2 Pedro 2 - Qheshwa Biblia DC

Llulla yachachejkuna

¹ Kallarqataj llulla profetas israelitas ukhupi. ajinallatataj qankuna ukhupipis kanqanku llulla yachachejkuna. Paykuna pakayllamanta, chinkayman apaj yachachiykunata apaykamonqanku. Paykunata salvaj Señortapis qhesachanqanku. Chayrayku, ujllata paykunaj patanman chinkachej jatun jasut'i chayamonqa.

² Ashkhastaj paykunawan renqanku aychaj millay munayninta ruwaspa. Paykunanejta runas rimanqanku cheqan ñampa contranta.

³ Qolqeta munapayaspataj qankunamanta qhatuta ruwanku, llullata parlaspa; paykunapajtaj jasut'eqa unaymantaña mana qonqasqachu kashan, chinkayninkupis mana puñushanchu.

⁴ Sichus Dios, angelespa juchasninta mana pampacharqachu chayqa, astawan ukhu pachaman wijch'uykuspa, laqhayajpi presocharqa, juicio p'unchaypaj waqaychasqas kanankupaj.

⁵ Ñaupa runaspa juchasnintachus manallataj pampacharqachu chayqa, waqaycharqa Noeta, cheqan kajta willajta, waj qanchis runastawan. Diosta mana yupaychaj runaspajtaj, jatun parata apachimorqa.

⁶ Jinallatataj Sodomapi, Gomorrapi tiyakoj runasta juchacharqa, ninawantaj ruphacherqa ushphayanankukama; qhepa p'unchaykunapi, Diosta mana yupaychaj runas yachanankupaj chayta ruwarqa.

⁷ Cheqanta kausakoj Lottarí ayqecherqa; payqa anchata llakikoj, chay juchasapaspa sajra kausayninkumanta.

⁸ Lotqa paykuna ukhupi tiyakuspa, cheqan almanta llakichej sapa p'unchay, juchasapa runaspa sajra ruwasqasninkuta rikuspa, uyarispataj.

⁹ Ajinata Señorqa, misk'aymanta jark'ayta yachan, payta yupaychajkunata, juchasapastataj qhepachin juicio p'unchaypi jasut'isqas kanankupaj.

¹⁰ Astawantaj ñak'arichenqa pikunachus aychaj qhepanta, munapayaypi, millay kausaypitaj purispa, Señorta mana kasunkuchu, chaykunata. Mana manchayniyojkuna, mana kasukojkunataj, jatun atiykunapaj sajrata rimayta mana manchachikunkuchu.

¹¹ Angelkunapis aswan kallpayoj, atiyniyojtaj kaspapis, mana sajrata rimankuchu chay jatun atiykunapaj Señorpa ñaupaqempi.

¹² Kay runastaj mana yuyayniyoj, animales jina mana yachaspalla sajrata rimanku. Paykunaqa presochasqas, tukuchisqastaj kanankupaj nacikorqanku. Ajinamanta wañonqanku kikin animales jina.

¹³ Chay t'inkatataj jap'inku mana cheqan kajta ruwasqankumanta. Paykunaqa misk'ichikunku, sapa p'unchaypa kusiyninwan. Chaykunaqa millay, ch'ichitaj kanku. Qankunawan khuska mikhushaspa, pantasqa ruwasqasninkupi kusikunku.

¹⁴ Ñawisninkoqa qhenchachakuywan junt'a kanku, juchallikuywantaj mana sajsakunkuchu; pisi kallpachasqa runasta ch'aukiyaspa juchallichinku, sonqonkupis tukuy imata munapayayman yachasqa, maldicisqastaj kanku.

¹⁵ Cheqan ñanta saqespa, Balaampa pantasqa ñanninta rishanku; paytaj Beorpa wawan karqa; sajra kajta ruwaspataj qolqe t'inkata jap'iyta munarqa.

¹⁶ Juchanraykutaj k'amichikorqa mana parlaj chajnana china burrowan. Chay burroqa runa jina parlaspa mana yuyayniyoj profetata yuyayninman kuticherqa.

¹⁷ Kay runakunataj mana yakuyoj pujyu jina kanku, sinch'i para wayraj apaykachasqan phuyu jinataj. Paykunapajtaj wakichisqa kashan wiñaypaj laqhayaypa tutayaynin.

¹⁸ Chay runasqa, jatunmanta qhasi mana kajta parlaspa, wajkunata aychaj millay munayninman, tukuy laya runasman ima pusanku pikunachus cheqamanta ayqerqankuña, chay pantaypi kausajkunamanta.

¹⁹ Kacharisqas kankichej ninku, paykunataj millay kausaypa kamachisnin kanku. Atipachikojqa, atipajpata kamachin kapun.

²⁰ Cheqamanta, pikunachus Salvaj Señor Jesucristota rejsispa, kay pachapi millay kausaymanta ayqespaña, watejmanta chay juchasman kutiykuspa urman chayqa, paykunaj qhepa kausaynenqa, aswan mana allin ñaupaj kausayninmanta nisqaqa kanqa.

²¹ Paykunapajqa aswan allin kanman karqa cheqan ñanta mana rejsinankoqa; chayta rejsispaña Diospa qosqan llimphu kamachinmanta qhepaman kutiripunankumantaqa.

²² Cheqamanta paykunapeqa runakunaj nisqanku allinta junt'akun: Alqoqa ajtusqanta mikhuykakapullantaj; mayllasqa khuchipis watejmanta t'urupi sunt'in.