2 Reyes 10 - Qheshwa Biblia DC

Jehoqa Acabpa mirayninta tukuchin

^1-3 Samariapi Acabpa familianmanta kajkuna qanchis chunka karqanku. Jehutaj cartasta qelqaspa apaykucherqa, chay llajtapi kamachejkunaman, kurajkunaman, Acabpa wawasninta qhawajkunasninman ima, kay jinata nichispa: Kay cartas chayamojtinkama, wiraqochiykichej Acabpa wawasninta qhawajkuna, tukuy kurajkunasnin: Carretasmanta, caballospi purejkunamanta sumaj jark'achisqa, armasmantawan tantaykuspa, wiraqochiykichejpa wawasninmanta ajllaychej aswan sumaj kajta, cheqan yuyayniyojtataj, tatampa trononmantaj tiyaykuchiychej. Wiraqochiykichejpa ayllunraykutaj maqanakuychej.

⁴ Paykunataj maytapuni mancharikorqanku, nerqankutaj: Paytaqa iskay reykunasmantapis mana atipayta aterqankuchu. Imaraykutaj paywan noqanchej maqanakusunmanri?

⁵ Acabpa wasinta qhawaj, llajtata kamachej, kurajkunaswan, wawasta qhawajkunapiwan, Jehojpaman kacharqanku, nispa. Noqaykoqa qampa kamachisniyki kayku, imatachá kamachiwasqayku chaytapuni ruwasqayku; manataj pitapis reyniykupaj wajta churaykumanchu, ruwallay imatachá munanki chayta.

⁶ Paytaj ujtawan cartata qelqaspa apaykuchillarqataj, iskay kuti kajta: Sichus noqajta kankichej chayqa, wiraqochiykichejpa qhari wawasnimpa umasninta jap'ispa q'aya kay horasta jamuwaychej Jezreelman. Paypa qanchis chunka familiasnintaj llajtamanta kurajkunaswan kasharqanku, pikunachus uywasharqanku chaykunawan.

⁷ Paykunaman chay cartas chayajtinkamataj, reypa familiasninmanta qanchis chunka qharista jap'ispa wañucherqanku. Chaymantataj umasninkuta canastasman churaspa Jezreelman apacherqanku.

⁸ Uj kachasqataj Jehuman kay jinata willarqa: Reypa familiasnimpa umasninta kayman chayachimunku. Paytaj nerqa: Iskayman t'aqasqata churaychej llajtaman yaykuna chay punkuman q'aya paqarinkama.

⁹ Q'ayantin paqarintaj Jehoqa llojsiytawan sayarispa tukuynin runasman nerqa: Qankunaqa mana juchayojchu kankichej, noqa wiraqochiypa contrampi oqharikuspa wañucherqani. Chanta kay tukuytaqa, pitaj wañuchinri?

¹⁰ Yachanaykichejpaj, Señor imaynatachus Acabpa mirayninmanta parlasqanqa, mana imapis mana junt'akuspaqa kanqachu, kamachin Eliasnejta parlasqanta Señorqa junt'ampuni.

¹¹ Jehutaj Jezreelpi Acabpa ayllunmanta qhepakojkunata tukuyninta wañuracherqa, chanta kurajkunasninta, kausaqesninta, sacerdotesnintawan ima mana ujniyojta.

¹² Chaymantataj jatarikuytawan Samariaman riporqa; ñampitaj michejkunaj millma ruthunanku wasiman chayarqa.

¹³ Judamanta rey Ocoziaspa wauqesninta chaypi tarerqa, nerqataj: Pikunataj qankuna kankichejri?, nispa. Paykunataj kuticherqanku: Noqaykoqa Ocoziaspa wauqesnin kayku, jamorqaykutaj reypa familiasninta napaykoj, reinaj wawasnintawan ima.

¹⁴ Jehutaj nerqa: Kausashajta jap'iraychej. Ajinata kausashajta jap'iraspa, millma ruthuna wasi chaynejpi yaku pozo qayllapi tukuyninkuta qhorurparerqanku, tawa chunka iskayniyoj qharista, mana ujniyojta.

¹⁵ Chaymanta ripuspataj Recabpa wawan Jonadabwan tinkukorqa. Chanta napaykuytawantaj nerqa: Qampa sonqoyki noqapaj allinchu, noqaj sonqoy qampaj allin kashan, ajinachu? Jonadabtaj nerqa: Arí, ajinapuni kashan. Ajina kajtenqa makiykita jaywaway. Jonadabtaj makinta jaywarqa. Chanta chay rato Jehoqa carretanman wicharicherqa.

¹⁶ Nerqataj: Noqawan jaku; rikunkitaj imaynatachus Señormanta noqa sientesqayta. Jinaspataj carretampi aparqa.

¹⁷ Jehutaj Samariaman chayaytawan, pikunachus Acabpa familianmanta kajkunata, tukuyninkutapuni wañurachispa tukucherqa, imaynatachus Señorqa Elías profetannejta sut'incharqa chayman jina.

Jehú lanti yupaychanata chinkachin

¹⁸ Chanta Jehoqa tukuy llajtantinta tantaykuchispa nerqa: Acabqa pisillata Baaltaqa yupaycharqa. Kunan Jehoqa astawan yupaychanqa.

¹⁹ Kunantaj Baalpa tukuynin profetasninta, payta yupaychajkunata, tukuynin sacerdotestawan ima wajyapuwaychej, amataj ujpis qhepakuchunkuchu. Imaraykuchus Baalpajqa ashkha jaywanata qonay tiyan, pichus mana jamojqa mana kausanqachu. Jehoqa chayta nerqa jinamanta ch'aukiyanampaj. Ajinamanta Baalpa tukuynin yupaychajkunasninta wañurachinampaj.

²⁰ Jehoqa: nillarqataj: Kunanqa Baalman uj diata t'aqaychej jatun fiestata ruwanapaj. Paykunataj ajinata tantacherqanku.

²¹ Chay jawataj Jehoqa tukuynin Israel jallp'antinta wajyachimojta kacharqa. Baalpa kamachisnintaj tukuyninku mana ujniyoj tantakamorqanku. Chanta Baalpa wasinman junt'aykorqanku k'uchuy k'uchu.

²² Chantataj pichus p'achasta waqaychajta nerqa: Tukuynin Baalpa kamachisnimpaj p'achasta orqhomuy, nispa. Paytaj chay p'achasta orqhomorqa.

²³ Chanta Jehutaj Recabpa wawan Jonadabwan Baalpa wasinman yaykorqa. Baalpa kamachisninmantaj nerqa: Allinta qhawariychej, kaypeqa mana ujpis Señorpa kamachisninmanta kasqanta, tukuyninkupis Baalpa kamachisnillan kananku tiyan, nispa.

²⁴ Chanta paykuna Baalman uywa wañuchisqasta, q'olachinastawan jaywajtinku, Jehoqa ñapis jawaman pusaj chunka runastaña churasqa, paykunatataj nerqa: Pillapis kay runasta ayqechenqa chayqa, pikunatachus noqa makisniykichejmanña churani, pay kausayninwan chay ujpa kausayninmanta paganqa.

²⁵ Chanta paykuna q'olachinasninkuta jaywayta tukojtinkuña Jehoqa kamacherqa, chay tukuynin qhawajkunasninta, kurajkunasnintawan: Yaykuspa wañurachiychej, ama ujpis ayqekuchunchu. Paykunataj espadawan wañuracherqanku, pampapi mast'allata saqerqanku. Yaykorqankutaj Baalpa wasinman, llimphu nisqa cheqakama.

²⁶ Wasimanta Baalpa lantisninta orqhomuspa, ninawan enqhaykorqanku.

²⁷ Chanta Baalpa lantinta p'akerqanku, wasintapis urmacherqanku. Chaytataj jisp'ana cheqaman tukucherqanku, kunankamataj jina kashan.

²⁸ Ajinata Jehoqa Israelpi chinkacherqa Baaltaqa.

²⁹ Chay tukuywampis, Jehoqa manataj Nabatpa wawan Jeroboampaj juchasninmanta t'aqakorqachu, imaswanchus Israelta juchallicherqa chaykunamanta. Ajinata saqellarqa qorimanta waka uñasta Betelpi, Dampi ima.

³⁰ Jehuman Señorqa nerqa: Noqaj ñaupaqeypi allinta ruwasqaykirayku, imaynatachus noqaj yuyasqayman jina, Acabpa aylluntapis chinkachisqaykimanta, Israelpa tronompi wawasniykeqa tawa allchhikama kamachenqanku.

³¹ Chay tukuywampis Jehoqa Israelpa Señor Diosnimpa ñaupaqempi mana tukuy sonqochu purerqa, Jeroboampa juchasninmanta mana t'aqakorqachu, imaswanchus Israelta juchallicherqa chaykunamanta.

^32-33 Chay p'unchaykunapi Señorqa qallarerqa Israelpa jallp'asninta tukuy cantosninta qhechuchiyta. Hazael reyqa Israelta tukuynin mojonesnimpi atipaykorqa: Inti llojsimuynejman, Jordán mayumanta, tukuy Galaadta, Gadta, Rubenta, Manasesta, Aroer cheqata, Arnón wayq'omantapacha, Galaadta, Basantawan ima.

³⁴ Jehoj waj ruwasqasnin, tukuy ima ruwasqasnimpiwan, chay chhika wapu kasqan ima, manachu Israelpa reyesnimpa ruwasqasninku libropi qelqasqa kashan?

³⁵ Jehú wañupojtintaj Samariapi paytaqa p'amparqanku. Paypa cuentampitaj wawan Joacaz kamacherqa.

³⁶ Jehoqa Israelta Samariapi kamacherqa iskay chunka pusajniyoj watasta.