2 Reyes 16 - Qheshwa Biblia DC

Judapi Acazpa kamachisqan

¹ Remaliaspa wawan Peka Israelpi chunka qanchisniyoj watataña kamachishajtin, Jotampa wawan Acazqa Judapi kamachiyta qallarerqa.

² Acazqa kamachiyta qallarishaspa iskay chunka watayoj karqa. Jerusalempitaj chunka sojtayoj watataña kamacherqa; manataj ñaupa tatan David jina cheqantachu ruwarqa Señorpa ñaupaqempeqa.

³ Israelmanta reyespa ñankunasninkupitaj payqa purerqa, kikin wawastapis ninapi q'olacherqa, imaynatachus chay waj llajtayoj runas millaykunata ruwaj kanku ajinata. Chaykunata Señorqa Israel jallp'amanta qharqorqa.

⁴ Ajinallatataj uywa ñak'asqastapis jaywaj, inciensotapis chay lomas patapi altarespi q'osñichej, jatuchaj thansa sach'a urapi ima.

⁵ Chantaqa Siriamanta rey Rezin, Remaliaspa wawan Israelmanta rey Pekawan, Jerusalempa contrampi maqanakoj llojserqanku. Acaztataj muyuykorqanku, manataj llajtataqa jap'iyta aterqankuchu.

⁶ Chay p'unchaykunallapitaj Edommanta reyes Elatta jap'ikaporqa, Edommantaj kutichiporqa. Chaymanta Judiosta qharqospa Edommanta kajkunaqa kunankama chaypi kakushanku.

⁷ Chanta Acazqa Asiriamanta rey Tiglat-pileserman kachasninta kacharqa: Noqaqa kamachiyki, wawaykitaj kani; wicharimuspa libraway ari, Siriamanta reypa makinmanta, Israelmanta reypa makinmantawan. Paykunaqa noqaqa maqawaj jamushanku.

⁸ Acazqa Señorpa wasinmanta reypa wasinmantawan tukuynin qolqeta, qoritawan Asiriamanta reyman uj t'inkata apacherqa.

⁹ Asiriamanta reytaj paytaqa uyarerqa. Damascoj contrampi llojsimuspataj chay llajtata jap'erqa, presostataj aparqa Kir llajtakama. Rezintataj wañucherqa.

¹⁰ Chaymantaqa Israelmanta rey Acazqa Asiriamanta rey Tiglat-pileserwan Damascoman tinkumoj rerqa. Acaztaj Damascopi uj altarta rikuspa, sacerdote Uriasman apachimorqa, kikin rijch'ay ruwasqata, mashkhachus kasqantawan apachimorqa.

¹¹ Sacerdote Uriastaj kikin altarta ruwarqa; imaraykuchus rey Acazqa Damascomanta kikisitunta apachimorqa, Israelpa reynin Damascomanta kutimunankama.

¹² Reyqa Damascomanta chayamuspa chay altarta ruwasqata rikuspa chay altarpi uywa ñak'asqata jaywarqa.

¹³ Chaypitaj jaywasqanta q'olacherqa, ch'aki mikhuy jaywasqanta, vinotataj chay pataman jich'aykorqa, allinyakuy jaywasqaj yawarnintawan ch'ajchuykorqa.

¹⁴ Acazqa Señorpa wasimpa ñaupaqempi broncemanta altarta qayllaykuchimorqa wasej ñaupaqenman. Churarqataj Señorpa wasinwan chay altarwan kasharqa chay chaupiman pata ladonejman.

¹⁵ Acaztaj sacerdote Uriasman kamacherqa: Jatun kaj altarpi q'olachinki tutamanta jaywasqata, tarden ch'aki mikhuy jaywasqata, reypa q'olachinanta, ch'aki mikhuy jaywasqanta, ajinallatataj tukuynin runaspa q'olachinanta, ch'aki mikhuy jaywasqanta, vino jaywasqankutawan. Chanta nillarqataj ch'ajchunanta: Q'olachinapaj uywaspa yawarninta, ñak'asqa jaywanapaj uywaspa yawarnintawan. Broncemanta altartaqa saqellankichej chaypi Señorta noqa tapunaypaj, nispa.

¹⁶ Sacerdote Uriastaj imaynatachus rey Acazpa kamachisqanman jina ruwarqa.

¹⁷ Rey Acazqa yaku churanaspa marcosninta, quejosninta k'uturarqa, yaku churanasta uraykucherqa, jinaspataj chay jatun kaj yaku churanata uraykucherqa, broncemanta wakas patapi sayasqa karqa chayta. Pampapitaj loza rumis pataman churaykorqa.

¹⁸ Ajinallatataj chay samakuna p'unchaypaj Señorpa wasimpa ñaupaqempi karqa chay corredorta phaskacherqa, jawamanta rey yaykunampaj punku karqa chaytapis phaskacherqa. Chay jinata ruwarqa Asiria reyta kusichinampaj.

¹⁹ Acazpa tukuy ima ruwasqasnimpiwan, manachu Judamanta reyespa ruwasqasninku librollapitaj qelqasqa kashan?

²⁰ Rey Acaz wañupojtintaj ñaupa tatasnimpi p'ampakunankupi Davidpa llajtampi p'amparqanku. Paypa cuentampitaj wawan Ezequías kamacherqa.