2 Corintios 3 - Qheshwa Biblia DC

Cristonejta atipaykuna

¹ Watejmantachu qallarisqayku noqaykumanta allinta parlayta? Chayrí, wakinkuna jinachu cartasta qonawaykuta munashayku, allin qhawasqas qankuna ukhupi kanaykupaj, chayrí, qankunachu cartasta qowasqayku allin qhawasqas kanaykupaj?

² Noqaykoj cartasniykoqa qankuna kankichej, sonqosniykupi escribisqas, rejsisqas, tukuy runaj leesqasnintaj.

³ Arí, sut'i kashan qankuna Cristoj cartan kasqaykichej, jaywasqa qankunaman noqaykunejta; mana tintawanchu, astawanqa kausaj Diospa Espiritunwan, mana llusk'a rumi tablapichu, astawanqa aycha sonqos tablapi.

⁴ Chaytaj Diospi tiyapuwayku Cristonejta.

⁵ Manataj noqaykoj yachayniykumantachu jamun, imatapis yuyanaykupaj kikin noqaykojtapis kanman jina; astawanqa yachayniyku Diosmanta jamun.

⁶ Kikin Diosllataj, uj mosoj tratomanta yachachejkunata churawarqayku, mana escribisqaman jinachu, astawanqa Espirituman jina. Leyman jina escribisqarí wañuchin, Espiritutaj kausarichin.

⁷ Moisespa leynenqa wañuypaj karqa, llusk'a rumipi letraswan escribisqa, k'anchayniyojtaj karqa. Israelitaspis mana qhawariyta aterqankuchu Moisespa uyantaqa. Uyanqa anchatataj lliphipisharqa. Chaywampis, chay k'anchayqa chharpuyaporqa.

⁸ Manachu astawan k'ancharinman Santo Espíritoj ruwayninwanqa?

⁹ Chay wañuyman apaj leychus may lliphipiyniyoj karqa chayqa, manachu astawan lliphipiyniyoj kanman salvasqa kasqanchejqa?

¹⁰ Ñaupa leyqa may lliphipiyniyoj karqa, kunanqa manaña lliphipiyniyojchu, Espíritoj leyninmanta nisqaqa, imaraykuchus Espíritoj leynenqa astawan lliphipiyniyoj.

¹¹ Sichus chinkapoj ley ajina karqa chayqa, chay wiñaypaj kajqa, may jina lliphipiyniyojchus kanqa.

¹² Chayrayku chay suyayniyoj kaspa, sut'inta parlayku.

¹³ Mana Moisés jinachu ruwayku. Payqa uyanta qhataykukorqa velowan ama israelitas qhawanankupaj, imachus chinkapojpa tukukuyninta.

¹⁴ Paykunaj yuyayninkutaj chharpuyarqa; imaraykuchus kunan p'unchaykama ñaupaj tratota leejtinku, chay kikin velo mana qhatarasqa; chay velotataj Cristo qhatararqa.

¹⁵ Kunan p'unchaykamapis Moisespa leyninta leenku chayqa, veloqa paykunaj sonqonku patapi churasqa kashan.

¹⁶ Maypachachus Israel ayllu Señorman kutirikojtin, chay veloqa qhechusqa kanqa.

¹⁷ Señorqa Espiritumin; maypichus Señorpa Espíritun kashan, chaypi kacharikuy tiyan.

¹⁸ Chayrayku tukuy noqanchej qhawashanchej uya qhatarasqa uj espejopi jina, Señorpa lliphipiyninta. Noqanchejpis k'anchaymanta k'anchayman, kikin rijch'ayninman tukunchej Señorpa Espiritunman jina.