2 Corintios 2 - Qheshwa Biblia DC

¹ Kayta yuyarqani noqa kikiypaj; ujtawan mana jamunaypaj llakiywan qankunata watukoj.

² Sichus noqa llakichiykichejman chayqa, pitaj noqata kusichiwanqa, jaqay pitachus noqa llakicherqani chaychu? Arí, qankuna.

³ Kayllatataj qankunaman escribimorqaykichej; mayk'ajpis chayamuspa ama llakikunaypaj qankunawan kusikunay kashajtin. Yuyani tukuy qankunapi atienekuspa kusikuyneyqa kusikuyniykichej kasqanta.

⁴ Kay cartata escribimushaspa, anchata llakikorqani sonqoypi, mayta waqaspa. Manataj kaytaqa llakichiyta munaspachu escribimuni, astawanqa yachanaykichejpaj imaynatachus qankunata munakusqayta.

Juchallikojpaj tiyan perdón

⁵ Sichus pipis llakichiwarqa chayqa, mana noqallatachu, tukuy qankunatapis llakichisorqachej, manataj niyta munanichu chaykama kasqanta. Chaywampis, ajinapuni karqa.

⁶ Chay juchallikoj runapajqa chayllaña kachun. Amaña astawan ima niychejchu, tukuyniykichej k'amispaqa.

⁷ Astawanqa qankuna allinta ruwaspa juchanta perdonaychej, sonqochaychejtaj; imaraykuchus chay juchayojqa anchata llakikuspa wañushanmampis.

⁸ Chayrayku mañakuykichej, watejmanta paypaj munakuyniykichej kasqanta rikuchiychej.

⁹ Ñaupajtaña qankunaman escribimorqaykichej, sonqoykichejta yachanaypaj, kasukojchus kankichej tukuy imapi manachus, chayta.

^10-11 Pejpa juchantachus perdonankichej chayqa, noqapis perdonallanitaj. Sichus perdonani chayqa, qankunarayku perdonani Cristoj ñaupaqempi, Satanás ama atipanawanchejpaj; yachanchej jina, payqa ima sajratapis ruwayta munashampuni.

Pablo may llakisqa Troaspi

¹² Troas llajtaman chayajtiykama, Cristoj evangelionmanta willanaypaj punku kicharikorqa Señorpi, mana ruwana jina kashajtin.

¹³ Noqapi mana sonqo tiyakuy karqachu, imaraykuchus mana tariparqanichu hermanoy Titota. Chayrayku paykunawan kacharpayata ruwaspa purirerqani Macedoniaman.

Cristonejta atipajkuna

¹⁴ Chaywampis, Diosman gracias qosqa kachun. Payqa pusawayku Cristopi atipanapaj. Diosqa tukuynejpi noqaykunejta willan uj sumaj q'aparishaj evangelionta.

¹⁵ Noqaykoqa, Diospa Cristompata kayku, salvakojkunapaj, chinkajkunapajpis, Cristomanta sumaj q'aparishaj.

¹⁶ Cheqamanta chinkajkunapaj, wañuypa q'apaynenqa, wañuypaj. Jaqay ujkunapajtaj kausaypa q'apaynin, kausaypaj. Pitaj chaypaj atej jinari?

¹⁷ Mana noqaykoqa wakinkuna jinachu kayku, Diospa palabranta q'ewirispa parlajkuna; astawanqa tukuy sonqo, Diosmanta kajkuna jina, Cristomanta parlaspa Diospa ñaupaqempi.