soldadospa purisqanta jina, ashkha caballosta, carretasta ima, chayrayku paykunaqa yuyarqanku: Kaytaqa israelitaschá kachaykamushawanchej hititasta, Egiptomanta reyestawan paykunaman pagaykuspa noqanchejpa contranchejpi jamunankupaj.

⁷ Tuta yaykamojtinkama paykunaqa ayqekusqanku, saqerpayaspa toldosninkuta, caballosninkuta, burrosninkuta, jarankutataj imaynachus kasharqa kikinta saqerpayaspa, kausayninkuta ayqechinankupaj.

⁸ Leprososqa jaraman chayaytawan uj toldoman yaykuspa mikhorqanku, ujyarqankutaj. Chaymantataj qolqesta, qorista, p'achastawan apamuspa pakaykamorqanku. Kutimuytawantaj uj toldomanñataj yaykuspa jinallatataj tukuy imasta orqhospa pakaykamorqanku.

⁹ Chanta paykuna ukhu ninakorqanku: Manasina allintachu ruwashanchej. Kunan p'unchay sumaj kashan kayta willanapaj, noqanchejtaj ch'inlla kashanchej. Sichus sut'iyamunankama suyasun chayqa, noqanchej juchayoj rikhurisunchej. Kunanqa jaku ari, reypaman willamusunchej.

¹⁰ Paykunataj jamuytawan, llajta punkupi qhawajkunata wajyaspa willarqanku: Noqaykoqa siriospa jarankuman rerqayku, chaypirí mana pipis kasqachu, nipuni runaj parlasqallampis uyarikunchu, pachampi caballoslla, burrosninkupiwan watasqas kashanku, jarasninkupis imaynachus karqa, jinapacha saqerpayasqa kashan.

¹¹ Punkuta qhawajkunataj chayta uyariytawan qhaparispa reypa palaciompi willarqanku.

¹² Reytaj tutapacha jatarispa, kamachisninman nerqa: Noqaqa nisqaykichej, imatachus chay siriosqa noqanchejta ruwayta munasqankuta. Paykunaqa yachanku noqanchej yarqhaypi kasqanchejta. Toldosninkumanta llojsispa chayllamanchá pakaykakamunku kay jinata nispa: Paykuna llajtamanta llojsimojtinku, kausashajllata jap'irasunchej, chantataj llajtaman yaykusunchej, nispa.

¹³ Chanta ujnin kamachintaj nerqa: Kay kapuwanchejraj chay phishqa caballospi kachana qhawarimojta, imaraykuchus chaykunaqa yarqhaywan wañunankupuni kashan, wakinkuna Israelpi wañunkuña jinata. Chayta yachaspari yachasunchej imaschus kasqanta.

¹⁴ Iskay carretasta caballosnintinta siriospa jaranta qhawamunankupaj reyqa kacharqa, kay jinata nispa: Rispa qhawarqamuychej.

¹⁵ Paykunataj lastreaspa Jordán mayukama rerqanku; tukuy ñampitaj rikorqanku p'acha t'akasqankuta, waj imastawan sirios usqhayta ayqekunankurayku. Kachasqastaj kutimuytawan chay tukuyta reyman willarqanku.

¹⁶ Chantá runasqa llajtamanta llojsimuytawanqa, siriospa jaranman rispa tukuy imasta apakamorqanku. Uj arroba jak'u uj qolqepi vendekorqa, iskay arroba cebada uj qolqellapitaj vendekorqa Señorpa nisqanman jina.

¹⁷ Reytaj paypa yanapayninta llajta punkuta qhawanampaj churarqa; runastaj paytaqa chay chhikata ñaqekusqankupi sarurparispa punku yaykuypi wañurparichisqanku, chaytaqa Diospa runan sut'inchasqa, maypachachus rey payta watukoj rerqa chaypacha.

¹⁸ Imaynatachus Diospa runan reyman sut'inchasqanman jina, Samaria llajtaj punkumpi q'aya kay horasta uj arroba trigo jak'u uj qolqellapitaj vendekonqa, iskay arroba cebada uj qolqepi vendekonqa.

¹⁹ Achay jinata Eliseoj nisqanmantaj reypa yanapajnenqa kuticherqa: Sichus Señorqa janaj pachapi ventanasta kicharinman chayqa, ajinachá kanman, nispa. Eliseotaj nerqa: Kaytaqa kunan qan ñawisniykiwan rikunki. Chaywampis chaytaqa mana mikhunkichu.

²⁰ Jinapunitaj chayqa karqa: Llajtamanta runasqa ñaqenakuspa paytaqa pachan punkupi ñit'irparerqanku, jinapitaj wañuporqa.