2 Reyes 3 - Qheshwa Biblia DC

Israelpi Joram kamachin

¹ Judamanta rey Josafat, chunka pusajniyoj watastaña kamachishajtin, Acabpa wawan Joram Israelta Samariapi kamachiyta qallarerqa. Chunka iskayniyoj watastataj kamacherqa.

² Señorpa ñaupaqempitaj sajrallatapuni ruwarqa, manapis tatan, maman jinapunichu; imaraykuchus payqa tatampa ruwasqan Baal lantista wijch'orqa.

³ Chanta Nabatpa wawan Jeroboampa juchasninman qokorqa, imaswanchus israelitasta juchallicherqa chaykunamanta manapuni t'aqakorqachu.

Eliseoqa Moabta atipanankuta sut'inchan

⁴ Chaypacha Moabpa reynin Mesaqa ashkha ovejasta ujwaj karqa. Chantaqa Israelpa reyninman pachaj waranqa ovejasta, pachaj waranqa sumaj millmasapa carnerostawan apaj.

⁵ Chanta Acab wañupusqanmanta, Moabmanta reyqa, Israelmanta reypa contrampi oqharikorqa.

⁶ Rey Joramtaj Samariamanta llojsimuspa Israelmanta tukuynin soldadosta qhawarqa.

⁷ Judamanta rey Josafatmantaj kacharqa kay jinata nichispa: Moabmanta reyqa noqaj contrampi oqharikun: Noqawan khuska Moabmanta reywan maqanakoj riwajchu?, nispa. Josafattaj kutichispa nerqa: Arí, risaj. Noqaqa qan jina kani; llajtaypis llajtayki jina, caballosniypis caballosniyki jinallataj.

⁸ Nerqataj: Mayqen ñantataj risunchej?, nispa. Kutichispataj nerqa: Edompa ch'in pampannejta, nispa.

⁹ Israelmanta, Judamanta, Edonmanta, kinsantin reyes purirerqanku. Qanchis p'unchaytaña ch'in pampannej ñanta muyuykuspa purisqankumantaña soldadospaj yaku pisiykorqa, tukuynin uywasninkupaj ima.

¹⁰ Chanta Israelpa reynenqa nerqa: Way! Señorqa Moabpa makisninman jaywaykunawanchejpajchu, kay kinsantin reyesta, wajyawarqanchej imatajri!

¹¹ Josafattaj nerqa: Manachu kaypi Señorpa profetan tiyan, paynejta Señorta tapuchinapaj?, nispa. Israelmanta reypa ujnin kamachintaj kutichispa nerqa: Safatpa wawan Eliseo kaypi kashan, payqa Eliaspa kamachin karqa.

¹² Josafattaj nerqa: Payqa atiwasunman Señorpa palabranta willayta. Paykunataj kinsantinku, Israelpa reynin, Judáj reynin, Edompa reyninwan ima, Eliseojman rerqanku.

¹³ Chanta Eliseoqa Israelpa reyninman nerqa: Noqa ima ruwanay tiyan qanwanri? Riy ari tapukamuy ñaupa tatasniykej, profetasninta, nispa. Israelpa reynintaj kutichispa mana nerqa: Imaraykuchus kay kinsantin reyesta Señorqa tantaykun Moabitasman jaywaykunampaj.

¹⁴ Eliseotaj nerqa: Tukuy Atiyniyoj Señorpa sutimpi jurayki, noqaqa paypa ñaupaqempi kashani. Manachus Judamanta rey Josafatta manchachikuyman chayqa, mana qantaqa uyariykimanchu, nitaj qhawarillaykimampischu karqa.

¹⁵ Kunanqa pusamuwaychej arpata tocajta, nispa. Tocajtintaj Señorpa atiynin Eliseoj patanman jamorqa.

¹⁶ Eliseotaj nerqa: Señorqa ajinata nin: Kay vallepi yaku tantana t'oqosta ashkhata ruwaychej.

¹⁷ Imaraykuchus Señorqa ajinata nin: Mana wayrata, nitaj paratapis rikunkichejchu, chaywampis kay valleqa yakuwan junt'a kanqa. Chaymantataj qankuna, wakasniykichej, tukuy uywasniykichejwan ima ujyankichej.

¹⁸ Kaytaj Señorpa ñaupaqempi uj chhikan ruwaylla. Chay jawan payqa Moabitastapis makisniykichejman jaywasonqachej.

¹⁹ Qankunaqa sumaj perqaswan muyuykusqa llajtasta urmachinkichej, allinnin llajtastawan, sumajta poqoj sach'asnintapis k'uturparinkichej, yaku pujyusninkutapis ch'akichinkichej, tukuy sumaj poqoj jallp'asninkutapis rumiswan junt'aykuchinkichej.

²⁰ Jinataj karqa, tutamanta uywa ñak'asqata jaywana horasta jina Edom chaykunasmanta yakus jamorqanku, chay tukuynintataj yakus junt'aykorqanku.

²¹ Moabmanta kajkuna, paykunaj contrankupi reyes maqanakoj jamushasqankuta yachaytawan, tantaykukorqanku tukuyninku maqanakuyta yachajkunamanta pataman. Chantaqa mojonninku kasharqa chayman rerqanku.

²² Tutamanta jatarisqankutawan yakus patapi inti k'ancharimojtin Moabitasqa karumanta qhawarispa yakusta yawarta jina pukata rikorqanku.

²³ Moabitasqa ninakorqanku: Jaqayqa yawar ari, chay reyeschá paykuna pura maqanaykukunku, sapa ujchá kausaqenta wañuchin ari. Kunantaj, moabitas, jakuchej paykunaj imasninta oqharikamusunchej, nispa.

²⁴ Chanta israelitaspa jarasninkuman chayajtinkutaj, Israelmanta kajkunaqa oqharikuytawan kikimpi moabitastaqa maqaykorqanku. Ayqekushajtinkutaj israelitasqa qhatiykuspa moabitasta wañuracherqanku.

²⁵ Llajtasta urmacherqanku, tukuynin sumajta poqoj jallp'asman sapa ujninku rumiwan choqaykuspa junt'aykucherqanku, tukuynin yaku pujyusninkuta, ch'akicherqanku, sumaj poqoj sach'atapis k'uturarqanku. Qir-haresetpitaj rumisllata saqerqanku, imaraykuchus warak'ajkuna chay llajtastaqa ñapis muyuykuspa jap'isqankuña, chanta urmacherqankutaj.

²⁶ Moabmanta reytaj maqanakupi atipasqa kasqanta rikukuspa, qanchis pachaj soldadosninta, sumajta espadata apaykachajkunata tantaykorqa, Edonmanta reyta maqaj yaykunankupaj, chanta manataj aterqankuchu.

²⁷ Chanta Moabmanta reyqa, kuraj kaj wawanta paypa cuentampi kamachinan kasharqa chayta, perqa patapi q'olaykucherqa. Chayrayku paymanta karunchakuspa israelitasqa llajtankuman kutimporqanku.