2 Crónicas 2 - Qheshwa Biblia DC

Salomonqa Tiroj reynin Hiramwan tratota ruwan

¹ Salomonqa Señorpa yupaychana wasinta, jinataj paypa palacio wasintawan oqharej churakorqa.

² Chaypajtaj churarqa qanchis chunka waranqa runasta paykuna q'epista astanankupaj, pusaj chunka waranqa rumi ch'eqojkunatawan chay orqopi llank'amunankupaj. Ajllarqataj kinsa waranqa sojta pachajniyoj kamachejkunata chay runasta llank'achinankupaj.

³ Chaymantataj Salomonqa Tiroj reynin Hiramman willacherqa: Imaynatachus tatay Davidta yanaparqanki, ajinata noqatapis yanapariway. Paymanqa cedro k'aspista apachimorqanki, palacionta ruwachikuspa chaypi tiyakunampaj.

⁴ Noqataj Señor Diosniypaj uj yupaychana wasita ruwapusaj, chayta Señorpaj t'aqapunaypaj, chaypitaj paypa ñaupaqempi, k'acha q'apashaj inciensota q'osñichinaypaj, chaypi paypaj t'aqasqa t'antasta sinrullata jaywanaypajpuni, sapa día uywasta ñak'aspa q'olachipunaypaj tutamanta, jinataj tardempipis, jinallataj samakuna p'unchaykunapi, killa rikhuriy p'unchaykunapi, jinataj Señor Diosniykoj fiestasnimpipis, imaynatachus Israelpi ruwakumpuni jinata.

⁵ Diosta yupaychana wasita ruwanay kashan chayqa jatumpuni kanan tiyan, imaraykuchus Diosniykoqa tukuy dioskunamanta aswan jatumpuni.

⁶ Chaywampis, pitaj atinman Diospaj uj yupaychana wasita jatarichiyta, janaj pachapis may jatun kayninwan manaraj wakiyta atejtinri? Pitaj noqa kasqani yupaychana wasinta jatarichipunaypaj, sutimpi inciensota q'osñichinallaypajpisri?

⁷ Kachamuway ari uj runata, qorimanta tukuy imasta allinta ruway yachaj runata, ruwanampaj qolqemanta, broncemanta, fierromanta, puka lila generosmanta, puka generosmanta, kulli generosmanta ima. Warawasta ruwayta yachajta, chayta ruwanampaj, yanapachikuspa Judamanta, Jerusalenmantawan noqawan kashanku chay yachajkuna runaswan, pistachus tatay David mink'akorqa chaykunawan.

⁸ Apachimullawaytaj Libanomanta: Cedro k'aspista, pino k'aspista, sandalo k'aspistawan. Yachani qampa kamachisniykeqa Líbanopi yachanqanku k'aspista k'utuyta. Noqaj kamachisneyqa qampa kamachisniykiwan kanqanku.

⁹ Paykunaqa ashkha maderasta wakichipunawaykupaj, imaraykuchus Diosta yupaychana wasita oqharinay kashan chayqa may jatun t'ukunapaj kanan tiyan.

¹⁰ Noqa apachimusqayki mikhunasta llank'ajkunasniykipaj, chay maderasta k'utojkunapaj iskay waranqa carga trigomanta iskay chunka waranqa cargasta. Cebadamantapis, vinomantataj tawa pachaj tawa chunkayoj waranqa litrosta, aceitemantataj tawa pachaj tawa chunkayoj waranqa litrosta.

¹¹ Chaypacha Tiroj reynin Hiramqa Salomonman apacherqa uj carta qelqasqata kay jinata nichispa: Señor churasorqa israelitaspa kamachejnin kanaykipaj ayllunta munakusqanrayku.

¹² Nillarqataj: Israelpa Señor Diosnin bendicisqa kachun. Payqa kay pachata, jinataj janaj pachatapis ruwarqa. Paymin rey Davidman uj qhari wawata qorqa sumaj yachayniyojta, allin yuyayniyojta, allin kajtapis, mana allin kajtapis ajllayta yachajta. Pay yupaychana wasita, pay kikimpaj palaciotawan jatarichinampaj.

¹³ Kachamushayki uj runata sumaj yachajta, yuyayniyojtataj, chay yachachej Hiram-abi kashan.

¹⁴ Payqa, Dampa ayllunmanta uj warmej wawan, Tiromanta karqa. Payqa tukuy imata sumajta ruwayta yachan, qorimanta, qolqemanta, broncemanta, fierromanta, rumimanta, k'aspimanta, puka lila generomanta, puka generomanta, lino generomanta, lila generomantawan; jinataj tukuy rijch'aj warawasta ruwayta yachan, sumajta trasayta yachan mañasqankuman jina. Payqa yachaj runasniykiwan khuska, jinataj tatayki wiraqochi Davidpata karqanku chaykunapiwan ima ruwanankupaj.

¹⁵ Kunan qanrí, wiraqochíy, apachimullay trigota, cebadata, aceiteta, vinotapis, imastachus kamachisniykiman apachimunaykita nerqanki chaykunata.

¹⁶ Chaykamataj noqaykoqa Libanopi munasqayki chhika k'aspista k'utushasqayku, mar qochanejtataj apachimusqayku balsaspi Jope llajtakama. Chaymantataj qanllaña Jerusalenman apachinki.

¹⁷ Chaymantataj Salomonqa Israel ayllu ukhupi chay waj llajtayojkuna tiyakojkunata yuparqa, tatan David yupasqanmanta qhepaman, yacharqataj pachaj phishqa chunka kinsayoj waranqa sojta pachajniyoj kasqankuta.

¹⁸ Paykunamantataj jap'erqa qanchis chunka waranqata cargasta astanankupaj. Pusaj chunka waranqa runastataj orqopi rumista ch'eqonankupaj, kinsa waranqa sojta pachajniyojtataj qhawaspa llank'achinankupaj.