2 Reyes 22 - Qheshwa Biblia DC

Judapi Josiaspa kamachisqan

¹ Josiasqa kamachiyta qallarishaspa, pusaj watayojllaraj karqa, Jerusalempitaj kinsa chunka ujniyoj watata kamacherqa. Mamantaj Boscatmanta Adaiaj wawan Jedida karqa.

² Paytaj Señorpa ñaupaqempi cheqanta ruwarqa, ñaupa tatan Davidpa ñankunasnimpi purispa, nitaj lloq'eman, nitaj pañaman t'aqakuspa.

Leymanta librota tarinku

^3-5 Josías chunka pusajniyoj watataña kamachishaspa Mesulampa allchhin Asalíaj wawan reypa qelqerin Safanta, Señorpa wasinman kacharqa: Kunan sacerdote Hilciaspaman riy, ninkitaj Señorpa wasinman qolqeta tantasqankuta jap'ichunku. Paykunataj runas apamusqankuta, Señorpa wasinta qhawajkunaman jaywachunku, Señorpa wasimpi llank'ajkunaman paganankupaj:

⁶ Carpintirosman, llank'ajkunaman, albañilesman, k'aspista, rumi ch'eqosqastawan rantinankupaj, Señorpa wasinta allinyachinankupaj.

⁷ Amataj paykunamanta mañankichejchu mashkhatachus gastasqankumanta, imaraykuchus paykunaqa cheqan sonqowan apaykachashanku.

⁸ Chanta kuraj sacerdote Hilciasqa qelqeri Safanman nerqa: Señorpa wasimpi leymanta librota tarini. Hilciastaj Safanman qorqa, paytaj leerqa.

⁹ Qelqeri Safantaj jamuspa reyman willarqa tukuy imata ruwasqanmanta, nerqataj: Kamachisniykeqa ñapis chay tukuynin qolqeta Diospa wasimpi tantasqankuta Señorpa wasinta allinyachejkunaman jaywaykuña, nispa.

¹⁰ Ajinallatataj qelqeri Safanqa reyman tukuy imata willarqa: Kuraj sacerdote Hilcias uj librota jaywawan. Safantaj reypa ñaupaqempi leerqa.

¹¹ Chay librota leejta uyariytawan reyqa p'achasninta llik'ikorqa.

¹² Reyqa kamacherqa sacerdote Hilciasman, Safampa wawan Ahicanman, Micaiaspa wawan Acborman, qelqeri Safanman, reypa kamachin Amaiasmanwan:

¹³ Rispa Señorta tapurimuychej, noqamanta, llajtamanta, tukuynin Judamantawan, kay tarisqa libroj palabrasninmantawan; Señorpa phiñakuynenqa jatunmin noqanchejpa contranchejpi. Tatasninchejqa manamin kay libropi qelqasqataqa uyarerqankuchu, chayman jina ruwanankupaj.

¹⁴ Chanta sacerdote Hilciasqa rerqa, Ahicamwan, Acborwan, Safanwan, Amasiaswan ima, profetisa Huldata watukoj. Payqa Salumpa warmin karqa; Saluntaj Ticvaj wawan karqa, Harhaspa allchhintaj. Harhasqa Diospa wasimpi p'achasta jallch'anampaj churasqa karqa. Huldaqa Jerusalempi tiyakorqa, mosoj wasis tiyan chaynejpi, payman qayllaspataj parlarqanku.

¹⁵ Paytaj paykunaman kuticherqa: Israelpa Señor Diosnenqa kay jinata nin: Rispa kay jinata chay kachamusojniykichej runaman willamuychej.

¹⁶ Ajinata Señorqa nin: Kunanqa tukuy imastachus chay libropi qelqasqata Judamanta rey leerqa chay tukuynin sajrata, kay llajtaman, tiyakojkunamanwan apachimusaj.

¹⁷ Paykunaqa noqaqa saqerpariwanku, waj dioskunamantaj inciensosta q'osñichinku, chay tukuy imaymanasta makisninkuwan ruwaspa noqaqa phiñachiwanku. Phiñakuyneyqa kaypi tiyakojkunaj contrampimin, manataj thasnusqachu kanqa.

^18-19 Judamanta rey kachamusorqachej chayman kay jinata ninkichej: Israelpa Señor Diosnenqa ajinata nin: Kay libroj palabrasninta uyarisqaykirayku, sonqoykita wawayachispa noqaj ñaupaqeypi k'umuykukusqaykirayku, noqaj nisqayta uyarispa kay llajtaj contrampi, chaypi tiyakojkunaj contrampiwan, paykuna chinkachisqas kanankuta, maldicisqastaj, qan p'achasniykita llik'ikusqaykirayku, noqaj ñaupaqeypi waqaspa, chayta noqapis uyariyki, nispa Señorqa nisunki.

²⁰ Chayrayku kunanqa noqa ruwasaj sonqo tiyasqallapi wañunaykita, ñaupa tatasniykiwan ujchakunaykipaj, mana rikuspalla kay cheqapi tiyakojkunamanwan apachimusaj chayta. Paykunataj chay kikinta reyman willamorqanku.