2 Crónicas 5 - Qheshwa Biblia DC

¹ Señorpa yupaychana wasimpaj kay imasta Salomonqa ruwachiyta tukuchispañaqa chay qolqeta, qorita, chay tukuy imastawan, tatan David Diospaj t'aqasqanta Diospa yupaychana wasimpi valorniyojkunata jallch'ana wasiman churaykamorqa.

Diospa trato ruwasqan cajonta apanku yupaychana wasiman

² Chaypacha Salomonqa tantaykorqa Israelmanta kurajkunata, tukuy ayllumanta kurajkunata, Israel sapa wasi ayllumanta kamachejkunatapis. Señorpa trato ruwasqa cajonninta Davidpa llajtan Sión nisqa chaymantapacha apamunankupaj.

³ Jatun fiesta diapi chay watapi qanchis kaj killapi rey Salomonwan tukuy israelitas tantakorqanku.

⁴ Israel ayllumanta tukuy kurajkuna chayamorqanku, levitastaj Diospa trato ruwasqan cajonninta oqharerqanku.

⁵ Dioswan tinkukuna toldota, aparqanku, jinataj chay yupaychana wasipaj Diospaj t'aqas imastawan. Apallarqankutaj chaykunataqa sacerdoteswan, levitaswan ima.

⁶ Rey Salomonqa tukuy Israel ayllumanta paywan tantakojkunawan khuska, Diospa trato ruwasqa cajonnimpa ñaupaqempi Diosman jaywarqanku ashkha ñak'asqa ovejasta, torosta ima, mana yupay atinata jina.

⁷ Chaymantataj chay sacerdotesqa aparqanku yupaychana wasi ukhukama, kikin Diospa tiyakunan cheqaman Señorwan trato ruwasqa cajonta, churaykorqankutaj chay iskay querubinespa lijrasnin uraman.

⁸ Querubinespa lijrasninkoqa Diospa trato ruwasqan cajompa patanman aysaykusqas karqanku. Qhataykorqankutaj chay cajonta, pata lijrana k'aspisninta ima.

⁹ Chay lijra k'aspisnintaj jatuchaj kasqankurayku Diospaj t'aqasqa cheqapi wasimantapacha rikukorqa chayqa, Diospa tiyakunampa ñaupaqempi kasharqa, chaywampis jawamantapacha mana rikukorqachu, jinataj qhepakorqa kunan p'unchaykama.

¹⁰ Chay cajón ukhupeqa, Horebpi Moisespa churasqan iskay palqayoj p'alta rumilla kasharqa. Chay p'alta rumeqa israelitaswan Señorpa trato ruwasqa rumi karqa, paykuna Egiptomanta llojsimusharqanku chaypacha.

¹¹ Sacerdotesqa llojserqanku Diospaj t'aqasqa wasimanta. Tukuy chaypi kajkuna sacerdotesqa, mit'asninkuta mana qhawaspalla llimphucharakusqanku.

¹² Levitasmanta tukuy takejkunataj Asaf, Hemán, Jedutún ima, qhari wawasninkuwan khuska, jinataj waj ayllusninkuwan ima, linomanta p'achallisqas altarpa ñaupaqempi inti llojsimuy ladopi sayasharqanku. Platilloswan, salterioswan, arpaswan ima kasharqanku. Paykunawantaj pachaj iskay chunkayoj sacerdotes tocajkuna kasharqanku.

¹³ Chaypacha tukuyninku trompetasta waqachej churakorqanku, tukuyninkutaj uj kunkallata takerqanku Señorta yupaychaspa, graciasta qospataj. Trompetasta, platillosta, waj tocanastapis ch'ajwarichispa takisharqanku, Señorta yupaychaychej. Payqa may k'achamin, munakuynenqa wiñaypajmin, nispa. Chay jinata nishajtinkutaj chay ratopacha Señorta yupaychana wasinman uj phuyu junt'aykorqa.

¹⁴ Chay phuyuraykutaj sacerdotesqa mana qhepakuyta aterqankuchu Diosman yupaychaykunasta qonankupajqa, Señorpa k'anchaynin yupaychana wasiman junt'aykusqanrayku.