2 Reyes 5 - Qheshwa Biblia DC

Naamán lepra onqoymanta thañin

¹ Siriamanta reypa, soldadosnimpa kurajnin Naamán sutiyoj karqa; wiraqochimpa ñaupaqempi ancha munasqa karqa, mantasqataj, imaraykuchus paynejta Señorqa Siriaman atiyta qorqa. Chay runaqa may wapupuni karqa. Chaywampis llijti lepra onqoyniyoj karqa.

² Siriamantaj ashkha soldados Israelman yaykuspa uj sipasta apasqanku, chaytaj Naamampa warmimpa kamachin karqa.

³ Chay sipastaj señoranman nerqa: Sichus wiraqochiy Samariaman rispa profetawan tinkumunman chayqa, lepranmanta thañichisqa kanman.

⁴ Naamantaj reyninman rispa willarqa, chay sipas imastachus nisqanta.

⁵ Siriamanta reytaj payman nerqa: Rillay, noqataj Israelmanta reyman cartasta qelqaspa apachisqayki. Naamantaj rerqa, kinsa chunka waranqa qolqeta apariykukuspa, sojta waranqa qorimanta qolqesta, chunka mosoj p'achastawan.

⁶ Apallarqataj reypa qelqasqan cartata Israel reyninman. Chay qelqasqataj kay jina karqa: Maypachachus kay qelqamususqay chayamusojtin, yachanki noqa Naamán kamachiyta noqa kachamususqayta, llijti lepra onqoyninmanta thañichipunawaykipaj.

⁷ Israelpi reynenqa chay qelqasqata leeytawan, phiñakuspa p'achasninta llik'ikorqa: Noqachu Dios kasqani, wañuchinaypaj, kausaytapis qonaypaj, noqaman kay runata thañichinaypaj pusachimunawampaj? Kunanqa qankuna sumajta tanteaychej, qhawariychejtaj, imaynatachus noqaj contraypi sajrata mask'asqanta.

⁸ Eliseotaj Israelpa reynin p'achasninta llik'ikusqanta uyarispa reyman kacharqa nichispa: Imaraykutaj qan p'achasniykita llik'ikunkiri? Jamuchun noqajman, Israelpi profeta kasqanta yachanqa.

⁹ Chanta Naamantaj tukuynin caballosninwan, carretasninwan ima jamuspa Eliseoj wasi punkunman sayaykorqa.

¹⁰ Eliseotaj uj willajta kacharqa ninampaj: Jordán mayuman rispa qanchis kutita p'ultikamuy, ukhuykitaj thañichisqa kanqa, llimphutaj kanki.

¹¹ Naamantaj manchay phiñasqa riporqa: Noqaqa sonqoypi yuyarqani: Llojsimuspachá Señor Diosnimpa sutinta qhaparispa, makintataj nanasqayman churaspa leprayta thañichinawanta.

¹² Damascopi mayus Abanawan, Farfarwan, manachu aswan sumaj mayus kanku Israelpa tukuy yakusninmanta nisqaqa? Sichus chaykunapi mayllakuyman chayqa, manachu llimphuchasqallataj kayman?, nispa. Jinamanta kutiporqa manchay phiñasqapuni.

¹³ Kamachisnintaj payman chimpasqa nerqanku: Wiraqochíy, tatáy, sichus profetaqa uj jatun imata ruwanaykita nisunkiman chayqa, manachu ruwawaj? Ima astawantaj kasqa, mayllakamuy, llimphutaj kanki nisusqanri?, nispa.

¹⁴ Chanta Naamanqa Jordán mayuman uraykuytawan qanchis kutita p'ultikorqa, imaynatachus Diospa runan nisqanman jina. Ukhuntaj wawaj ukhun jina tukorqa, llimphumantaj tukorqa.

¹⁵ Naamantaj tukuy paywan rejkunawan Diospa runampaman kutirerqa, Eliseoj ñaupaqenman yaykuspataj nerqa: Kunanqa yachani ari, mundontimpi mana waj Diosqa kanchu, manachayqa Israelllapi tiyan. Kunantaj mañakuyki, kay kamachiykimanta uj t'inkata jap'ikunawaykita, nispa.

¹⁶ Chanta Eliseoqa nerqa: Señorpa sutimpi jurani, paypa ñaupaqempi kashani, mana jap'ikuykimanchu imatapis. Chaywampis Naamanqa munarqapuni imallatapis jap'ichiyta. Eliseorí manapuni jap'ikorqachu.

¹⁷ Chantataj Naamanqa nillarqataj: Jina kajtenqa kunan kayta mañakuyki: Iskay mulas apayta atisqanta kay jallp'aykimanta qoriway ari. Kunanmanta jaqaymanqa kay kamachiykeqa manaña ima waj dioskunapaj q'olachisajchu, nitaj ima uywa ñak'asqastapis jaywasajchu, manachayqa Señorllamanña qosaj.

¹⁸ Maypachachus wiraqochi reyníy, Rimompa yupaychana wasinman yupaychaj yaykojtin, paytaj makiypi taunakojtin, chanta paywan khuska qonqorikojtiytaj, Señorqa perdonawachun ari.

^19-20 Paytaj nerqa: Sonqo tiyasqalla ripuy. Chanta Naamán manaraj karuta rishajtin, Diospa runan Eliseoj kamachin Giezeqa sonqompi nerqa: Wiraqocheyqa mana imatapis Naamán Siriomanta jap'ikuyta munanchu. Señorpa sutimpi jurani, usqhayta rispa taripamusaj, ichapis imallatapis qowanqa, nispa.

²¹ Giezeqa Naamanta taripaj rerqa. Naamantaj paypa qhepanta jamojta rikuspa carretanmanta uraykamorqa payta uyarinampaj, nerqataj: Imataj mana allinchuri?, nispa.

²² Giezitaj kuticherqa: Tukuy imapis allillan. Wiraqochiy kachamuwan qanta nisunaypaj; Efraín orqosmanta iskay wayna profetas chayamunku. Kunanqa mañakuyki apachinawaykita kinsa waranqa qolqeta iskay mosoj p'achastawan.

²³ Naamantaj nerqa: Kunanqa sojta waranqa qolqeta apay ari. Ajinata nispataj Naamanqa iskay costalesman qolqeta wakiykucherqa, chay mosoj p'achastapis chayllamantaj churaykorqa. Chaymanta iskay kamachisnillanwantaj apaysicherqa Giezej ñaupaqenta.

²⁴ Loma pataman chayaytawantaj, paykunaj makisninmanta jap'ispa, wasiman waqaychaykorqa, jinaspataj chay runasta kachaporqa.

²⁵ Paytaj yaykuytawan wiraqochinman chimparqa. Chanta Eliseoqa payta taporqa: Giezi, maymanta jamushankiri?, nispa. Paytaj kuticherqa: Kamachiykeqa mana maytapis rerqachu.

²⁶ Chanta Eliseoqa nerqa: Uj runa carretanmanta uraykamuspa qanman chimpamushasojtin, manachu sonqoypi yacharqani? Kunanqa qolqe jap'iy tiempochu kashan: P'achastawan, huertastawan, olivo huertastawan, uvas huertastawan, ovejastawan, wakastawan, qhari kamachistawan, warmi kamachistawan rantinapaj?

²⁷ Chayraykutaj kunanqa Naamampa lepra onqoynin qanman chimpaykusonqa, mirayniykimampis wiñaypaj. Chantataj Eliseoj ñaupaqenmanta llojserqa lepra onqoyniyoj, rit'i jina yurajlla.