2 Corintios 4 - Qheshwa Biblia DC

¹ Chayrayku kay llank'aypi churasqa kaspa, Diospa khuyakuyninta jap'isqaykurayku mana sayk'uyta llank'ayku.

² Astawanqa saqepuyku pakaypi p'enqaykunapi ruwayta, manataj sajra yuyaykunapi purispa, nitaj Diospa palabranta q'ewispa; manachayqa cheqa kajta sut'inchaspa, noqayku allinta rijch'ayta munayku runasman conciencianman jina Diospa ñaupaqempi.

³ Evangelio willasqaykuchus pakasqallaraj kashan chayqa, chinkay ñampi kajkunapaj pakasqallaraj kashan.

⁴ Paykuna mana creesqankurayku, kay mundoj diosnin yuyayninkuta laqhayacherqa. Paykunapi evangelioj k'anchaynin, ama k'anchanampaj, nitaj Cristoj lliphipiynimpis. Payqa Diospa rijch'aynin.

⁵ Manataj noqaykumantachu willayku, astawanqa Señor Jesucristomanta willayku; noqaykutaj qankunaj kamachiykichej jina kayku, Jesuspa munakuyninrayku.

⁶ Diosqa nerqa: K'anchay laqhayajpi k'anchachun. Chay k'anchayllataj sonqoykupi k'anchachun, rikunanchejpaj Diospa lliphipiyninta Jesucristoj uyampi.

Fenejtamin kausayqa

⁷ Chaywampis, tiyapuwayku qhapaj kayniyku t'uru vasospi jallch'asqa, jatun atiy rikusqa kanampaj Diosmanta jamusqanta, manataj noqaykumantachu.

⁸ Imaymana uma nanayniyoj kayku, manataj llakisqaschu. Chay tukuywampis phutiywan mana atipachikuykuchu.

^9-10 Qhatiykachasqas kayku, manataj saqerparisqaschu. Urmachisqas kayku, manataj chinkachisqaschu; cuerpoykupi tukuynejta apaspapuni Jesuspa wañuyninta, noqaykoj cuerpollaykupitaj Jesuspa kausaynin rikuchisqa kanampaj.

¹¹ Noqaykutaj kausanaykukamaqa wañuyman jaywasqas kayku sapa p'unchay Jesusrayku. Jinallataj Jesuspa kausaynin rikuchisqa kanampaj wañoj aychaykupi.

¹² Chay jinamanta noqaykupi wañuy llank'an, qankunapitaj kausay.

¹³ Kikin Espiritupi feniyoj kaspa, escribisqaman jina creerqani, chayrayku parlarqani; noqaykupis creeyku chayraykutaj parlayku.

¹⁴ Yachaykutaj Diosqa pichus Señor Jesusta kausarichisqanta, noqaykutapis kausarichinawaykuta Jesuswan; qankunatawan khuskataj pusawasqayku ñaupaqenman.

¹⁵ Chayrayku kay tukuy imata aguantayku qankunata munakusqaykurayku, Diospa khuyakuynin ashkhayanampaj wajkunapajpis, ajinapitaj Diosman graciasta qojkuna ashkhayanankupaj.

¹⁶ Chayrayku mana llauch'iyaykuchu, astawanqa kay cuerpoyku mauk'ayashan, ukhuykupitaj espirituyku sapa p'unchay mosojyashan.

¹⁷ Kunanqa pisilla ñak'areyqa. Kay kausayniykutaj usqhayta tukukun. Chay ñak'ariytaj apamuwayku wiñay kusiyta, astawan jatunta, ashkhatataj.

¹⁸ Mana noqaykojqa qhawaykuchu imaschus rikukun chaykunataqa, astawanqa mana rikukojkunata qhawayku. Rikukojkunaqa mana unaypajchu, mana rikukojkunataj wiñaypaj.