2 Corintios 5 - Qheshwa Biblia DC

¹ Yachanchej kay jallp'api wasinchejqa, kay cuerponchej. Chaychus thuñikunman chayqa, tiyapuwanchej uj wasi Diospa ruwasqan janaj pachapi wiñaypaj, mana runaj makimpa ruwasqanchu.

² Chayrayku kay jallp'api kashaspa mayta llakikunchej, p'achallisqa kayta munaspa janaj pacha wasinchejwan.

³ Ajinapeqa p'achallisqas kasunchej, manataj q'arasllachu.

⁴ Kay wasipi kausajtinchej, chayrí kay cuerponchejpi mayta llakikunchej jatun llakiywan. Manataj munanchejchu p'achanchejta lluch'uchikuyta, astawanqa munanchej sumaj p'achallisqa kayta, wañuy atipasqa kanampaj mosoj kausaynejta.

⁵ Kay imaspajpuni Dios wakichiwarqanchej. Paytaj qowanchej Santo Espirituta uj señata jina.

^6-7 Ajinapi kausanchej tukuy sonqo; yachanchejtaj cuerponchejpiraj kashaspaqa Señormanta ch'usasqas purishasqanchejta, imaraykuchus feninchejrayku purinchej, mana rikusqaraykuchu.

⁸ Chaywampis, astawan kallpachakunchej. Astawanqa munasunman kay cuerpomanta t'aqakuyta, Señorwantaj kausamuyta.

⁹ Chayrayku astawanqa munanchej cuerpomanta ch'usasqaspis, chayrí khuskapis Señorman allinta rijch'ayta.

¹⁰ Tukuyninchej, Cristoj cuenta mañanampi rikhurinanchej tiyan, sapa uj jap'inanchejpaj ruwasqanchejman jina, allin kajta, chayri mana allin kajtapis.

Sonqo tiyaykuymanta

¹¹ Chayrayku noqayku Señorta rejsiyku manchachikuna kasqanta, runasmantaj Willayku unanchachiyta munaspa. Chaywampis, Dios yachan pichus kasqaykuta. Jinallataj suyani qankunapis yachanaykichejta concienciaykichejman jina.

¹² Manataj ujtawan allin kasqaykumanta parlayta munashaykuchu, astawanqa suyashayku qankuna sonqo junt'asqas kanaykichejta noqaykumanta, kutichinaykichejpaj pikunachus wapus kasqankuta yuyakunku, mana sonqonkuman jinachu, chaykunaman.

¹³ Locoyayku chaypis Diospaj locoyayku. Allin yuyayniyoj kayku chaypis, qankunapaj yuyayniyoj kayku.

¹⁴ Cristoj munakuynenqa kamachiwayku, kaypi yuyaspataj niykuman: Uj wañorqa tukuyrayku, jinallatataj tukuy wañorqanku.

¹⁵ Señorqa tukuypaj wañorqa, kunan kausajkuna manaña paykunapajchu kausanankupaj, astawanqa kausanankupaj, jaqay pichus wañorqa kausarimorqataj paykunanejta chaypaj.

¹⁶ Kunanmanta ñaupajmanqa manaña pitapis rejsiykuchu aychaman jina. Arí, Cristotapis aychaman jina rejserqayku, kunanrí manaña ajinatachu rejsiyku.

¹⁷ Chayrayku pipis Cristopi kashan chayqa, mosoj runa; mauk'a imasqa tukukapunña, tukuy imastaj mosojyapun.

¹⁸ Kay tukuy ima Diosmanta jamun, payllataj allinyachawarqayku Cristonejta; kamachiwarqaykutaj runasta paywan allinyachinaykuta.

¹⁹ Dios cheqamanta Cristonejta, kay mundota pay kikinwan allinyacherqa, runaspa juchasninmanta mana yuyarikuspa. Noqaykumantaj kamachiwarqayku allinyakuymanta willanaykupaj.

²⁰ Ajina chayqa, Cristoj sutimpi willajkuna kachamusqas kayku, Diospis noqaykunejta nishasunkichejman jina. Chayrayku, mañakuyku qankunata Cristoj sutimpi; Dioswan allinyakuychej, nispa.

²¹ Cristoqa mana ima juchatapis rejserqachu. Diosrí noqanchejrayku juchayojta ruwarqa, noqanchej Cristowan khuska kaspa, Diospi cheqa allin kausayniyoj kananchejpaj.