2 Crónicas 8 - Qheshwa Biblia DC

Salomompa waj ruwasqasnin

¹ Salomonqa Señorpa yupaychana wasinta, kikin palaciontawan jatarichisqanmantaqa, iskay chunka watasña pasarqa.

² Chaypacha watejmanta jatarichillarqataj, Hiram payman qorqa chay llajtasta, israelitastataj chaykunaman churaykorqa.

³ Chaymantataj Sobamenta Hamat llajtaj contrampi rerqa, jap'ikaporqataj.

⁴ Jinallatataj ch'in pampapi Tadmor llajtata watejmanta jatarichillarqataj, maypichus Hamatpi mikhuykunata waqaychanapaj karqa chay tukuy llajtastawan.

⁵ Watejmanta jatarichillarqataj pata kaj Bet-horonta, ura kaj Bet-horontapis. Chaykunaqa sinch'i jark'achisqa llajtas karqanku, perqasniyoj punkusniyoj, barrasniyoj ima.

⁶ Chanta jatarichillarqataj Baalat llajtata, waj llajtastapis poqoy mikhunasta jallch'anankupaj, maqanakupaj carrestasta jallch'ananku karqa chay llajtata, caballospi purejkunapaj llajtastapis, Jerusalempi imastachus ruwachiyta munarqa chaykunastapis. Chanta ruwachillarqataj Libanopipis kamachimpi kasharqa chay tukuynin jallp'apipis.

⁷ Chay jallp'api tiyakojkuna hititasmanta, amorreosmanta, heveosmanta, fereseosmanta, jebuseosmanta ima qhepa kajkunata, paykunaqa mana israelitaschu karqanku.

⁸ Chaykunaj wawasninku chay jallp'api qhepakojkunata israelitasqa mana tukuynintachu tukucherqanku, manachayqa Salomón paykunata sinch'i llank'anaman churarqa, jinataj kunan p'unchaykama kakushanku.

⁹ Jinapis Salomonqa ni mayqen israelitatapis wata runata jinata chay sinch'i llank'anasman churarqachu, manachayqa soldados karqanku, kurajkuna soldadosta, maqanakupaj carrestasta caballospi maqanakojkunata ima kamachispa pusajkuna karqanku.

¹⁰ Rey Salomompa yanapajkunasnin qhawaspa llank'achejkunasnenqa tukuypi iskay pachaj, phishqa chunkayoj karqanku.

¹¹ Salomonqa faraompa ususinta aparqa Davidpa llajtanmanta paypaj nispapuni palaciota ruwachisqanman. Salomonqa yuyarqa, warmenqa mana tiyayta atisqanta, Israelpa reynin Davidpa palaciompi. Payqa yuyarqa maymanchus Señorpa trato ruwasqan cajonnin yaykorqa chay cheqas llimphuchasqas kasqankuta.

¹² Salomonqa Señorpaj uywasta ñak'aspa q'olachiporqa yupaychana wasipi, Señorpa ñaupaqempi jataricherqa chay altar patapi.

¹³ Moisespa leyninman jina ima diaspichus jaywananku karqa chay diaspi, samakuna p'unchaykunaspi, sapa killa qallarikuypi, watantimpi kinsantin fiestaspipis, mana levadurayoj t'antata mikhuna fiestapi, semanas fiesta nisqapi, ramadas fiestapi ima.

¹⁴ Mit'astapis churallarqataj tatan Davidpa nisqanman jina, sacerdotesqa yupaychana wasipi imastapis ruwanankupaj, levitastaj Señorta yupaychanankupaj, jinataj sacerdotesta yanapanankupaj, imaspichus sapa diapi atikusqanman jina. Jinallatataj churarqa sapa punkupi qhawajkunajpa mit'asninkutapis, Diospa runan David kamachisqanman jina.

¹⁵ Manataj t'aqakorqankuchu rey Davidpa, imastachus sacerdotesmanta, levitasmanta, qolqeta jallph'ana kajmantapis kamachisqanmantaqa.

¹⁶ Salomón imastachus ruwanan karqa chaykunaqa, ruwakorqanku, yupaychana wasej cimientosnin churakusqanmantapacha tukukunankama. Señorpa yupaychana wasenqa allin tukuchisqa karqa.

¹⁷ Salomón chaypacha rerqa Ezion-geber llajtaman, Elat llajtamanwan. Chaykunataj mar qocha cantopi kasharqanku Edom jallp'api.

¹⁸ Hiramtaj apachimorqa yanapaj runasninnejta barcosta, runasta ima; paykunaqa mar qochapi puriyta yacharqanku, rerqankutaj Salomompa kamachi runasninwan khuska, chayarqankutaj Ofir llajtaman, chaymantarí qorita apamorqanku chunka phishqayoj waranqa kilosta jina, chanta rey Salomonman aparqanku.