2 Reyes 25 - Qheshwa Biblia DC

Jerusalén llajtaj urmaynin

¹ Sedequías isq'on watataña kamachishajtin chunka p'unchaypi chunka kaj killapi, Babiloniamanta reyqa tukuynin soldadosninwan jamuspa Jerusalenta muyuykorqa. Llajtaj muyuynimpitaj jatuchaj torresta ruwarqa.

² Ajinata llajtaqa Sedequiaspa chunka ujniyoj wata kamachiyninkama muyuykusqa karqa.

³ Chay watapi tawa killapi isq'on kaj p'unchaynimpi llajtapeqa yarqhayqa astawan yapakorqa, manañataj llajtapeqa imapis mikhunapaj karqachu.

⁴ Llajtaj perqanta jusk'uraytawan, chayninta soldadosqa reywan khuska tutapacha ayqekorqanku iskaynin perqaspa chaupimpi punkunnejta, reypa huertan chay ñannejta, caldeos llajtaj muyuynimpi qhawaspa kashajtinku. Rey Sedequiastaj Arabá ñanninta riporqa.

⁵ Caldeospa soldadosnintaj reyta qhatiykorqanku. Jericó pampapi taripaspataj presochaykorqanku. Tukuynin soldadosnimpis saqerpayaytawan tukuynejman ayqekorqanku.

⁶ Reyta presochaspataj, Babilonia reypaman Riblakama pusamorqanku. Chaypitaj Babilonia reyqa juchachasqa kananta nerqa.

⁷ Wawasninta kikin Sedequiaspa ñaupaqempi kunkasninta khuchurarqanku, paytataj iskaynin ñawisninta orqhorarqanku, chantataj cadenaswan watasqata Babiloniaman aparqanku.

Diospa wasinta urmachinku

⁸ Babiloniamanta rey Nabucodonosor chunka iskayniyoj watataña kamachishajtin, phishqa killampi qanchis kaj p'unchaynimpi Babiloniamanta reypa soldadosnimpa kurajnin kamachin Nabuzaradán Jerusalenman jamorqa.

⁹ Chaypi ninawan enqhaykorqa Señorpa wasinta, reypa wasintawan, Jerusalén llajtapi tukuynin wasista, kurajkunaspa wasisninkutawan, chay tukuytapuni enqhararqa.

¹⁰ Reypa kamachinwan kajkuna caldeostaj Jerusalén llajtaj perqasninta tukuyninta urmacherqanku.

¹¹ Llajtapi qhepakojkunata Babiloniamanta reywan wakin ujchukusqanku chaykunata, pikunachus kamachina runaslla kajkunatawan, Nabuzaradanqa tukuyninkuta Babiloniaman presosta apakaporqa.

¹² Wakin sinch'i wajchas kajkunata Nabuzaradanqa pachanman saqeporqa, chaypi chajrasta, uvas huertatawan llank'anankupaj.

¹³ Señorpa wasimpi broncemanta tukuy ima kajkunata caldeosqa p'akirarqanku, sayantasta, chukusta, jatun yaku churanatawan. Chay p'akirasqa broncesnintataj Babiloniaman apakaporqanku.

¹⁴ Chantá apallarqankutaj mankasta, paletasta, pabilo k'utuna cuchillosta, jatuchaj cucharasta, tukuy imaschus karqa broncemanta Diospa wasimpi apaykachanapaj chaykunata.

¹⁵ Incienso q'osñichinasta, yurusta, qorimanta, qolqemanta kaj imastawan, Nabucodonosorpa kamachenqa apakaporqa.

¹⁶ Iskaynin sayantasta, jatun yaku churanata, chukustawan ima, mayqenkunatachus rey Salomón ruwachisqa Señorpa wasimpi kanampaj, chaykunata chay chhikapuni kajtin, manaña pesacherqachu.

¹⁷ Sapa uj sayantaqa pusaj metroyoj pataman karqa, patampi broncemanta kirpanayoj, kay kirpanataj phatunman iskay metroyoj karqa. Chaytaj broncemanta granadasniyoj ch'ipawan muyuykusqa karqa, chay ujnin sayantapis kikillantaj karqa.

Judá runasta presota apanku

¹⁸ Nabucodonosorpa kuraj kamachenqa kuraj sacerdote Seraiasta, iskay kaj sacerdote Sofoniasta, Diospa wasimpi kinsa qhawajkunatawan presosta apallarqataj.

¹⁹ Jap'illarqataj llajtamanta soldadospa ujnin kamachejninkuta, reyta yupaychajkunasmanta phishqa runasta, listapi runasta churaj soldadospa kuraj kaj qelqeresninkuta sojta chunka runas chay llajtapi kasharqanku chaykunatawan.

²⁰ Kay tukuytataj Nabuzaradán kamacheqa Babiloniamanta rey Nabucodonosorman Riblaman aparqa.

²¹ Babiloniamanta reytajrí paykunata Riblapi wañuracherqa Hamat nisqa cheqapi. Ajinata Judamanta kajkunaqa jallp'ankumanta presos apasqas karqanku.

Qhepakojkuna Egiptoman ayqekunku

²² Babiloniamanta rey Nabucodonosorqa Judapi qhepakojkunata kamachinampaj, Safampa allchhin, Ahicampa wawan Gedaliasta churarqa.

²³ Judamanta soldadospa tukuynin kurajkunasninku, tukuynin runasninkuwan ima Babiloniamanta rey Nabucodonosor Gedaliasta Judapi kamachejta churasqanta yachaspa, Mizpaman jamorqanku: Netaniaspa wawan Ismael Careaj wawan Johamán, nitofatita, Tan-humetpa wawan Seraías uj macateoj wawan Jazaniaswan ima. Chaykuna runasninkuwan jamorqanku.

²⁴ Chanta Gedaliasqa paykunaman, runasninkumanwan juraspa nerqanku: Caldeospa kamachisnin kaytaqa ama manchachikuychejchu, kay jallp'anchejpi tiyakuychej Babiloniamanta kasuspa, allillantaj risonqachej.

²⁵ Reypa ayllunmanta Elisamaj allchhin Netaniaspa wawan Ismael, qanchis kaj killapi chunka runaswan jamorqa. Wañucherqankutaj Gedaliasta, caldeosta, Judamantawan paywan khuska Mizpapi kajkunatawan.

²⁶ Chaymantataj tukuynin runas, juch'uymanta jatunkama, soldadospa kurajkunasninkuwan ima, Egiptoman ayqekorqanku, caldeosta manchachikusqankurayku.

Joaquín kacharisqa allimpaj qhawasqataj

²⁷ Judamanta rey Joaquín kinsa chunka qanchisniyoj watata preso kasqanmanta, chunka iskayniyoj killapi, iskay chunka qanchisniyoj p'unchaynimpi, Babiloniamanta rey Evel-mirodac ñaupaj wata kamachiynimpi, rey Joaquinta carcelmanta orqhochimorqa.

²⁸ Paytaqa may k'achatapuni parlapayarqa, Babiloniapi reyes kasharqanku chaykunamanta aswan patapi paypa trononta churaporqa.

²⁹ Presospa churakunan p'achasninta paymanta orqhocherqa, tukuy kausaynimpitaj reywan khuska mikhoj.

³⁰ Sapa p'unchaytaj reypamanta mikhunata qoj kanku, mana qonqaspa tukuy kausaynimpi.