2 Crónicas 12 - Qheshwa Biblia DC

Sisac Judá jallp'aman junt'aykun

¹ Roboamqa reinonta allinta sayachispaña, sumaj kallpachasqa kasqanta yuyakuspa Señorpa leykunasninta saqeporqa. Jinallataj tukuy israelitaspis kikinta ruwarqanku.

^2-3 Señorta saqerparisqankurayku, Roboam phishqa watasta kamachishajtinña Egiptoj reynin Sisac rerqa Jerusalempi contranta, waranqa iskay pachaj maqanakuna carretaswan, jinataj sojta chunka waranqa caballospi maqanakojkuna soldadoswan, jinataj mana yupay atina Egiptomanta paywan khuska jamojkunawan: Libioswan, suquienoswan, etiopespiwan.

⁴ Atiparqankutaj Judapi jark'achisqa llajtasta, chanta chay Jerusalén llajtakama.

⁵ Chaypacha profeta Semaiasqa Roboamman jamorqa, jinataj Judamanta kaj kurajkunamanwan, paykuna Jerusalempi tantasqa kashajtinku, Sisac chayamushajtin, nerqataj: Señorqa nin qankuna payta qonqarparisqaykichejta, chayraykutaj payqa Sinacpa makisninman urmajta saqesunkichej.

⁶ Israelmanta kurajkuna, chanta reypis reparakuspa juchayoj kasqankuta k'umuykukorqanku, nerqankutaj: Señorpa ruwasqanqa cheqampuni, nispa.

⁷ Señortaj paykunaj k'umuykukusqankuta rikuspa Semaiasman nerqa: K'umuykakamuwasqaykichejrayku mana tukuchisqaykichejchu, manachayqa pisimantawan librasqaykichej, manataj Sisacnejtacha Jerusalén pataman phiñakuyniytaqa apachimusaj.

⁸ Jinapis Sisacpa kamachin urapi qhepankichej. Chaypitaj yachankichej noqata kasunawaykichejchus, chayri waj nacionesmanta reykunastachus kasunaykichej aswan allin kasqanta.

⁹ Egiptoj reynin Sisactaj, Jerusalenman yaykorqa, jap'ikaporqataj Señorpa yupaychana wasimpi qhapaj kaj imasta, chanta reypa palaciompi kajtapis tukuyta orqhorqa, apakapullarqataj Salomón ruwarqa chay qori escudostapis.

¹⁰ Rey Roboamqa chaykunaj cuentanmanta broncemanta escudosta ruwarqa. Chaykunatataj saqerqa reypa palacionman punkupi qhawajkuna soldadosta kamachejkunaman.

¹¹ Sapa kuti reypa Señorpa yupaychana wasinman rejtin soldadosqa rej kanku chay escudosninku aparisqas. Chaymantataj qhawaj soldadospa wasinkuman churaykapullajtaj kanku.

¹² Ajinamanta Roboam Señorman k'umuykukusqanrayku, Señorpa phiñakuynenqa thasnukaporqa. Manataj tukuyninta chinkacherqachu. Chay tukuywampis Judaman qorqapuniraj allin imasta.

¹³ Rey Roboamqa Jerusalempi astawan kallpachakorqa, kamachillarqapunitaj. Kamachiyta qallarishajtenqa tawa chunka ujniyoj watasniyoj karqa, Jerusalempitaj chunka qanchisniyoj watasta kamacherqa. Chay llajtataqa Señor ajllarqa tukuynin Israel ayllu ukhumanta chaypi tiyakunampaj. Roboampa mamanqa Naama sutiyoj karqa. Payqa Amón nacionmanta karqa.

¹⁴ Roboamqa sajra kajta ruwarqa, payqa mana cheqan sonqowanchu Señorta mask'arqa.

¹⁵ Roboampa kausayninmanta willaykunasqa, qallariymanta tukukuykamaqa, profeta Semaiaspa librompi qelqasqas kashanku, chanta profeta Iddojpi ayllu sutista qelqana librompi. Roboamwan, Jeroboamwanqa sapa kuti maqanaku kallarqapuni.

¹⁶ Roboam wañupojtenqa Davidpa llajtampi p'ampaykorqanku. Paypa qhepantataj wawan Abiam kamacherqa.