2 Crónicas 6 - Qheshwa Biblia DC

Salomonqa Diosta yupaychana wasita Señorman jaywapun

¹ Chaypacha Salomonqa nerqa: Qan, Señor ninki laqhayaypi, pakaypipis kausasqaykita.

² Noqataj qampaj jatarichipuyki, uj yupaychana wasita chaypi tiyakunaykipaj, chaypi wiñaypaj kausakunaykipaj.

³ Chaymantataj reyqa tukuy israelitas sayasqas kasharqanku chaynejman kutirispa bendicerqa.

^4-5 Nerqataj: Israelpa Señor Diosnin, bendicisqa kachun, Davidman junt'asqanrayku, chay jinata nisqanta: Egipto jallp'amanta aylluyta orqhomusqaymantapacha, tukuy Israel ayllu ukhupeqa mana mayqen llajtatapis ajllarqanichu, chaypi yupaychana wasi jatarichisqa kanampaj, chaypitaj sutiy tiyakunampaj. Nillataj mayqen qharitapis ajllarqanichu aylluy israelitasta pusaykachanampaj.

⁶ Astawampis Jerusalenta ajllarqani, sutiy chaypi kanampaj, aylluy israelitasta kamachinampajtaj Davidta ajllarqani.

⁷ David tataytaj maytapuni munarqa Israelpa Diosnin Señorpa sutimpi uj yupaychana wasita jatarichipuyta.

⁸ Chaywampis Señorqa nerqa: Walejmin yupaychana wasita jatarichipuwayta munasqaykeqa.

⁹ Manataj qanchu chaytaqa ruwanki, manachayqa uj qhari wawayki kanqa. Paymin jatarichipuwanqa yupaychana wasiytaqa.

¹⁰ Señorqa chay parlasqanta junt'ampuni. Nisqanman jina tatay Davidpa cuentanmanta Israelpa kamachejnin churasqa kani, jatarichipunitaj uj yupaychana wasita, Israelpa Señor Diosnimpa sutimpi.

¹¹ Chay wasipitaj churani Diospa trato ruwasqan cajonta, chay ukhumpitaj kashan israelitaswan Señorpa trato ruwasqan.

¹² Chaymantataj Salomonqa Señorpa altarnimpa ñaupaqempi sayaykuspa, tukuy israelitas tantasqas kasharqanku chaykunaj ñaupaqempiwan, makisninta aysarerqa.

¹³ Salomonqa uj patachata broncemanta ruwasqa, chay patachataj iskay metrosniyoj karqa chhoqonman, anchonmampis jinallataj karqa, patamantaj uj metro iskay cuarta kurajniyoj karqa. Chay patachaqa patio chaupiman churasqa karqa. Chay pataman wicharispataj tukuy israelitaspa ñaupaqempi qonqorikorqa. Makisninta janaj pachaman oqharispa nerqa:

¹⁴ Israelpa Señor Diosnin, mana qan jina Diosqa janaj pachapi kanchu, nitaj kay pachapipis, qanqa tratota ruwasqaykita junt'anki, qanqa tukuy sonqowan kasusojkunatataj khuyanki.

¹⁵ Qanqa David tatayman imastachus qosqayki nerqanki chayta waqaycharqanki, parlasqaykiman jinataj kunan p'unchaypi junt'apunki.

¹⁶ Kunanqa Israelpa Señor Diosnin, junt'allaytaj kamachiyki tatay Davidman imatachus nerqanki qonaykita chayta. Qanqa nerqanki: Mana pisenqachu miraynimpi uj qhari wawa, khuyakuyniykiwan Israelpa kamachejnin kanampaj. Wawasninkuchus kausayninkuta cheqanchankuman, leyesninkutapis junt'ankuman chayqa, imaynatachus pay junt'arqa ajinata.

¹⁷ Ajinaqa, Israelpa Señor Diosnin, kamachiyki tatay Davidman nisqaykeqa junt'akuchun ari.

¹⁸ Jinapis, cheqapunichu kanman, Diosqa kay pacha runaswan tiyakunanqa? Janaj pachaqa, janaj pachamanta janaj pachapis mana wakiyta atisunkichu. Astawanraj ari kay yupaychana wasita qampaj ruwapususqayqa.

¹⁹ Chaywampis, Señor Diosníy, qhawaypuni mañakususqayta, majakususqaytapis, kay kamachiykej qhaparikamususqanta uyarinaykipaj, jinallataj mañakususqantapis.

²⁰ Qhawamuypuni tuta p'unchay kay wasitaqa, qanqa chaypi tiyakunaykita nerqanki. Kunanqa kay kamachiykej cheqamanta mañakamususqanta uyarillay ari.

²¹ Jinataj kay kamachiykej mayta mañakamususqanta, chanta aylluyki Israel, kay wasipi qanmanta mañakamusojtimpis, uyariy janaj pachamantapacha, tiyakunki chaymantapacha, perdonawaykutaj.

^22-23 Mayqellampis llajta masimpa contranta juchallejtin juranawaykupaj wajyachejtinku, kay yupaychana wasiykej ñaupaqempi jurajtintaj, qantaj janaj pachamantapacha uyariy, chaypitaj ruway, kamachisniykita cheqaman churaspa. Pichus juchayoj kajmanqa juchanman jina qopuy, juchampa jasut'enqa paypa patanman urmachun chay sajra ruwasqasninman jina, mana juchayoj kajmantaj justiciata ruway, ruwasqanman jina.

²⁴ Israel aylluyki qampa contraykipi juchallikusqanrayku enemigonkuwan atipaykuchikojtinku, kutirikamususpa sutiykita yupaychanman, mañakususpa, majakususpataj kay yupaychana wasiykipi.

²⁵ Qanqa janaj pachamantapacha uyariy, perdonaytaj aylluykej juchasninta, kutichimuytaj, paykunaman jinataj ñaupa tatasinkuman qorqanki chay jallp'aman.

^26-27 Ch'aki watas jamojtin, mana parajtintaj aylluyki juchallisqanrayku, chaymantataj chay cheqapi qanmanta mañakunman, sutiykitataj yupaychanman, jasut'isqaykiraykutaj juchasninmanta kutirikunman chayqa, qan janaj pachamantapacha uyariy, perdonaytaj kamachisniykej juchasninkuta, tukuy Israel aylluykej juchasnintawan, yachachiytaj uj sumaj ñanta, chayninta purinankupaj. Chanta paraykita apachimuy kay jallp'aman aylluykiman chayaqepaj qorqanki chay jallp'aman.

^28-30 Kay jallp'api yarqhay kajtin, chayri onqoypis kajtin, chayri ruphaywan sach'as ch'akirapunkuman, chayri sach'aspi onqoy rikhurinman, chayri langostaspis, chayri t'una khuruspis; chayri enemigospis llajtasniykuta muyuykamuspa maqajtaj sayaykuwankuman chayqa, chayri ima llakiypis onqoypis kajtenqa. Tukuy mañakamususqankuta, majakamususqankutapis mayqen runallapis, chayri kikin aylluyki Israelpis llakiynimpi, chayri nanaynimpi mañakamuspa kay wasiman makisninta aysarimunman chayqa, qan janaj pachamantapacha paykunata uyarinki tiyakushanki chaymantapacha, qan perdonapunki, sapa ujninkumantaj ruwasqankuman jina qopunki. Qanllamin rejsinki, yachankitaj runaj yuyayninta sonqontapis.

³¹ Ajinamanta manchachikusonqanku, ñankunasniykipitaj purenqanku ñaupa tatasninkuman qorqanki chay jallp'api kausakunankukama.

³² Waj llajtayoj, mana Israel aylluykimanta kajpis, jamunman karu jallp'asmanta qampa jatun sutiykirayku, jatun atiyniykiraykutaj kay yupaychana wasipi qanmanta mañakusunampaj.

³³ Janaj pachamantapacha uyarimuy, tiyakushanki chaymantapacha, qoytaj tukuy imastachus mañakususqanta, kay pachamanta naciones rejsichunku, manchachikusuchunkutaj, Israel aylluyki jina, yachachunkutaj sutiykeqa kay wasipi oqharisqa kasqanta, kay yupaychana wasita ruwapususqaypi.

^34-35 Aylluykej enemigosninwan maqanakoj llojsejtenqa, mayllamampis qan kashajtiykeqa, kay ajllasqayki llajtanejman kay yupaychana wasita oqharipuyki chaynejman qhawarispa qanmanta mañakusojtinkoqa, janaj pachamantapacha qan uyariy, mañakususqankuta, majakususqankutapis, paykunamantaj cheqanta ruway.

³⁶ Contraykipi juchallejtinkoqa, manamin pipis mana juchallejqa kanchu, qantaj paykunawan phiñakuspa, enemigosninkuman jaywaykuspa waj jallp'aman apachiwaj, karumampis, chayri qayllamampis.

³⁷ Maymanchus wijch'usqas karqanku chay jallp'ataj qanman kutirikamusunkuman, qanmantataj mayta mañakamusunkuman, nisunkumantaj: Juchalliyku, sajrata ruwayku, juchayoj kayku.

³⁸ Tukuy sonqoykuwan, tukuy almaykuwantaj qanman kutirikamusunkuman may jallp'amanchus apasqa karqanku chaypi, qanmantataj mañakamusunkuman kay ñaupa tatasninkuman qorqanki chaynej jallp'aman kutirisqa, ajllarqanki chay llajtankuman, kay yupaychana wasitataj jatarichipuyki chaynejman kutirisqastaj.

³⁹ Tiyakushanki chay cielomantapacha qan uyarinki mañakususqankuta, majakususqankutapis. Qanqa paykunaman kutikunki, aylluyki contraykipi juchallikusqankutataj perdonapunki.

⁴⁰ Kunanqa Diosníy, allinta qhawarimuy, uyarimuytaj kay cheqapi mañakamususqasninkuta.

⁴¹ Sayarikuy Señor Diosníy, atiyniyoj trato cajonniykiwan, jamuytaj samakunayki kashan chay cheqaman. Señor Diosníy, sacerdotesniykitaj p'achallikuchunku salvación p'achawan, allinta qhatisoj wawasniykitaj khuyakuyniykiwan kusikuchunku.

⁴² Señor Diosníy, ama qhesachaychu ajllasqayki reytaqa, yuyarikuy kamachiyki Davidman khuyakunaykimanta.