2 Reyes 17 - Qheshwa Biblia DC

Samariaj urmasqan

¹ Judamanta rey Acaz chunka iskayniyoj watata kamachishajtin, Elaj wawan Oseas Israelpi kamachiyta qallarerqa Samaria llajtapi. Kamacherqataj isq'on watata.

² Señorpa ñaupaqempi sajrata ruwarqa, chaywampis mana Israelmanta ñaupaj reykuna jinapunichu.

³ Asiriospa reynin Salmanasartaj Oseaspa contrampi llojsimorqa; Oseastaj kamachinman tukorqa, tasatataj chay reyman pagaj.

⁴ Chanta Asiriamanta reyqa reparakorqa Oseas paypa contrampi oqharikushasqanta, Egiptoj reynin Soman kamachisninta kachasqanta, chantapis Asiria reymanqa mana tasata pagarqañachu, imaynatachus sapa wata pagaj ajinataqa. Chayrayku Asiriamanta reyqa kamacherqa Oseasta carcelman wisq'aykunankuta.

⁵ Asiriamanta reytaj tukuynin Israelman soldadosninwan junt'aykorqa, Samariatapis kinsa wata junt'ata maqanakuspa muyuykorqa.

⁶ Oseas isq'on watataña kamachishajtin Asiriamanta reyqa Samariata jap'erqa, runasnintataj Asiriaman presosta apakaporqa, chaypitaj Halahman, Haborman, Gozán mayu qayllaman, medospa llajtasninmanwan churarqa.

⁷ Chayqa karqa israelitas Señor Diosninkoj contrampi juchallikusqankurayku, pichus paykunataqa Egiptomanta rey faraompa makinmanta orqhomorqa chaypa contrampi, waj dioskunata yupay chasqankurayku.

⁸ Paykunaqa mayqen nacionestachus Señorqa qharqorqa ñaupaqenkumanta chaykunaj ususninkupi purerqanku, imastawanchus Israelmanta reyespis nerqanku chaykunapiwan.

⁹ Israelitasqa pakayllamanta Señor Diosninkoj contrampi sajra imasta ruwarqanku. Chanta ruwallarqankutaj loma pataspi altaresta, tukuy llajtasninkupi, qhawana torresniyoj llajtaspi, jark'achisqa llajtaspi ima.

¹⁰ Tukuynin alto orqospi, thansa sach'as urapiwan sayacherqanku rumi lantista, Asera lantistawan.

¹¹ Chaykunapi inciensota q'osñicherqanku, ñaupaqenkumanta Señorqa qharqorqa, chay runas ruphachej kanku ajinata. Israelitasqa ancha sajratapuni ruwarqanku, chay jinamanta Señorta phiñachispa.

¹² Lantista yupaycharqanku, mayqenkunamantachus Señorqa ñaupajtaña kamacherqa, ama ajinataqa ruwankichejchu, nispa.

¹³ Señortaj Israeltawan Judatawan k'amerqa, tukuynin profetasninnejta, Diospa kachasninnejtawan: Sajra purisqasniykichejmanta kutirimuychej, kamachisqasniyta leyesniytawan waqaychaychej, mayqenkunatachus tatasniykichejman kachamorqaykichej chay profetasniynejta.

¹⁴ Paykunarí astawampis mana kasorqankuchu, sonqosninkuta rumiyacherqanku, tatasninku jina, paykunaqa Señor Diosninkupi mana creerqankuchu.

¹⁵ Señorpa nisqanta qhesacharqanku ñaupa tatasninkuwan trato ruwasqanta, tukuy kamachisqantawan qhesacharqanku, qhasi mana kaj lantista qhatispa, qhasi mana kajman tukorqanku, paykunaj qayllankupi kaj nacionespa ruwasqankuta ruwaspa. Chaykunamanta Señorqa ñaupajtaña nisqa, ama paykuna jina ruwanankuta.

¹⁶ Señor Diosninkoj tukuy kamachisqasninta saqerparerqanku. Paykunataj metalta unuyachispa iskay waka lantista ruwakorqanku. Asera k'ullu lantistapis ruwakullarqankutaj. Chay jawaqa yupaychallarqankutaj Baalta, cielopi tukuy qoyllurkunatawan.

¹⁷ Qhari wawasninkuta warmi wawasninkutawan ninaman ruphachispa layqa imasman adivinayman churakorqanku. Señorpa qhawaynimpitaj millay ruwaykunasmampuni churakorqanku, ajinapi Señorta mayta phiñachispa.

¹⁸ Señortaj chay jinamanta anchatapunitaj phiñakorqa, paykunapaj, Israelpa contrampi. Paypa ñaupaqenmanta qhechorqataj, manataj qhepakorqachu, manachayqa Judá ayllulla sapan qhepakorqa.

¹⁹ Judapis manallataj Señor Diosninkoj kamachisqasninta waqaycharqankuchu, astawampis Israel llajtaj kamachisqasnimpi purerqanku, mayqenkunatachus paykunalla ruwakorqanku.

²⁰ Israelpa tukuynin mirayninta Señorqa qhesacharqa, llakiypitaj churarqa, suwaspa makisninmantaj saqerqa, paypa ñaupaqenmanta wijch'usqas kanankukama.

²¹ Davidpa mirayninmanta israelitasta t'aqarqa. Paykunatajrí Nabadpa wawan Jeroboamta reyta churarqanku. Jeroboamtaj Señorpa ñaupaqenmanta israelitasta karunchacherqa, manchay millayta juchallichispa.

²² Israelitasqa Jeroboampa juchallichisqallampitaj purerqanku, chaykunamanta mana t'aqakuspa.

²³ Señorqa israelitasta ñaupaqenmanta qharqorqa, imaynatachus pay profeta kamachisninnejta nisqanman jina. Israelitastaj presochasqas, Asiriaman apasqastaj karqanku, kunan p'unchaykama.

Samariapi waj runas tiyakunku

²⁴ Asiriamanta reyqa runasta apachimorqa Babiloniamanta, Cutamanta, Avamanta, Hamatmanta, Sefervainmantawan. Samaria llajtasmantaj paykunata churarqa israelitaspa cuentanmanta. Ajinamanta Samariata jap'ikaporqanku, llajtasnimpitaj tiyakorqanku.

²⁵ Maypachachus tiyakuyta qallariytawan, Señorta mana yupaychajchu kanku, chayrayku Señorqa paykunaj contrampi leonesta kachamorqa, leonestaj paykunamanta wakinta wañuracherqa.

²⁶ Samariamanta reymantaj nerqanku: Samaria llajtaman tiyakunankupaj apacherqanki chay runasqa, chay naciompa diosnimpa leyesninta mana yachankuchu, chay diostaj paykunaj chaupinkuman leonesta kachaykamun, chay leonestaj paykunata wañurachishan, nispa.

²⁷ Asiriamanta reytaj kamacherqa: Jaqaymanta apamusqaykichej sacerdotesmanta ujninta jaqayman kutichiychej, rispataj jaqaypi tiyakuspa diosnimpa leyesninta yachachinampaj.

²⁸ Samariamanta presosta apasqanku chaykunamanta ujnin sacerdote jamorqa, Betelpitaj tiyakorqa. Payqa yachacherqa imaynatachus Señorta yupaychanankuta.

²⁹ Chaywampis sapa nacionmanta kajkunaqa dioskunasninkuta ruwakorqanku, Samaria lomas patapi altares ruwasqa karqa chaykunaman churarqanku, maypichá tiyakorqanku chaynejpi sapa nación diosniyoj karqanku.

³⁰ Ruwakorqankutaj Babiloniamanta runasqa Sucot-benotta; Cutamanta kaj runastaj Nergalta; Hamatmanta kaj runastaj Asimata.

³¹ Ava runastaj Nibhazta, Tartactawan; Sefarvainmanta runastaj wawasninkuta ninapi ruphacherqanku Adramelectawan, Anamelectawan yupaychanankupaj.

³² Señorta yupaychaj kanku; chaywampis paykuna ukhullamanta sacerdotesta churarqanku lomas pata altarespi, chaypi paykunapaj jaywanasta qonankupaj.

³³ Señorta manchachikoj kanku, chaywampis lantisninkuta yupaychaj kanku, imaynatachus llajtankupi ruwaj kanku ajinallatapuni chaypipis ruwaspa.

³⁴ Unay ruwaj kanku jinata ruwashallankupuni kunankamapis. Señorta mana yupaychankuchu, nitaj waqaychankuchu nisqasninta, kamachisqasninta, nitaj leyesninman jinachu, nitaj yachachisqasninman jinachu. Chaykunata Señorqa Jacobpa mirayninman qoporqa; paytataj Israel nispa suticharqa.

³⁵ Paykunawan Señorqa uj tratota ruwarqa, kamacherqataj: Ama waj dioskunata yupaychankichejchu, nitaj jatunchankichejchu, nitaj uywa ñak'asqasta jaywaspa sirvinkichejchu.

³⁶ Manachayqa Egipto jallp'amanta tukuy atiyninwan orqhomusorqachej chayllata manchachikunkichej, payllamantaj jaywanastapis qonkichej.

³⁷ Chay jawaqa waqaychankichejpuni qelqaspa qorqaykichej chay nisqasniyta, leyesniyta, yachachisqasniyta, kamachisqasniytawan; amataj waj dioskunata yupaychankichejchu.

³⁸ Qankunawan trato ruwasqayta ama qonqapunkichejchu, amataj waj dioskunatapis yupaychankichejchu.

³⁹ Astawampis Señorniykichej Diosllata manchachikunkichej, paytaj tukuynin enemigosniykichejmanta librasonqachej.

⁴⁰ Paykunatajrí manapuni kasorqankuchu, astawampis imaynachus ñaupa ususninkuman jinallatapuni ruwarqanku.

⁴¹ Chay runasqa Señorta manchachikoj kanku, chanta lantisninkutapis yupaychallajtaj kanku. Wawasninku, allchhisninkupis, imaynatachus tatasninku ruwaj kanku, ajinallatapuni kunankamapis ruwakushanku.