2 Reyes 14 - Qheshwa Biblia DC

Amasiasqa Judapi kamachin

¹ Joacazpa wawan rey Joás iskay watataña kamachishajtin, Joaspa wawan Amasías Judapi kamachiyta qallarerqa.

² Kamamachiyta qallarishaspataj iskay chunka phishqayoj watayoj karqa. Jerusalempitaj iskay chunka isq'onniyoj watata kamacherqa, paypa mamantaj Jerusalenmanta Joadán karqa.

³ Paytaj Señorpa ñaupaqempi cheqan kajta ruwarqa, manapis ñaupa tatan jinapunichu, imaynatachus tatan Joás ruwarqa ajinallatataj paypis ruwarqa.

⁴ Lomas patapi altarestataj mana chinkacherqachu, runasqa chaykunapi uywa ñak'asqasta jaywallajpuni kanku, inciensotawan q'osñichispa.

⁵ Paypa reinon sumaj sayasqaña kajtintaj, kurajkunas tatanta wañuchejkunata, tukuyninta wañuracherqa.

⁶ Tatanta wañuchejkunaj wawasninta mana wañucherqachu, imaraykuchus Moisespa leynimpi qelqasqa kashan chayman jina, maypichus Señorqa kamacherqa: Tatasninkuta mana wawasnimpa juchasninraykoqa wañuchinkichejchu, mantaj wawastapis tatasninkoj juchasninmanta wañuchinkichejchu, aswampis sapa runa juchasninmanta wañonqa.

⁷ Amasiasllataj edomitastapis chunka waranqata kachi vallepi wañuracherqa Cela llajtatataj maqanakupi jap'ikaporqa. Suticharqataj Jocteelta kunankama.

⁸ Chanta Amasiasqa kacha kamachisninta Israelpa reyninman kacharqa Jehojpa allchhin Joacazpa wawan Joasman. Ajinatataj nicherqa: Jamuy, qanchus noqachus astawan atisun chayta yachasun.

⁹ Israelmanta rey Joastaj Amasiasman willajta kamachisninta kacharqa kay jina kutichiywan: Juch'uy khiskarara sach'a, Libanopi kashan chayqa, kacharqa Libanopi kashan chay jatun Cedro sach'aman, kay jinata nejta: Warmi wawaykita qhari wawaypa warmin kanampaj qopuy. Libanopi kajkuna, monte animalestaj pasashaspa juch'uy qhewaylluta sarurparerqanku.

¹⁰ Yachani edomitasta atipasqaykita, chaytaj sonqoykipi runaykachachishasunki. Chaywan kusikuy ari, jinapis wasillaykipi qhepakuy. Imapajtaj sajra kajta mask'akunki, qampajwan Judá llajtaykipajwanri?, nispa.

¹¹ Judamanta rey Amasiasqa mana kasuta ruwarqachu. Chayrayku Israelpa reynin Joasqa llojsimorqa; maqanakorqankutaj Bet-semes nisqa Judá jallp'api.

¹² Chaypi israelitaswan Judá atipachikorqa, chantá ayqekorqanku sapa ujninku wasisninkumankama.

¹³ Ocoziaspa allchhinta, Joaspa wawan Judamanta rey Amasiasta, Israelmanta rey Joasqa Bet-semespi presochaykorqa. Jerusalenman jamuspataj, chaypi llajta perqata pachaj pusaj chunkayoj metrosta q'asarparerqa, Efraimpa punkunmanta esquina nisqa punkukama.

¹⁴ Chanta jap'ikaporqa tukuynin qorita, qolqeta, Señorpa wasimpi tukuy kajta, reypa wasimpi kajkunatawan. Chanta wakin presosta jap'iraspa Samariaman kutiporqa.

¹⁵ Joaspa tukuy ima waj ruwasqasnin, atiyniyoj kasqan, chhika waputapuni Judamanta rey Amasiaswan maqanakusqampiwan, manachu Israelmanta reyespa ruwasqasninku libropi qelqasqa kashan?

¹⁶ Joás wañupojtintaj Israelmanta reyespa p'ampakunankupi Samariapi p'amparqanku. Paypa cuentampitaj wawan Jeroboam kamacherqa.

¹⁷ Joacazpa wawan Joás Israelpa reynin wañupusqanmanta, Judamanta rey Joaspa wawan Amasiasqa chunka phishqayoj watatawanraj kausarqa.

¹⁸ Amasiaspa waj ruwasqasnenqa, manachu Judamanta reyespa ruwasqasninku librollapitaj qelqasqa kashan?

¹⁹ Jerusalempitaj contrampi oqharikorqanku, payqa Laquisman ayqekorqa. Qhatiykorqankutaj Laquiskama, jaqaypitaj payataqa wañucherqanku.

²⁰ Jaqaymantataj caballospi Jerusalenman apamuspa Davidpa llajtampi p'amparqanku.

²¹ Chanta Judamanta tukuynin runasqa Amasiaspa wawan Azariasta kamachejninkupaj churarqanku. Azariasqa chunka sojtayoj watayojllaraj karqa. Paytaj tatampa cuentampi kamacherqa.

²² Azariastaj tatampa wañupusqanmanta, Elatta Jallch'achispa Judaman kutichikamporqa.

Iskay kaj Jeroboamqa Israelpi kamachin

²³ Joaspa wawan Amasías Judamanta rey chunka kinsayoj watataña kamachishajtin, Joaspa wawan Jeroboam Samariapi Israelta kamachiyta qallarerqa. Kamacherqataj tawa chunka ujniyoj watata.

²⁴ Señorpa ñaupaqempitaj sajratapuni ruwarqa, Nabadpa wawan Jeroboampa juchasninmanta mana t'aqakuspa, imaswanchus Israelta juchallicherqa chaykunamanta.

²⁵ Paytaj Israelpa mojonesninta watejmanta churarqa Hamatman yaykunamanta Arabá mar qochanejkama, Israelpa Señor Diosnimpa palabranman jina, mayqentachus parlarqa Gat-hefermanta Amitaejpa wawan profeta Jonasnejta.

²⁶ Imaraykuchus Señorqa Israelpa sinch'i llakiyninta rikorqa; manataj pipis kamachismanta, mana kamachismantapis Israeltaqa yanapaj karqachu.

²⁷ Manataj Señorqa israelitasta kay jallp'asmanta chinkachiyta yuyarqachu. Chayrayku Señorqa librarqa Joaspa wawan Jeroboamnejta.

²⁸ Jeroboampa tukuy ima ruwasqasnin, waj ruwasqasnimpiwan, wapupuni kasqan, chay chhikata maqanakusqan, imaynatachus Israelman kutichiporqa, Damascota, Hamattawan ima, mayqenkunatachus Judá jap'erqa, chaykunawan, manachu Israelmanta reyespa ruwasqasninku libropi qelqasqa kashan?

²⁹ Jeroboam wañupojtintaj Israelmanta reyespa p'ampakunasninkupi p'amparqanku. Cuentampitaj wawan Zacarías kamacherqa.