2 Crónicas 10 - Qheshwa Biblia DC

Israel reino iskayman t'aqakun

¹ Roboamqa Siquemman rerqa, imaraykuchus tukuy Israel chayman rerqa, payta reypaj churanankupaj.

² Chayta uyarispa Nabatpa wawan Jeroamqa Egiptomanta kutimporqa, payqa chaypi tiyakusharqa rey Salomonmanta ayqespa.

³ Chaymanta wajyachimojtinkutaj Nabatpa wawan Jeroboamqa, tukuy israelitaspiwan rerqanku Roboamwan parlaj kay jinata:

⁴ Tataykeqa ancha sinch'i llank'ayman churawarqayku; kunanqa qan llamp'uyachiy ari sinch'ita llank'achiwasqaykuman jina, may llasa ruwanaman churawarqayku chayta, chanta qampa nisqaykita ruwasqayku.

⁵ Roboamtaj kuticherqa: Kinsa p'unchaymanta watuwaj kutimuwaychej, nispa. Runastaj riporqanku.

⁶ Chaypachataj rey Roboamqa tatan Salomón kausashajtillanraj yanaparqanku chay kurajkunata tapurerqa: Imatataj kay runasman kutichinayta niwankichejri?, nispa.

⁷ Paykunataj nerqanku: Allinwan kay runasta rikunki chayqa, paykunaj mañakusqankutataj ruwanki, kutichinkitaj allin palabraswan chayqa, paykunaqa qampa nisqaykitapuni ruwanqanku.

⁸ Roboamtaj mana kasorqachu chay kurajkunaspa yuyaychayninta, manachayqa tapurillarqataj paypa kamachiynimpi kasharqanku chay waynasta, paywan khuska wiñarqanku chaykunata.

⁹ Nerqataj: Imaraykutaj chay runasman kutichinayta munankichejri? Paykunaqa mañawanku tatasninchej sinch'ita llank'acherqa chaymanta uj chhikanta samarichinayta.

¹⁰ Paywan khuska wiñarqanku chay waynastaj payman kuticherqanku: Pischus mañasunku tataykej sinch'i llank'ayman churasqanta samarichinaykita chay runasmanta, kay jinata kutichinayki tiyan: Makiypa uña dedonqa, tataypa ñañu wasanmanta nisqaqa aswan rakhuraj.

¹¹ Sichus payqa sinch'ita llank'achisorqachej chayqa, noqa aswan sinch'itaraj llank'achisqaykichej. Sichus payqa washkhawan jasut'isorqachej chayqa, noqataj atoj atojkunawan jasut'isqaykichej.

¹² Kinsa p'unchaymantataj Jeroboamqa tukuy Israel aylluntinwan Roboampa ñaupaqenman jamorqanku, rey nisqanman jina.

¹³ Rey Roboamtaj, chay kurajkunaspa yuyaychasqankuta mana jap'ikuspa may sinch'i simiwan kuticherqa.

¹⁴ Chay wayna runaspa umachasqankuman jina kuticherqa kay jinata: Tatayqa sinch'ita llank'achisorqachej, noqarí aswan sinch'itaraj llank'achisqaykichej, tatayqa washkhallawan jasut'isorqachej, noqarí atoj atojkunawan jasut'isqaykichej.

¹⁵ Reyqa mana kasorqachu aylloj nisqantaqa, Señor jinatapuni kananta munasqanrayku, Señorpa nisqan, Nabatpa wawan Jeroboamman chay junt'akunampaj, chayta Señorqa nerqa Silopi profeta Ahiasnejta.

¹⁶ Tukuynin Israel ayllutaj, reyqa mana paykunata uyarisqanta rikuspa, kay jinata kuticherqanku: Davidwanqa mana imapis ruwanaykuchu tiyan. Isaejpa wawanwanqa mana ima chayaqeykupis kanchu. Israel ayllumanta kajkuna, sapa ujpis wasisninchejman ripunayku. Davidtaj aylluntaqa waqaychachun, nispa. Chay ratopacha tukuy israelitasqa wasisninkuman ripurarqanku.

¹⁷ Judajpa llajtasnimpi karqanku chay israelitastaqa Roboamllapuni kamachisharqa.

¹⁸ Roboam kacharqa Adoranta mit'api llank'ajkunaj kamachejninmanta, chaypacha israelitasqa rumiswan ch'anqaspa wañorparicherqanku. Chaypacha Rey Roboamqa usqhayta carretanman wichariytawankama Jerusalenman ayqerqa.

¹⁹ Jinamanta Israelqa Davidpa mirayninmanta t'aqakorqa kunankama.