2 Reyes 11 - Qheshwa Biblia DC

Ataliaqa reinota jap'ikapun

¹ Ocoziaspa maman Ataliaqa, wawanta wañusqata rikuspa oqharikuytawan reypa tukuynin ayllunta wañuracherqa.

² Rey Jorampa warmi wawan Josabaqa, wauqen Ocoziaspa wawan Joasta aysarispa orqhoytawan puñunapaj cama jallch'ana wasiman pakaykamorqa, uj uywajnin warmitawan, reypa wawasninta Atalía wañurachishajtin. Ajinamanta Joasqa mana wañorqachu.

³ Chay uywajnin warmiwan Joasqa Señorpa wasimpi sojta watata pakasqa karqa. Chaykamataj Ataliaqa Israelpi kamacherqa.

⁴ Qanchis kaj watapitaj Joiadaqa pachaj soldadosta kamachejkunata, palaciota qhawajkunatawan, Señorpa wasinman wajyachispa, chaypi juramentota ruwaspa, paykunawan tratota ruwarqa. Chaymantataj rey Ocoziaspa wawan Joasta rikhurichimorqanku.

⁵ Chantataj kay jinata kamacherqanku: Kinsa kaj t'aqa reypa wasinta qhawankichej samakuna p'unchaypi.

⁶ Uj kinsa t'aqa kajtaj ura lado punku nisqata qhawankichej, uj kinsa t'aqa kajtaj soldadospa tiyanan wasi wasa ladota qhawankichej. Ajinapi wasita mana qhawankichej.

⁷ Qankunamanta iskay t'aqa samakuna p'unchaypi llojsejkuna Señorpa wasinta reypa ladompi qhawankichej.

⁸ Sapa ujniykichejtaj makisniykichejpi armas oqharisqas reypa muyuynimpi kankichej. Pillapis filasman yaykojqa wañuchun, llojsichumpis yaykuchumpis qankunaqa paywampuni kankichej.

⁹ Soldadospa kurajkunasnintaj sacerdote Joiadaj kamachisqanman jina ruwarqanku. Sapa ujtaj runasninta kamacherqa, samakuna p'unchaypi qhawaj yaykojkuna, llojsejkunapiwan, sacerdote Joiadaj ñaupaqenman jamorqanku.

¹⁰ Soldadospa kurajkunasninmantaj sacerdote Joiadaqa paykunaj makisninman jaywarqa Davidpa escudosnintawan ima. Chaykunaqa Señorpa wasimpipuni kasharqanku.

¹¹ Qhawajkunataj sinrulla kasharqanku, sapa ujninkutaj makisninkupi armas jap'irisqas, Señorpa wasinmanta paña ladonmanta lloq'e ladonnej chaykama, altar qayllanejpi reypa ñaupaqempi.

¹² Chanta sacerdote Joidaqa reypa wawan Joasta orqhomuytawan umanman pilluta churarqa, ley librotataj jaywarqa. Aceitewantaj jawiykorqa rey kanampaj. Chaymantataj tukuyninku makisninkuta t'ajllakuspa nerqanku: Kausachun reyqa, nispa.

¹³ Ataliataj chay jina ch'ajwata uyariytawan, runas Señorpa wasimpi tantasqas karqanku chayman rerqa.

¹⁴ Chaypitaj qhawarispa reyta rikorqa, sayantan qayllapi sayashajta, imaynatachus paykuna ruwayta yachasqankuman jina. Paypa qayllampitaj kasharqanku kurajkunawan, trompitasta tocajkunawan. Chanta tukuy runastaj may kusisqas kasharqanku trompitasta waqachispa. Chanta Ataliataj sinch'ita qhaparispa p'achasninta llik'ikorqa: Kayqa wasanchay, wasanchay, nispa.

¹⁵ Sacerdote Joiadataj soldadosninta kamacherqa: Templo wasi ukhumanta jawaman orqhomuychej, pichus payman kutikojninta cuchillowan wañuchiychej. Imaraykuchus sacerdoteqa kamachisqa ama Señorpa wasin ukhupi wañuchinankuta.

¹⁶ Jap'ispataj orqhomorqanku reypa wasinman caballoswan yaykuna kaj punkunta, chaypitaj wañucherqanku.

¹⁷ Chaymantataj Joiadaqa uj tratota ruwarqa Señorwan, llajtawan ima Señorpa llajtan kanankupaj; ajinallatataj ruwarqanku reywan, llajtawampis.

¹⁸ Tukuynin runastaj Baalpa wasinman yaykuspa urmaracherqanku; ajinallatataj altaresninta lantesnintapis t'unararqanku, Baalpa sacerdoten Matantapis altaresnimpa ñaupaqempi wañucherqanku. Joiada sacerdotetaj Señorpa wasinman qhawajkunata churarqa.

¹⁹ Chay jawataj soldadospa kurajkunasninta jap'ispa palaciota qhawajkunata, tukuynin runastawan ima, Señorpa wasinmantapacha tukuyninku reyta wasinkama riyserqanku, reyta soldados qhawaj kanku chay ñannejtapuni jamuspa. Joastaj reyespa tiyakunanman tiyaykukorqa.

²⁰ Tukuynin runastaj maytapuni kusikorqanku. Chaymantaraj llajtapeqa samarikuy karqa, Atalía reypa wasin chaynejpi wañuchisqa kasqanmanta.

²¹ Joastaj kamachiyta qallarishaspa qanchis watayojllaraj karqa.