2 Crónicas 4 - Qheshwa Biblia DC

Diosta yupaychana wasej imasnin

¹ Salomonqa ruwallarqataj broncemanta uj altarta, chaytaj sayt'unman isq'on metrosniyoj karqa, anchonmantaj isq'onllataj karqa, patamampis tawa metros khuskanniyoj karqa.

² Chanta ruwallarqataj broncemanta yaku churanata jatunta, yakupaj. Chayqa muyu karqa, uj cantonmanta uj cantonkamaqa tawa metros khuskanniyojta miderqa, patamantaj miderqa iskay metros iskay chunka phishqayoj centimetrosniyoj, tukuynin muyuynintintaj chunka kinsayoj metros khuskanniyoj karqa.

³ Chay yaku churanaj simin uranejpitaj muyuynintimpi iskay sinruspi torosman rijch'asqas ruwasqas, sapa tawa chunka phishqayoj centimetrospi chunkakama karqanku. Chaykunataj yaku churanawan ujlla karqanku.

⁴ Chaykunataj chunka iskay niyoj broncemanta toros ruwasqa patapi churasqa kasharqa, chay chunka iskayniyoj torosmantaqa kinsa patanejman qhawarisqas kasharqanku, kinsataj uranejman, kinsataj inti llojsimuynejman, kinsataj inti yaykuynejman. Qhepa chakisninkoqa ukhunnejman churasqas kasharqanku. Chay yaku churanataj chay bueyespa patampi churasqas karqanku.

⁵ Chay yaku churanaqa phatunman pusaj centimetrosniyoj karqanku. Chay cantosnenqa lirio t'ikaj pata laphisnin jinas karqanku. Chay yaku churanaqa sojta chunka sojtayoj waranqa litrospaj jina ruwasqa karqa.

⁶ Ruwallarqataj chunka yaku p'urunkusta mayllanapaj, phishqaqa paña ladoman churasqas, phishqataj lloq'e ladoman churasqas; chaykunapi mayllaj kanku q'olachinasta, chay jatun yaku churanaspitaj sacerdotes mayllakoj kanku.

⁷ Ruwallarqataj qorimanta chunka k'ancha churanasta, imaynatachus ruwanan karqa ajinata, yupaychana wasimantaj churarqa phishqata paña ladoman, phishqatataj lloq'e ladoman.

⁸ Chay jawataj chunka mesastapis ruwallarqataj Diosta yupaychana wasi ukhullamantaj churarqa phishqata paña ladoman, phishqatataj lloq'e ladoman. Chanta ruwallarqataj qorimanta pachaj jatuchaj vasosta.

⁹ Jinallatataj ruwarqa sacerdotespa pationta, jatun kaj patiotawan punkusnintinta, chaykunatataj tukuyninta broncewan lluch'aykorqa.

¹⁰ Jatun yaku churanata yupaychana wasej paña ladonman churarqa uranejman, inti yaykuynej ladoman.

¹¹ Hiramqa ruwallarqataj mankasta, palasta, jatuchaj vasosta, jinamanta ruwayta tukorqa Diospa yupaychana wasimpi Salomón imaynatachus mink'asqanman jina.

¹² Payqa kaykunata ruwarqa, chay iskaynin sayantasta, patampi kasharqanku chay muyu kirpanasnintawan, chanta chay kirpanasman, muyuykuchisqa ch'ipastawan.

¹³ Chay iskay ch'ipaspajtaj tawa pachaj granadasta ruwarqa, iskay sinruta sapa ch'ipapaj, chaykunawantaj sayantaspa muyu kirpanasnin muyuykuchisqas karqanku.

¹⁴ Chunka chukustapis ruwallarqataj, chaykunaj patamantaj juch'uy kaj yaku churanasta chunkantinta churarqa.

¹⁵ Ruwallarqataj jatun yaku churanata, urampi kasharqanku chay chunka iskayniyoj torostawan.

¹⁶ Chanta ruwallarqataj, mankasta, palasta, trinchestawan. Tukuy kay imasta yachaj Hiram ch'uwa broncemanta ruwarqa, Salomompa nisqanman jina, Diosta yupaychana wasimpaj

¹⁷ Chaykunataqa bronceta unuyachispa t'iyupi jich'acherqa Jordán chaynejpi, Sucot, jinataj Saretán llajtas chaynejpi.

¹⁸ Salomonqa broncemanta chay chhika tukuy imasta ruwarqa, manataj dakorqachu mashkhachus kasqanta pesachinamantaqa.

^19-20 Salomonqa ruwachillarqataj Diosta yupaychana wasita: Qorimanta altarta, mesastapis chay patapi Señorpaj t'aqas t'antas chaypi kanankupaj, ch'uwa qorimanta k'ancha churantapis k'anchanasnintinta, chaykunataj Diospa tiyakun chay chimpapi kasharqanku, imaynatachus kamachisqasman jina jap'ichisqas kanankupaj.

²¹ T'ikastapis, k'anchanastapis, tenazastapis qorillamantapuni ruwacherqa.

²² Pabilo orqhonaspis, jatuchaj vasospis, jatun cucharaspis, incienso q'osñichinaspis, ch'uwa qorillamantataj karqanku. Chanta qorillamantataj karqanku yupaychana wasiman yaykuna ukhu punkusnin, Diospa tiyakunanman yaykuna punkuspis, jinataj kikin yupaychana wasiman yaykuna punkuspis.