2 Reyes 23 - Qheshwa Biblia DC

¹ Chantá reyqa kamacherqa Judamanta, Jerusalenmantawan tukuynin kurajkuna paywan tantakunankupaj.

² Reytaj Señorpa wasinman wicharerqa Judamanta runaswan, Jerusalempi tiyakojkunawan, profetaswan, sacerdoteswan, tukuynin nacionnintinwan juch'uymanta jatunkama. Chaypitaj reyqa paykunaj uyarinankuta leerqa Diospa trato ruwasqan librota, Señorpa wasimpi tarisqanku chaymanta.

³ Chanta reyqa pilar chaynejpi sayarikuspa Señorpa ñaupaqempi tratota ruwarqa, nerqataj Señorpa qhepanta rinanta, waqaychaspa kamachisqasninta, leykunasninta, nisqasnintawan, tukuy sonqowan tukuy yuyayninwantaj. Tukuy runastaj chay tratota junt'anankuta nerqanku.

Josiaspa cheqanchasqasnin

⁴ Chanta rey Josiasqa kamacherqa kuraj sacerdote Hilciasta, paypa qhepampi kaj sacerdotesta, punkuta qhawajkunatawan, Señorpa wasinmanta orqhonankuta Baalpaj, Aserapaj, janaj pachamanta qoyllurkunapajwan, tukuy imasta paykuna yupaychanankupaj ruwasqankuta. Chaykunataqa Jerusalenmanta jawaman orqhospa Cedrón pampanejpi ruphaykucherqanku. Chay ushpastataj Betelman apacherqa.

⁵ Chanta lanti yupaychaj sacerdotesta qharqorqa, pikunatachus Judamanta reyes churarqanku lomas pata altarespi inciensota q'osñichinankupaj, Judamanta tukuy llajtaspi, Jerusalempi qayllasnimpiwan. Jinallatataj Baalman inciensota q'osñichinankuta, intiman killaman, ch'askasman, janaj pachapi tukuynin qoyllurkunamanwan.

⁶ Señorpa wasinmanta lantistapis wijch'ucherqa, Jerusalenmanta jawaman, Cedrón wayq'oman. Chaypitaj ruphaykucherqa ushphaman kutinankama, chay ushphatataj runa ayasta p'ampana chay pataman jich'arqayarqa.

⁷ Señorpa wasimpi lantista yupaychaspa, qharipura qhenchachakojkunaj cuartosninkuta urmacherqa. Chaykunapi warmisqa Aserapaj p'achasta awaj kasqanku.

⁸ Tukuynin Judá llajtamantataj sacerdotesta wajyacherqa, chantá tukuynin loma patapi altaresta ch'ichichaykusqa Gebamanta Beerseba chaynejkama, maykunapichus sacerdotes inciensota q'osñichej kanku chaykunata. Urmachillarqataj llajtata kamachej Josuejpa punkun chaynejpi kaj altaresta. Chaykunaqa llajtaman yaykuna lloq'ennejpi kasharqanku.

⁹ Chaywampis lomas pata altaresmanta sacerdotesqa Jerusalempi Señorpa altarninman mana wicharerqankuchu, manachayqa mana levadurayoj t'antasta mikhoj kanku, wauqesninku sacerdoteswan.

¹⁰ Jinallatataj Ben-Himon vallepi altaresta chay ruphachina cheqata ch'ichichaykullarqataj, amaña pipis qhari wawasninta, chayri warmi wawasninta chaypi Molocman ruphachispa jaywanampaj.

¹¹ Ajinallatataj qhechorqa Judamanta reyes caballosta intiman jaywasqankuta Señorpa wasinman yaykuna chaynejpi, Natán-melecpa wasin chaynejpi. Paytaj chay wasipi imachus karqa chaykunata qhawaj; intej carretasnintapis ninaman enqhaykorqa.

¹² Ajinallatataj rey Josiasqa, Judamanta rey Acazpa wasin patapi ruphaykucherqa, altarestapis urmacherqa, Señorpa wasimpi iskaynin, patiosnimpi, Manasespa altares ruwasqasnintapis t'unaraspa Cedrón wayq'oman wijch'uchimorqa.

¹³ Ajinallatataj rey Josiasqa Jerusalén chimpapi lomas patapi altaresta ch'ichichaykorqa. Olivos orqoj pañannejpi kajkunata, mayqenkunatachus rey Salomón ruwasqa sidoniospa millay lantej Astortepaj, moabitaspa millay lantin Quemospa, Amompa millay lantin Milcompajwan.

¹⁴ Chay lantista reyqa p'akirarqa, Aseraj lantisninta urmacherqa, chaykunamantaj runa tullusta junt'aykucherqa.

¹⁵ Betelpi karqa chay altarestapis ajinallatataj ruwarqa, Nabadpa wawan Jeroboampa ruwasqasnintapis, mayqenwanchus israelitasta juchallichej achay altarta, orqo patapi karqa chaytawan urmachispa ninawan enqhaykorqa ushphaman kutinankama. Aseraj lantinmampis ninawan jap'iykucherqa.

¹⁶ Josiastaj kutirikuspa chay lomas patapi aya p'ampanata rikorqa, chayman kachaspa runa tullusta orqhochimorqa, chay tullustataj chay altarespi ruphacherqa, ch'ichipaj qhawasqa kanampaj, imaynatachus Diospa runan sut'inchasqanman jina junt'akunampaj.

¹⁷ Chantá tapurerqa: Imataj jaqay rikushani chayri?, nispa. Llajta runasta payman nerqanku: Kayqa Judamanta jamorqa chay profetaj sepulturan. Payqa qampaj ruwasqaykita Betelmanta chay altar patapi kajta sut'incharqa.

¹⁸ Josiasqa kamacherqa: Saqellaychej, ama tullusninta t'ojpiychejchu, nispa. Ajinapitaj tullusnenqa waqaychasqa karqa, Samariamanta jamoj profetaj tullusnimpis.

¹⁹ Samaria llajtaspi, chay tukuynin llajtaspi, chay tukuynin lomas patapi, altaresta ruwasqanku Israelmanta reyes chaykunawan Señorta phiñachinankupaj. Chaykunatapis Josiasqa chinkacherqa, imaynatachus Betelpi ruwarqa ajinata tukucherqa.

²⁰ Chantapis chay lomas pata altaresmanta sacerdotes kajkunata chay altaresllapitaj wañuracherqa. Chay altares patallapitaj runa tullusta ruphaykucherqa. Chaymantataj Jerusalenman kutiporqa.

Josías Pascuata ruwachin

²¹ Chaymanta reyqa tukuynin aylluta kamacherqa: Señor Diosniykichejman Pascuata ruwaychej, kay trato ruwasqa libropi qelqasqa kashan, chayman jina.

²² Israelta jueces kamacherqanku chaymantapacha mana kay jina Pascuata ruwasqankuchu, ni Israelmanta reyespa p'unchaykunasnimpi, nitaj Judamanta reyespa p'unchaykunasnimpipis.

²³ Rey Josías chunka pusajniyoj watataña kamachishajtin Jerusalempi Señorman chay Pascua ruwasqa karqa.

Señorpa phiñakuynin Judáj contrallampipuni

²⁴ Ajinallatataj chinkacherqa: Josiasqa tukuynin layqasta, yatiristawan qharqorqa, wasi lantista, tukuy imaymana millay yupaychanastawan. Judá jallp'api karqa, Jerusalempiwan chaykunata tukuyninta wijch'orqa, Señorpa wasimpi kuraj sacerdotej tarisqan libropi qelqasqa karqa chayta junt'anampaj.

²⁵ Manataj ujpis ñaupajta pay jina reyqa karqachu Señorman kutirikojqa tukuy sonqowan, tukuy almawan, tukuy kallpanwan ima, imaynachus Moisespa leynimpi kasqanman jina. Paymanta qhepaman manataj ujwampis pay jinaqa nacekorqañachu.

²⁶ Chay tukuywampis, Señorpa phiñakuynenqa manapuni thasnukorqachu, chay jinatapuni Judáj contrampi phiñakusqanmanta, Manasés chay tukuy ima ruwasqasninwan payta phiñachisqanmanta.

²⁷ Señorqa nerqa: Judata ñaupaqeymanta wijch'usajpuni, imaynatachus Israeltapis wijch'orqani ajinata, qhesachasajtaj kay ajllakusqay llajtata. Noqa ajllakorqani, chay wasitapis, mayqenmantachus noqa nerqani, kay wasiypi sutiy kananta chaytawan.

Josiaspa wañupusqan

²⁸ Josiaspa tukuy ima ruwasqasnin, waj ruwasqasnimpiwan manachu Judamanta reyespa ruwasqasninku libropi qelqasqa kashan?

²⁹ Jaqay p'unchaykunapi Egiptomanta rey faraón Necao, Eufrates mayu qayllaman Asiriamanta reypa contrampi llojsimorqa. Rey Josiastaj paywan maqanakoj rerqa. Necaotaj rikuytawan Meguidopi wañorqocherqa.

³⁰ Kamachisnintaj jina wañusqata Meguidomantapacha Jerusalenman carretapi apamorqanku, chaypitaj reyespa sepulturampi p'ampaykorqanku. Runastaj Josiaspa wawan Joacazta jawiykorqanku tatampa cuentampi kamachinampaj.

Judapi Joacazpa kamachisqan

³¹ Joacazqa kamachiyta qallarishaspa iskay chunka kinsayoj watayoj karqa, Jerusalempitaj kinsa killata kamacherqa. Mamantaj Libnamanta Jeremiaspa wawan Hanutal karqa.

³² Paytajrí Señorpa ñaupaqempi sajratapuni ruwarqa, imaynatachus ñaupa tatasnin ruwarqanku ajinata.

³³ Faraón Necaotaj paytaqa presota jap'erqa Riblapi, Hamat chay jallp'anejpi, amaña Jerusalempi kamachinampaj. Kamacherqataj Judá jallp'ata tasata pagananta, kinsa waranqa kinsa pachajniyoj kilos qolqeta, kinsa chunka kinsayoj kilos qoritawan.

³⁴ Chay jawataj faraón Necaoqa, Josiaspa wawan Eliaquinta paypa cuentanmanta kamachejta churarqa, sutintataj wajta suticharqa, Joacim nispa. Joacaztataj Egiptoman apakaporqa, jaqaypitaj wañuporqa.

³⁵ Joacimtaj qolqeta qoritawan pagarqa faraón nisqanman jina. Chayta junt'anampajtaj jallp'ata tasacherqa, chayman jina runasmanta qolqeta qoritawan orqhonampaj, sapa ujmanta jatun jallp'ayojman jina, faraón Necaoman qonampaj.

Judapi Joacim kamachin

³⁶ Joacemqa kamachiyta qallarishaspa iskay chunka phishqayoj watayoj karqa. Jerusalempitaj chunka ujniyoj watata kamacherqa. Mamantaj Rumamanta Pediaiaspa wawan Zebuda karqa.

³⁷ Señorpa ñaupaqempi sajrata ruwarqa, imaynatachus ñaupa tatasnin ruwarqanku ajinata.