2 Reyes 21 - Qheshwa Biblia DC

Judapi Manasespa kamachisqan

¹ Manasesqa kamachiyta qallarishaspa chunka iskayniyoj watayoj karqa. Jerusalempitaj phishqa chunka phishqayoj watata kamacherqa; mamantaj Hepsiba sutiyoj karqa.

² Sajratapunitaj payqa ruwarqa Señorpa ñaupaqempi, israelitaspa ñaupaqenmanta Señorqa qharqorqa, chay runaspa millay ususninkuman jina ruwarqa.

³ Tatan Ezequiaspa orqos patapi altar ruwachisqanta, watejmanta ruwarqa, Baalpaj altaresta wakicherqa, Asera lantita ruwallarqataj, Israelmanta rey Acab ruwarqa ajinata. Janaj pachamanta tukuy qoyllurkunaman qonqorikorqa, yupaycharqataj.

⁴ Señorpa wasimpipis ajinallatataj altaresta sayaricherqa, mayqenmantachus Señorqa nisqa; noqa Jerusalempi sutiyta churasaj, nispa.

⁵ Diospa iskaynin patiompi altaresta ruwacherqa, janaj pachapi tukuy qoyllurkunapaj.

⁶ Wawantapis ninapi ruphachispa jaywaykorqa, sajra espiritusta wajyayman churakorqa, suerte qhawayman, wañusqasta tapuyman layqeriosman ima. Ajinapi ashkha sajra imastapuni ruwaspa Señorta phiñaricherqa.

⁷ Asera lantita ruwaspa Señorpa wasinman churarqa, mayqenmantachus Señorqa Davidman, wawan Salomonmanwan nerqa: Kay Jerusalén templori sutiy wiñaypaj kanqapuni. Kay templotaqa noqa ajllakorqani tukuynin Israel ayllumanta.

⁸ Israel aylluytaqa manaña wijch'usajchu, ñaupa tatasninkuman qorqani chay jallp'asmanta, sichus paykuna junt'anqanku kay tukuy kamachisqasniyta, kamachiy Moisespa kamachisqasnintawan.

⁹ Paykunataj mana uyarerqankuchu. Manasesqa runasta astawan sajra ruwaykunaman pusarqa, chay waj llajtayojkunamantapis astawanraj, mayqentachus Señorqa israelitaspa ñaupaqempi chinkacherqa chaykunamanta.

¹⁰ Señortaj kamachisnin profetasninnejta paykunaman parlarqa.

¹¹ Judamanta rey Manasés kay jinata ruwasqanrayku, paymanta ñaupajta amorreos karqanku chaykunamantapis aswan millay sajratapuni ruwasqanrayku, lantisninwantaj Judata astawan juchallichisqanrayku.

¹² Chayrayku Israelpa Señor Diosnenqa ajinata nin: Kunanmá may ñak'ariyta Jerusalenman, Judamanwan apachimusaj. Chayta pillapis uyarejtenqa ningrisnimpuni silbarenqa.

¹³ Samariaj jasut'iynintapuni Jerusalenman kachamusaj. Acabpa mirayninta junt'arqani chayllawantaj jasut'isaj, imaynatachus kharka chuwata khituraspa, mayllaspataj k'umpurparinchej ajinata ruwasaj.

¹⁴ Llajtamanta puchojkunata saqerparisajtaj, enemigosnimpa makisninmantaj jaywaykusaj, paykunata suwanankupaj, q'arallata sayachinankupajtaj.

¹⁵ Noqaj ñaupaqeypi tukuy ima sajrata ruwasqankuwan anchataña phiñachiwanku, ñaupa tatasninku Egiptomanta llojsimusqankumantapacha kunankama.

¹⁶ Chay jawa Manasesqa mana juchayojkunaj yawarninta jich'acherqa, tukuynin Jerusalenman junt'aykuchin uj k'uchunmanta, uj k'uchunkama. Kayqa wajlla karqa Señorpa ñaupaqempi Judata imaswanchus juchallicherqa chaymanta nisqaqa.

¹⁷ Manasespa tukuy ima ruwasqasnin, waj ruwasqasnin, chay juchata ruwasqasnimpiwan, manachu Judamanta reyespa ruwasqasninku libropi qelqasqa kashan?

¹⁸ Manasés wañupojtintaj wasimpi huertan ukhupi p'amparqanku, Uza sutiyoj huertampi. Cuentampitaj wawan Amón kamacherqa.

Judapi Amonqa kamachin

¹⁹ Amonqa iskay chunka iskayniyoj watayoj karqa kamachiyta qallarishaspa. Jerusalempitaj iskay watata kamacherqa; mamanqa Jotbamanta Haruzpa wawan Mesulamet karqa.

²⁰ Imaynatachus tatan Manasés ruwarqa, ajinallatataj Amonqa Señorpa ñaupaqempi ancha sajrata ruwarqa.

²¹ Tatampa tukuy ñankunasnimpitaj purerqa, mayqen lantistachus tatan yupaycharqa, chaykunallamantaj paypis qonqorikorqa, yupaycharqataj.

²² Ñaupa tatasnimpa Señor Diosninta saqerparispa, mana Señorpa ñankunasnimpichu purerqa.

²³ Paypa kamachisnillantaj oqharikuspa, reytaqa wasimpi wañucherqanku.

²⁴ Chanta llajtamanta runasqa rey Amonta wañuchejkunata tukuyninkuta wañuracherqanku. Judamanta runastaj paypa cuentampi Josiasta kamachejta churarqanku.

²⁵ Amompa tukuy ima ruwasqasnin, manachu Judamanta reyespa ruwasqasninku libropi qelqasqa kashan?

²⁶ Paytaqa Uza nisqa huertapi p'amparqanku, cuentampitaj wawan Josías kamacherqa.