2 Reyes 2 - Qheshwa Biblia DC

Eliasqa janaj pachaman ripun

¹ Maypachachus Señorqa Eliasta uj muyoj wayranejta janaj pachaman pusakapuyta munashajtin, Eliasqa Eliseowan Gilgalmanta jamusharqa.

² Eliastaj, Eliseota nerqa: Kunanqa kaypi qhepakuy, imaraykuchus Señorqa Betelman kachashawan. Eliseotaj nerqa: Señorpa sutimpi, qampa sutiykipiwan jurani, mana sapaykita rejta saqesqaykichu, nispa. Chantaqa iskayninku Betelman uraykorqanku.

³ Wakin profetas Betelpi tiyakojkuna, chaymanta llojsimuspa Eliseoman nerqanku: Yachankichu yachachejniykita Señorqa pusakapunanta? Paytaj nerqa: Arí, noqa yachaniña, ch'inlla kaychej.

⁴ Ujtawan Eliasqa Eliseota nillarqataj: Eliseo, kaypi kunanqa qhepakuy, Señorqa Jericoman kachashawan, nispa. Paytaj nerqa: Señorpa sutimpi, qampa sutiykipiwan jurani, mana sapaykita rejta saqesqaykichu, nispa. Chanta iskayninkutaj Jericoman jamorqanku.

⁵ Jericopi kasharqanku chay profetastaj Eliseoman chimpaspa nerqanku: Yachankichu Señorqa yachachejniykita qanmanta pusakapunanta? Paytaj kutichispa nerqa: Arí, noqa yachaniña, ch'inlla kaychej.

⁶ Eliasqa nillarqataj: Kunanqa mañakuyki kaypi qhepakunaykita, Señorqa Jordanman kachashawan, nispa. Paytaj nerqa: Señorpa sutimpi, qampa sutiykipiwan jurani, mana sapaykita rejta saqesqaykichu, nispa. Iskayninkutaj rerqanku.

⁷ Phishqa chunka profetastaj jamuspa paykunamanta karunejpi sayaykukorqanku. Eliaswan Eliseowantaj Jordán mayu qayllapi sayaykukorqanku.

⁸ Chanta Eliasqa qhatakuna p'achanta jap'ispa mayt'uykorqa, chaywantaj yakuta wajtarqa, yakutaj iskayman t'aqakorqa puraj ladoman, chantá ch'akita paykunaqa pasarqanku.

⁹ Mayuta chimpaytawan Eliasqa Eliseoman nerqa: Mañakuway imatachus munasqaykita qampaj ruwapusunaypaj, amaraj qanmanta Señor t'aqashawajtin. Eliseotaj nerqa: Noqa mañakuyki espirituykimanta uj jinatawan qonawaykita.

¹⁰ Eliasqa nerqa: Mana qoyta atinata jina mañakunki. Chaywampis sichus qanmanta pusashawajtin rikuwanki chayqa, ajina kanqa, mana chayrí mana.

¹¹ Paykuna parlaspa rishajtinku nina carreta nina caballosniyoj rikhurimuspa t'aqarparerqa. Chanta Eliasqa uj muyoj wayrapi janaj pachaman wichariporqa.

¹² Eliseotaj ripojta rikuspa qhaparerqa: Tatáy, tatáy, qanqa Israelpaj karqanki uj carreta caballos niyoj jina, nispa. Eliseotaj manaña jayk'ajpis ujtawan rikorqachu. Chantataj p'achasninta iskayman llik'ikorqa.

Eliseoqa Eliaspa cuentanmanta qhepakun

¹³ Chantataj Eliaspa qhatakuna p'achan urmaykamusqa, chayta oqharerqa; kutispataj Jordán mayu cantopi sayaykukorqa.

¹⁴ Eliaspa ponchon urmaykamusqa chayta jap'ispataj yakusta wajtarqa: Maypitaj Eliaspa Señor Diosnin kashan?, nispa. Wajtasqantawantaj yakusqa iskayman t'aqakorqanku puraj ladoman. Eliseotaj mayuta chimparqa.

¹⁵ Jericopi kaj profetas, Jordán mayoj uj ladompi, chay jinata rikuspa nerqanku: Eliaspa espíritun Eliseoj patanman jamun. Chantataj paykunaqa Eliseoj ñaupaqenman jamuspa qonqoriykukorqanku.

¹⁶ Nerqankutaj: Kamachisniykiwan, phishqa chunka wapu qharis tiyan, paykuna rispa yachachejniykita mask'amuchunku; ichapis Señorpa Espíritun oqharispa, orqo patasmanchus, Chayri pampamanchus wijch'uykun. Paytaj nerqa: Amaña kachaychejchu, nispa.

¹⁷ Chay jinatapuni kachananta nejtinkutaj, nerqa: Kachaychejpis. Chanta paykunaqa chay phishqa chunka runasta Eliasta mask'ajta kacharqanku kinsa p'unchay junt'ata, manataj tarerqankuchu.

¹⁸ Eliseo Jericopi qhepakorqa chayman kutimojtinkutaj, payqa nerqa: Manachu noqaqa nerqaykichej ama riychejchu nispa?

Eliseoqa Jericopi yaku juturita llimphuchan

¹⁹ Llajtamanta runastaj Eliseoman nerqanku: Qhaway maynejpichus kay llajta ruwasqa kashan chayqa allillan, imaynachus qan, wiraqochíy, rikunki jina; chaywampis yakusnenqa mana cosachu ari, jallp'aspis mana poqoy atej, nispa.

²⁰ Chanta payqa nerqa: Uj mosoj yuruta apamuwaychej, chaymantaj kachita churaychej. Chanta paykunaqa apamorqanku.

²¹ Llojsispataj payqa yaku juturisman kachita jich'aykamorqa, nerqataj: Señorqa ajinata nin: Kay yakustaqa noqa llimphuchani, manañataj, nitaj onqoypis chaypi kanqañachu, nispa.

²² Kay yakustaj kunankama llimphuchasqas kanku, imaynatachus Eliseoj parlasqanman jina.

²³ Chaymanta llojsispataj Betelman wicharerqa. Ñannejta wicharishajtintaj llajtamanta ashkha waynuchitus llojsimuspa payta asipayayta qallarerqanku: P'ajla wicharishan, p'ajla wicharishan, nispa.

²⁴ Eliseotaj qhepanta qhawarikamuspa chay waynuchitusta rikuytawan Señorpa sutimpi maldiciyta qallarerqa. Iskay jukumaristaj sach'as ukhumanta llojsimuspa, chay waynuchitusta tawa chunka iskayniyojta wañuracherqa.

²⁵ Chaymantataj Carmelo orqoman rerqa, chaymantataj Samariaman kutiporqa.