2 Reyes 12 - Qheshwa Biblia DC

Judapi Joaspa kamachisqan

¹ Israelpi Jehu qanchis watataña kamachishajtin, Joasqa qanchis watayoj kaspa, kamachiyta qallarerqa. Jerusalempitaj tawa chunka watata kamacherqa. Paypa mamantaj Beersebamanta Sibia nisqa karqa.

² Sacerdote Joiadaj tukuy tiempo yachachisqampi, Joasta Señorpa ñaupaqempi maychus cheqan kajtapuni ruwarqa.

³ Chay tukuywampis lomas patapi altaresqa mana chinkachisqaschu karqanku. Runasqa chaykunaspi uywa ñak'asqasta jaywallajpuni, inciensotawan q'osñichispa.

⁴ Sacerdotesmantaj Joasqa nerqa: Señorman tukuy jaywasqa qolqeta, Señorpa wasinman apamuna kajta, sapa uj runaqa paymanta paganan kajta imaynachus ñapis nisqaña chaykunata, pikunachus tukuy sonqonkumanta Señorpa wasinman apamunku chaykunatawan.

⁵ Sacerdotesqa jap'iychej sapa uj wauqesniykichejmanta. Chaykunawantaj Diospa wasinta jallch'achiychej.

⁶ Sacerdotestaj iskay chunka kinsayoj watata kamachinankama, manarajpuni Diospa wasinta jallch'achisqankuchu.

⁷ Chaymantaqa Joás kuraj sacerdote Joiadata, waj sacerdotestawan wajyacherqa, nerqataj: Imaraykutaj Diospa wasinta kunankama mana jallch'achinkichejchuri? Kunanqa amaña astawan kausaqesniykichejmanta qolqeta jap'iychejñachu, aswampis pikunachus Señorpa wasinta jallch'ashanku chaykunaman qoychej.

⁸ Sacerdotestaj runasmanta manaña astawan qolqetaqa jap'iyta munarqankuñachu, nitaj Diospa wasinta jallch'achiytapis.

⁹ Kuraj sacerdote Joiadataj uj cajata jap'ispa, tapanta jusk'uspataj Diospa wasin punku yaykuyman altarpa qayllanman paña ladonman churarqa. Chaypitaj sacerdotes punkuta qhawajkunaqa chayman tukuynin qolqe apamusqankuta Señorpa wasinman churarqanku.

¹⁰ Maypachachus cajapi ashkha qolqetaña rikuspa, reypa secretarion, kuraj sacerdotewan jamuspa, mashkhachus Señorpa wasimpi qolqe karqa chayta yupaykuspataj waqaychaj kanku.

¹¹ Pikunachus Diospa wasinta jallch'ajkunaman qolqetaqa ashkhata jaywarqanku, Señorpa wasinta qhawajkunamanwan. Paykunataj pagaj kanku carpinterosman, Señorpa wasinta jallch'ajkunamanwan.

¹² Chanta albañilesman, rumista ch'eqojkunaman ima, k'aspista, ch'eqosqa rumistawan rantinankupaj, chaywan Señorpa wasinta jallch'achinankupaj, waj tukuy imaspajwan.

¹³ Chay tukuynin qolqesta Señorpa wasinman apamusqankumantaqa, mana ruwarqankuchu qolqe vasosta, espermaj pabilosninta k'utunasta, jatuchaj vasosta, trompetastawan. Manataj qorimanta, qolqemantapis waj imastawan ruwarqankuchu Señorpa wasimpajqa.

^14-15 Chay qolqestaqa Señorpa wasinta ruwachejkunaman qorqanku, chaywan Diospa wasinta jallch'achinankupaj. Chay qolqestaqa apaykachajkunamanta mana mañajchu kanku cuentataqa, mashkhatachus llank'ajkunaman qosqankumantaqa; imaraykuchus paykunaqa cheqan sonqowan apaykachaj kanku chay qolqestaqa.

¹⁶ Juchamanta apaj kanku chay qolqeta, pantasqankumanta chay qolqetawan Señorpa wasinmanqa mana apajchu kanku, chaykunaqa sacerdotespata karqa.

¹⁷ Chanta Siriamanta rey Hazaelqa Gatpa contrampi maqanakoj jamorqa, atipaykorqataj. Chay jawataj Hazaelqa Jerusalempa contrampiñataj maqanakoj llojsisaj nisharqa.

¹⁸ Judamanta rey Joasqa ajina kajtin ñaupa tatasnin Judamanta reyes, Josafat, Joram, Ocoziaspiwan Diosman qosqankuta qoristawan, paypa jaywasqasnintawan ima, Señorpa wasimpi waqaychasqas karqanku, reypa wasimpiwan chay tukuynin qoritawan Siriamanta rey Hazaelman apachiporqa. Ajinamanta Hazaelqa Jerusalenmanta kutiporqa.

¹⁹ Joaspa tukuy ima ruwasqasnin, waj ruwasqasnimpiwan, manachu Judamanta reyespa ruwasqasninku chay librollapitaj qelqasqa kashan?

²⁰ Maypachachus Joás Silaman uraykamushajtin, paypa kamachisnin paypa contrampi oqharikuspa Milo wasipi wañucherqanku.

²¹ Simeatpa wawan Josacar, Somerpa wawan Jozabadwan paytaqa wañucherqanku. P'amparqankutaj ñaupa tatan Davidpa llajtampi. Paypa cuentampitaj wawan Amasías kamacherqa.