2 Crónicas 3 - Qheshwa Biblia DC

Salomonqa Diospaj yupaychana wasita oqharin

¹ Salomonqa qallarerqa Señorpaj yupaychana wasita llank'achiyta Jerusalempi, Moriah orqopi maypichus tatan Davidman Señor rikhurerqa chaypi, kikin maynejpichus David wakichisqa chaypi, jebuseo Ornampa eran chaypi.

² Llank'achiyta qallarerqa iskay kaj killampi, iskay kaj diampitaj tawa watataña kamachishajtin.

³ Salomonqa Diospa yupaychana wasinman cimientosta churacherqa chayqa kay jina miderqa: Sayt'unman iskay chunka qanchisniyoj metros, anchonmantaj isq'on metros.

⁴ Diosta yupaychana wasej ñaupaqempi chay corredorqa miderqa sayt'unman isq'on metros' Diosta yupaychana wasej anchon jinallataj. Uramanta patamantaj isq'on metrosllataj. Salomonqa chay yupaychana wasej ñaupaqempi kaj corredortaqa tukuy ukhunta qoriwan lluch'aykorqa.

⁵ Chay jatun kaj salaj ukhuntaqa pino maderawan qhataykorqa, chay maderaj patanmantaj ch'uwa qoriwan lluch'aykorqa, chay patapitaj llajllacherqa palmerasta, jinataj cadena warawastawan.

⁶ K'achanchaykorqataj valorniyoj k'acha rumiswan. Chay qori lluch'asqankutaj allinninmanta karqa.

⁷ Chay wasej tukuynin ukhunta ch'uwa qoriwan lluch'aykorqa: Wajtera k'aspisninta, punkoj pata k'aspisninta, perqasninta, wisq'anasninta ima. Perqasnin patamantaj querubín angelesman rijch'asqata llajllaspa ruwarqa.

^8-9 Chay jawataj ruwallarqataj Diospa tiyakunan cheqatapis. Chayqa chhoqonman isq'on metrosniyoj karqa, anchonmanqa yupaychana wasej anchon jinallataj, isq'on metros anchoyojllataj karqa. Chaymantataj aswan ch'uwa qoriwan lluch'aykullarqataj, chaypajqa iskay chunka waranqa kilosta jina churaykorqanku, sapa uj clavoqa libra kuraj jina pesarqa. Patampi kaj cuartospa ukhusnintapis qoriwan lluch'aykullarqataj.

¹⁰ Diospa tiyakunan cheqapeqa ruwallarqataj iskay querubines nisqa lijrasniyoj angelesta, chaykunapis qoriwan lluch'asqallataj karqanku.

¹¹ Chay querubinespa lijrasnenqa tukuynimpi aysarqa isq'on metros. Ujnin kaj lijranqa iskay metros iskay chunka phishqayoj centimetrosniyojta aysarqa, chaytaj wasej perqankama chayarqa, chay ujnin kaj lijrantaj chhikallantaj karqa, chay uj querubimpa lijranqa puntankama chayarqa.

¹² Ajinallatataj chay uj querubimpa ujnin kaj lijrampis wasej perqankama chayarqa, chay ujnin kaj lijrantaj chay uj querubimpa chayarqa, chay ujnin kaj lijrantaj chay uj kerubimpa lijran puntankama chayarqa, chay uj querubimpa lijrasninwan chhikachajkamalla karqanku.

¹³ Kay lijrasniyoj querubinespa lijrasnenqa tukuypi aysasqanqa isq'on metros karqa. Chaykunaqa sayasqas kasharqanku wasej chaupinman jina qhawashaj uyasniyoj.

¹⁴ Chay warkhuna cortinatataj ruwarqa lila bayetamanta, pukamanta, linomanta ima, chaymantaj iskay querubinesman rijch'akojta churacherqa.

Iskaynin sayantas

¹⁵ Salomonqa iskay sayantasta ruwarqa chunka sojtayoj metros sayayniyojta jina, yupaychana wasej ñaupaqempaj. Patampi leq'estaj iskay metros iskay chunka phishqayoj centimetrosniyoj karqa.

¹⁶ Cadenastapis ruwallarqataj collaresta jina, chaykunatataj churaykorqa chay sayantampa putanman. Ruwallarqataj pachaj granadasta, chaykunatataj chay cadenaspi churarqa.

¹⁷ Chay sayantastataj churarqa Diosta yupaychana wasej ñaupaqenman ujninta pañanman, ujnintataj lloq'enman. Paña kaj sayantataqa Jaquín nispa suticharqa, lloq'e kajtataj Boaz nispa.