2 Crónicas 1 - Qheshwa Biblia DC

Salomonqa Diosmanta yachayta mañakun

¹ Davidpa wawan Salomonqa, Señor Diosnimpa yanapayninwan kamachej kaynimpi astawan kallpachakorqa, may jatunchasqataj karqa.

² Chaypacha Salomonqa tukuy Israel aylluta wajyacherqa: Waranqa soldadosta kamachejkunata, pachaj soldadosta kamachejkunatawan, juezkunata, jinataj Israelpi tukuy kamachejkunata, wasi ayllus ukhupi kamachejkunatawan.

³ Tukuyninku chay runaswan tantakorqanku. Salomonqa Gabaompi kaj loma pataman rerqa, imaraykuchus Diospa kamachin Moisés ch'in pampapi Dioswan tinkukuna toldo ruwasqan chaypi kasharqa.

⁴ Davidtaj Dioswan ruwasqan trato cajonnita Quiriat-jearinmanta apasqa, chay wakichisqan chaykama. Chaypaj Jerusalempi toldomanta uj wasita jatarichipusqa.

⁵ Urpa allchhin Urejpa wawan Besaleel broncemanta altarta ruwasqampis Gabaonllapitaj kasharqa Dioswan tinkukuna toldoj ñaupaqempi churasqa. Salomonwan tukuy runasninwan imaqa chayman Diosta tapurikoj rerqanku.

⁶ Salomontaj, Señorpa ñaupaqempi kasharqa chay broncemanta altarman wicharerqa, chay altarqa Señorman tinkukuna toldo wasej chimpampi kasharqa, chaypitaj waranqa uywa ñak'asqasta q'olacherqa.

⁷ Chay ch'isipacha Diosqa Salomonman rikhurerqa, nerqataj: Imatachus munasqaykita mañaway, noqataj chayta qosqayki.

⁸ Salomontaj kutichispa Diosman nerqa: Tatay Davidta may khuyay sonqowan qanqa qhawarqanki, paypa cuentanmantataj noqata kamachinaypaj churawarqanki.

⁹ Kunanqa Señor Diosníy, junt'ay ari imastachus tatayman nisqaykita. Qanllataj churawanki kay ñut'u jallp'a jina kay chhika aylluta kamachinaypaj.

¹⁰ Kunanqa mañayki yachayta ashkhata qonawaykita, yuyaytapis kay aylluta kamachiyta atinaypaj. Pitaj kamachiyta atinman kay jatun aylluykitari?

¹¹ Diosqa Salomonwan kuticherqa: Kay jina sonqoykej munaynin kajtenqa; manataj qhapaj kaytachu mañawanki, nitaj ashkha imastachu, nitaj may uyarisqa kaytachu, nitaj enemigosniykej wañunantachu, nitaj ashkha watasta kausaytachu, manachayqa sumaj yachayta, allin yuyaytataj mañawanki aylluta kamachinaykipaj, mayqenmanchus reyta jina churarqayki, chaypi.

¹² Qosqayki yachayta, yuyaytawan. Qollasqaykitaj qhapaj kaytapis, kapuyniyoj kaytapis, allin qhawasqa kaytapis, qanmanta ñaupaj kajkuna reyespata mana kaporqachu, nitaj qanmanta qhepaman kaj reykunajtapis kanqachu.

¹³ Chaymanta qhepamantaj Salomonqa Jerusalenman kutiporqa Gabaompi kashan chay loma patamantapacha, chaymantataj Dioswan tinkukuna toldoj ñaupaqenmanta. Chaymanta kutimuspataj Israelpi kamacherqa.

Salomonqa carrestasta caballostawan qhatun

¹⁴ Salomonqa tantaykorqa carrestasta, caballospi purejkuna runastawan. Tiyaporqa waranqa tawa pachajniyoj carretas, chunka iskayniyoj waranqa caballospi purej runaspiwan. Chaykunatataj churarqa maqanakuman rina karretasta churana llajtasman, jinataj Jerusalempi reyta qhawanankupajpis.

¹⁵ Reytaj Jerusalempi tantaykorqa qolqeta qoritawan rumista jinapuni; cedro k'aspispis may chhika karqa, chay pampaspi k'ita higos sach'as jinapuni.

¹⁶ Salomompaj caballosta apaj karqanku Muzrimanta, Ciliciamanta ima, reypa ranqherosnin chaypi rantej kanku.

¹⁷ Egiptomanta apamusqa uj carretaqa sojta pachaj qolqe valerqa, uj caballotaj pachaj phishqa chunkayoj qolqe valerqa. Tukuy reykunas hititasmanta kajkuna, Siriamanta kajkunapis rantej kanku Salomompa ranqherosninnejta.