2 Corintios 13 - Qheshwa Biblia DC

Napaykuykunas

¹ Kunanwanqa kinsa kutitaña qankunata watukusqaykichej. Chaypitaj Tukuy ima yachakonqa iskay chayrí kinsa testigospa siminmanta.

² Ñaupajta nerqani, kunampis ujtawan nillanitaj chaypipis kashayman jina. Kunanqa karumanta escribimuni, ñaupajta juchallikojkunata, chay ujkunatapis, ujtawan jamuspaqa manaña paykunataqa khuyasajchu.

³ Qankunaqa munashankichej yachayta Cristo parlasqanta noqanejta, manataj Cristoqa pisi kallpayojchu qankunapajqa; astawanqa qankunapi atiyninta rikuchin.

⁴ Arí, pisi kallpayoj jina kashaspa chakatasqa karqa. Kunanqa kausashan Diospa atiyninrayku. Ajinallatataj ari, noqaykupis pay jina pisi kallpayoj kayku, paywantaj kausashayku Diospa atiynimpi qankunata yanapanaykupaj.

⁵ Qankuna kikiykichej qhawarikuychej, yachanaykichejpaj fepi sinch'ichus kashankichej manachus chayta. Allinta qhawarikuychej. Manachu yachankichej Jesucristo qankunawan kasqanta? Manachayqa, qhesachasqas kankichej.

⁶ Astawanqa munayman yachanaykichejta, noqaykoqa mana qhesachasqaschu kasqaykuta.

⁷ Diosmantataj mañakuyku ama ima sajrata ruwanaykichejpaj. Manataj noqayku allinman rijch'asqas kanaykupajchu; astawanqa qankuna allinta ruwayta yachanaykichejpaj; manataj imananchu, noqayku qhesachasqa jina rikhurinaykoqa.

⁸ Mana atiykuchu imallatapis cheqa kajpa contranta ruwayta, astawanqa cheqa kajllatapuni ruwasqayku.

⁹ Chayrayku noqayku kusikuyku pisi kallpas kasqaykumanta, qankuna sinch'is kasqaykichejmantapis. Noqaykoqa Diosmanta mañallasqaykupuni allin kanaykichejpaj.

¹⁰ Kay cartata escribimuykichej manaraj qankunajman jamushaspa, imaraykuchus mana munanichu, chaypi kashaspa qankunawan sinch'i kayta, Señor imaynatachus atiyta qowasqanman jina. Ajinata sayachinaypaj, manataj urmachinaypajchu.

¹¹ Kunanqa hermanos, kusikuychej, sumajta kausaychej, sonqo tiyakuypi uj yuyaylla kaychej, sonqo tiyakuypi kausakuychej, munakoj sonqo tiyachej Diostaj qankunawan kachun.

¹² Ujkuna ujkunawan napaykunakuychej llimphu much'aykuywan.

¹³ Tukuy hermanos napaykamusunkichej.

¹⁴ Señor Jesucristoj khuyakuynin, Diospa munakuynin, Santo Espíritoj ujchakuyninwan, tukuy qankunawan kachun. Amén.