2 Crónicas 9 - Qheshwa Biblia DC

Saba llajtamanta reinaqa Salomonta waturin

¹ Saba llajtamanta reinaqa Salomón may mentasqa kasqanta parlajta uyarispa Jerusalenman rerqa, mana kutichiy atina tapuykunaswan yachayninta waturinampaj. Chayamorqataj may ashkha kamachisninwan, q'apaj jawinasninwan camellospi chajnarisqa, jinataj may ashkha qoriwan, valorniyoj rimiswan ima. Salomompaman chayamuspañataj imatachus tapuyta yuyasqanta tapurerqa.

² Salomontaj tukuy tapuykunasninta kuticherqa. Manataj uj tapuyllapis karqachu mana kutichiyta atisqanqa.

^3-4 Sabá llajtamanta chay reinaqa, Salomompa yachayninta rikuspa, chay palacio wasita ruwasqanta, mesaspi chay sumaj mikhunasta rikuspa, chay yanapajkunasnimpa wasisninkuta rikuspa, chay kamachisninkupis imaynachus kasqankuta, p'achasninkuta, jinataj uywasninkuta jaywajkunasninkuta, imaynatachus p'achallikusqankutapis, yupaychana wasiman wicharinapaj gradasninta ima. Kay tukuyta rikuspa reinaqa mayta t'ukorqa.

⁵ Paymantaj nerqa: Qampa ruwasqasniykimanta, yachayniykimantapis llajtaypi uyarerqani chayqa cheqapuni kasqa.

⁶ Kunanqa kikin ñawisniywan rikusparaj creeni. Cheqamanta parlaspaqa chay willawasqasninkoqa mana khuskampis kasqachu qampa yachayniyoj kasqaykimantaqa, astawanraj kasqanki.

⁷ Ima kusiychus kanku, chay runasniyki kamachisniykipis ñaupaqellaykipipuni kashanku chay yachayniyoj palabrasniykita uyarispa chaykunaqa.

⁸ Señor Diosniykeqa bendicisqa kachun, munakuywan qanta rikususpa rey kanaykipaj qanta tiyanampi tiyaykuchisorqa. Diosniykeqa Israelta munakusqanrayku, chay cheqapi wiñaypaj sayachiyta munaspa. Chayrayku paykunaj reyninkupaj qanta churasorqa, cheqanta justiciawantaj kamachinaykipaj.

⁹ Chaymantaqa reyman jaywarqa kinsa waranqa isq'on pachaj sojta chunkayoj kilos qorita, may ashkha k'acha q'apaj jawinasta, jinataj may ashkha valorniyoj rumistapis. Mana jayk'ajpis Israelman chayasqachu chay chhika k'acha q'apaj jawinasqa, Sabá llajtamanta reinaqa Salomonman t'inkata qorqa chay chhikapuneqa.

¹⁰ Chay jwaqa Hirampa, jinataj Salomompa kamachi runasninkoqa Ofirmanta apamorqanku qorita, chanta sandalomanta k'aspista, jinataj ashkha valorniyoj rumistapis.

¹¹ Sándalo k'aspiwan reyqa Diospa wasimpi wicharina gradasta, jinataj palacio wasimpipis, ruwallarqataj takejkunapaj tocana arpasta, salteriosta ima. Mana jayk'ajpis chay jina k'aspeqa rikukorqachu Judá jallp'apeqa.

¹² Rey Salomonqa tukuy munasqanta, mañasqantapis Sabamanta reinaman qorqa, pay apamusqanmanta astawan. Chaymantataj chay reinaqa kamachisninwan khuska llajtanman kutiporqa.

Salomompa mentasqa kaynin qhapaj kaynimpiwan

¹³ Sapa wata Salomonqa qorita jap'isqanmanta iskay chunka iskayniyoj waranqa kilosman chayarqa.

¹⁴ Chaypis mana yupasqa karqa chay ranqheros, jinataj ñan purejkunapis impuestota pagasqasninkoqa. Chay jawaqa Salomonman apamullajtaj kanku qoritawan, qolqetawan Arabiamanta reykunas, jinataj Israel jallp'api kamachejkunapis apamullajtaj kanku.

¹⁵ Rey Salomonqa ruwacherqa iskay pachaj jatuchaj escudosta ch'uwachasqa qorimanta, sapa ujmantaj sojta kilo qori yaykorqa.

¹⁶ Ruwachillarqataj kinsa pachaj juch'uy escudosta, sapa ujmantaj yaykorqa kinsa kilo khuskanniyoj ch'uwachasqa qori. Chaykunatataj churaykorqa sach'asniyoj Líbano nisqa chay palacio nisqa wasiman.

¹⁷ Ruwachillarqataj marfil tullumanta uj jatun tiyana tronota, kamacherqataj ch'uwa qoriwan patanta lluch'anankuta.

¹⁸ Chay tronoqa sojta saruna gradasniyoj karqa, qorimanta uj juch'uy banquitoyoj rey chakisninta churanampaj, puraj ladompitaj makisniyoj karqa, chaykunaj qayllankupitaj iskay sayashaj leones karqa.

¹⁹ Chanta kallarqankutaj chunka iskayniyoj sayashaj leones, sojtantin gradaspi ujkama sapa ladopi, kayman rijch'akojqa ni mayqen kamachiypi jayk'ajpis ruwakorqachu.

²⁰ Chay jawaqa reypa tukuynin ujyana vasosnenqa qorimanta karqanku. Ajinallataj mikhunampaj tukuy imasnin, sach'asniyoj nisqa Líbano palaciopi kajkunaqa ch'uwa qorimanta karqa, mana imapis qolqemantaqa karqachu, Salomompa tiempompi mana imapis chhika valorniyojchu qolqeqa karqa.

²¹ Reypa barcosnintaj Tarsisman rej kanku Hirampa kamachi runasninwan, sapa kinsa watasmantataj kutimoj kanku apamuspa qorita, marfilta, monosta, pavo-realesta ima.

²² Rey Salomonqa kay pachapi kay reykunasta qhapaj kaypi atiparqa, yachayniyoj kaypiwan.

²³ Tukuy kay pachamanta reykunasqa Salomonta rikuyta munaj kanku uyarinankupaj Diospa qosqan yachayninmanta.

²⁴ Sapa wata Salomonman t'inkata apamoj kanku, kaykunata: Qorimanta ruwasqa kajkunata, qolqemanta ruwasqa qhatakuna p'achasta, maqanakunapaj armasta, q'apashaj jawinasta, caballosta, mulasta ima.

Salomonqa caballosta, carretasta ranqheyan

²⁵ Salomompataqa tawa waranqa corral wasisnin karqa, caballosninta, jinataj carrosnintapis waqaychanampaj, kallarqataj chunka iskayniyoj waranqa caballospi puriyta yachaj runasnin, chaykunata churarqa maqanakuna carretasta jallch'ana cuartelesman, jinataj Jerusalempi reyta qhawaj soldadoswan kamunankupaj.

²⁶ Salomontaj kamacherqa tukuy reyesta Eufrates mayumantapacha, filisteospa jallp'ankama, Egipto jallp'aj tinkuyninkamataj.

²⁷ Rey Salomonqa, Jerusalempi qolqeta tantarqa rumista jinapuni. Cedro k'aspistapis may chhikata chay pampaspi karqa k'ita higos sach'as jinapuni.

²⁸ Caballosta Muzrimanta apamorqanku, chay tukuy waj nacionesmantawan.

Salomompa wañupusqan

²⁹ Salomompa kausayninmanta puchoj willaykunasqa, qallariymanta tukukuyninkama profeta Natampa willaykuna librosnimpi qelqasqas kashanku, jinataj Silomanta Ahiaspa willaykunasnimpi, chanta profeta Iddoj mosqoypi jina rikusqasnimanta parlasqasnimpi, Nabatpa wawan Jeroboammanta.

³⁰ Salomonqa Jerusalempi Israelta kamacherqa tawa chunka watasta.

³¹ Wañupojtintaj tatan Davidpa llajtampi p'amparqanku, paypa qhepantataj wawan Roboam kamacherqa.