2 Reyes 6 - Qheshwa Biblia DC

Eliseo yaku patapi hachata tuytuchin

¹ Uj kuti profetasqa Eliseoman nerqanku: Kaynejpi qanwan tiyakushanchej chayqa ancha k'ullkuña.

² Jordán chaynejman rinachej, chaypitaj sapa ujninchej k'aspista ruwaspa chaypi tiyakunanchejpaj ruwakamusunchej. Eliseotaj nerqa: Rillaychej, nispa.

³ Ujnin kajtaj payta nerqa: Qampis kay kamachisniykiwan riy ari. Paytaj kuticherqa: Cosapacha, risunchej ari, nispa.

⁴ Paykunaqa Jordanman rispa sach'asta k'utuyta qallarerqanku.

⁵ Ujnintaj sach'a urmachiyta qallarishajtin hachan yakuman urmaykorqa. Qhaparikorqataj: Wiraqochíy, chay hachaqa mañarisqalla karqa, nispa.

⁶ Diospa runantaj tapurerqa: Maymantaj urmaykunri?, nispa. Paytaj rikucherqa maymanchus urmaykusqanta. Chanta Eliseoqa uj k'aspita k'utuqaytawan, chaynejman choqaykorqa, hachataj yaku pataman tuytorqamorqa.

⁷ Eliseotaj nerqa: Oqharikapuy. Paytaj makinta aysarispa orqhokaporqa.

Eliseowan Sirioswan

⁸ Siriamanta reyqa Israelwan maqanakupi kasharqanku. Soldadospa kurajkunasninwantaj kay jinata parlarqa: Jaqaynejpi kaynejpi soldadosta churasunchej, nispa.

⁹ Diospa runantaj Israelpa reyninman willachimorqa: Jaqaynejta ama pasankichu, imaraykuchus chaynejman siriospa soldadosnin rishanku.

¹⁰ Chantaqa Israelmanta reyqa, imaynatachus Diospa runan nisqanman jina, chayman soldadosninta mana kacharqachu. Ajinamanta ashkha kutita librakorqa.

¹¹ Chayrayku Siriamanta reyqa mayta t'ukuykacharqa; kamachisninta wajyaspataj nerqa: Kunan willawaychej, pitaj noqanchej ukhumanta Israelmanta reypa willajnin kankichej?

¹² Chanta ujnin kaj kay jinata willarqa: Mana wiraqochi reyníy, pipis kanchu kaymanta willamojqa. Eliseo profeta Israelpi kashan, pay ari sut'inchan Israel reyman, qampa tukuy imasta pakaypi parlasqaykita.

¹³ Chanta Siriamanta reyqa nerqa: Rispa sumajta qhawamuychej maypichus kashasqanta, chanta noqa kachaspa jap'ichimunaypaj. Reymantaj nerqanku: Eliseoqa Dotampi kashan, nispa.

¹⁴ Chantataj reyqa jaqayman kacharqa, caballospi soldadosta, carretasta, chakipi rej ashkha soldadostawan. Paykuntataj tuta jamuspa Dotán llajtata muyuykorqanku.

¹⁵ Diospa runampa kamachintaj tutamanta jatarikuspa, llojsimuspataj rikorqa ashkha soldadosta llajtaj muyuynimpi, caballoswan, carretaswan ima kashajta. Chanta chay Eliseoj kamachenqa payman nerqa: Ay! Wiraqochíy, imanasuntajri?, nispa.

¹⁶ Eliseotaj nerqa ama mancharikuychu, imaraykuchus noqanchejwan aswan ashkha kanku, paykunamanta nisqaqa.

¹⁷ Eliseotaj chantaqa Señormanta mañakorqa: Señor kunanqa mañakuyki, kay kamachiypa ñawisninta kicharinaykita. Chanta Señorqa chay kamachimpa ñawisninta kicharerqa. Payqa qhawarispa chay tukuynin orqosnejpi soldados junt'a kashajta rikorqa caballospi, nina carretaswan ima Eliseoj muyuynimpi.

¹⁸ Chaymantataj siriosqa Eliseota jap'inankupaj uraykamorqanku. Eliseotaj Señormanta mañakorqa: Mañakuyki kay runaspa ñawisninta chharpuyachinaykita, nispa. Paykunatataj Señorqa ñawisninta chharpuyaracherqa Eliseoj mañakusqanman jina.

¹⁹ Chantataj Eliseoqa chay soldadosman nerqa: Mana kaychu chay ñanqa, nitaj kaychu chay llajtapis, noqata qhatiwaychej, chay runata mask'ashankichej chaykama pusasqaykichej, nispa. Chanta Samaria llajtamantaj pusaykorqa.

²⁰ Samaria llajtaman chayaspataj, Eliseoqa nerqa: Señor kay runaspa ñawisninta qhawarichiy, nispa. Qhawariytawantaj Samaria llajta ukhupi rikhurerqanku.

²¹ Israelpa reynintaj chay soldadosta rikuytawan Eliseoman nerqa: Tatáy, kay runasta wañuchisajchu?, nispa.

²² Eliseotaj kuticherqa: Ama wañuchiychu. Qanqa espadaykiwan, flechaykiwan ima presosta jap'iraspa wañuchiytachu yachanki? Chayrayku kunanqa paykunaman t'antata, yakutawan mikhunankupaj qoy; chantataj wiraqochisninkuman kachapuy.

²³ Chaymantataj uj jatun mikhunata wayk'ucherqanku, jinaspataj mikhuykojtinku, ujyaykojtinku ima llajtankuman kachaporqanku. Paykunataj reyninkuman kutiporqanku. Chaymantataj manaña ujtawampis Israelpa contrampi jamojchu kanku Siriamanta soldadosqa.

Samariapi manchay yarqhay

²⁴ Chay imasmanta qhepata Siriamanta rey Ben-adadqa tukuynin soldadosninta tantaykuspa, wicharimuytawan Samaria llajtata muyuykucherqa.

²⁵ Chay jinata muyuykojtinku Samaria llajta ukhupi manchay yarqhay karqa. Jinamanta burro umatapis pusaj chunka qolqewan ranterqanku, paloma wanumanta khuskan kaj librata phishqa qolqeswan rantej kanku.

²⁶ Israelmanta rey perqa patanta pasarqoshajtin uj warmi qhaparikorqa, nerqataj: Wiraqochi reyníy, salvaway ari, nispa.

²⁷ Chanta paytaj nerqa: Sichus Señor mana salvasunkichu chayqa, maymantataj noqa qanta salvaykimanri? Trigota, chayri vinotapis qoyta atiykimanchu?

²⁸ Reytaj ujtawan nillarqataj: Imataj qhatirisunkiri? Chay warmitaj kuticherqa: Kay warmeqa niwarqa apamuy wawaykita mikhunanchejpaj, q'ayataj noqajtañataj chanta mikhusunchej, nispa.

²⁹ Noqaj wawayta wayk'uspa mikhuykuykuña. Q'ayantintaj nerqani, wawaykita apamuy mikhunanchejpaj, nispa. Kunantajrí payqa wawanta pakaykamun.

³⁰ Reytaj chay warmej palabrasninta uyarispa, p'achasninta llik'ikuspa perqa patanejta pasarqa. Runastaj rikorqanku reyqa ukhumpi qhashqa p'achayoj kasqanta.

³¹ Chanta reyqa nerqa: Sichus kunan p'unchaypacha Safatpa wawan Eliseota mana umanta qholusajchu chayqa, Señor jasut'iwachun, nispa.

³² Eliseoqa wasimpi kurajkunaswan khuska tiyakusharqa. Reytaj payman kachamorqa uj kacha runata. Manaraj chay kacha runa chayamushajtintaj, Eliseoqa kurajkunasman nerqa: Rikunkichejchu imaynatachus chay runa wañuchej wawanqa, umayta qholuchinawampaj kachamushawasqanta? Kunanqa, chay kacha runa chayamojtinkama punkuta sumajta wisq'aykunkichej, amataj yaykumojta saqenkichejchu. Chayqa paypa qhepampi wiraqochimpa purisqan uyarikamunña, nispa.

³³ Ajinata paykunawan parlashajtillanraj, chay kacha runaqa chayamorqapacha paypaman, nerqataj: Cheqamantapuni kay tukuy sajraqa Señormanta jamun. Imapajña astawan Señorpi suyasajri?, nispa.