2 Juan 1 - Qheshwa Biblia DC

Cheqa munakuymanta

¹ Noqa kuraj runa escribimuni ajllasqa mamaman, wawasninman ima. Cheqamanta paykunata munakuni. Mana noqallachu munakuni, manachayqa, cheqa kajta tukuy rejsejkunapis munakullankutaj.

² Qankunata munakuykichej, sonqonchejpi kashan cheqa kajrayku, chaytaj wiñaypaj noqanchejwan kanqa.

³ Qankunawan kachun yanapay, khuyakuy, sonqo tiyakuy, Dios Tatamanta, Tataj Churin Jesucristomantawan, cheqapi, munakuypi ima.

⁴ Maytapuni kusikorqani wakin wawasniykita cheqapi purejta rikuspa, Dios Tataj kamachisqanta jap'isqanchejman jina.

⁵ Kunanqa mana yuyarichisuyta munanichu purajmanta munanakuna kasqanta. Kayqa mana mosoj kamachiychu, imaraykuchus chaytaqa qallariymantapachaña Diosmanta jap'erqanchej.

⁶ Kaymin munakoyqa: Diospa kamachisqasninman jina purinanchej. Chay kamachiytaqa qallariymantapacha uyarerqankichej. Chaypi puriychej.

Ch'auka runas

⁷ Ashkha pantachej runas kay pachaman rikhurimunku. Paykunaqa ninku Jesucristo mana aychapichu kay pachaman jamusqanta. Kayta nejqa pantachej, anticristotaj.

⁸ Qankuna kikin qhawakuychej, llank'asqaykichej ama qhasi kanampaj, astawanqa, junt'asqa pagota jap'inaykichejpaj.

⁹ Cristoj yachachiyninmanta llojsipojqa, manataj yachachiynimpi sayajqa, mana Diosniyojchu. Cristoj yachachiynimpi sayajrí, Dios Tatayoj, Churiyojtaj.

¹⁰ Pillapis qankunaman jamuspa, mana chay yachachiyta apamojtenqa, ama wasiykichejpi jap'ikuychejchu, nitaj napaykuychejchu.

¹¹ Pillapis payta napaykojqa, sajra ruwanasninwan chajrukun.

Cartaj tukukuynin

¹² Ashkha imasraj tiyan escribimusunaypaj, manataj munanichu cartallapi escribimuyta. Parlarikoj munashani jamuyta kusikuyninchej junt'asqa kanampaj.

¹³ Ajllasqa ñañaykej wawasnin napaykamusunku.