2 Corintios 1 - Qheshwa Biblia DC

Pabloj napaykuynin

¹ Noqa Pablo, Jesucristoj apostolnin kani Diospa munayninrayku. Kay cartata escribimuni hermano Timoteowan khuska, Corinto llajtapi kaj Diospa iglesianman, tukuy Acayapi creejkuna kajkunaman ima.

² Khuyakuy, sonqo tiyakuytaj qankunawan kachun Dios Tatanchejmanta, Señor Jesucristomantawan.

Pabloj llakiykunasnin

³ Yupaychasqa kachun Dios Señorninchej Jesucristoj Tatan; imaraykuchus payqa khuyakoj Tata, tukuy imapi sonqochakoj Diostaj.

⁴ Paytaj sonqochawayku tukuy ima llakiyniykupi, noqaykupis sonqochanayku, llakiypi, ñak'ariypi kajkunata, imaraykuchus noqaykupis sonqochasqas karqayku Diosmanta.

⁵ Cristoj ñak'ariyninwan anchata llakikuyku, ajinallatataj kikin Cristonejta may sonqochasqas kayku.

⁶ Noqaykuchus ñak'ariyku chayqa, qankuna sonqochasqas, salvasqastaj kanaykichejpaj. Sonqochasqaschus kayku chayrí, qankuna sonqochasqasllataj, salvasqastaj kanaykichejpaj. Chaykunaqa ruwakun kikin llakiykunata aguantasqapi, noqaykupis aguantayku chay llakiykunata.

⁷ Qankunapi suyayniykoqa sinch'i; yachaspa ñak'arej masisniyku kasqaykichejta, llakiypi, ajinallataj sonqochakuypipis.

⁸ Hermanos, noqayku munayku yachanaykichejta ima llakiykunachus karqa Asiapi noqaykuwan. Anchatapuni ñak'arerqayku; manaña kallpaykupis kaj jinachu karqa astawan ñak'arinaykupaj; manañataj yuyarqaykuchu kausaytapis.

⁹ Noqaykutaj wañuytapuni yuyarqayku; chayqa kasqa suyayta yachanaykupaj. Mana noqallaykupichu, mana chayqa Diospi, pichus atiyniyoj wañusqasta kausarichimunampaj.

¹⁰ Dios jark'awarqayku chay jina jatun wañuymanta. Kunampis jark'awayku; suyaykutaj qhepamampis jark'anawaykuta.

¹¹ Qankunapis yanapawayku Diosmanta mañakuspa; ashkhastaj Diosman graciasta qonqanku wañuymanta jark'awasqaykurayku.

Pabloqa mana Corintoman rinchu

¹² Noqaykoj kusikuyniykoqa kay jina kashan: Sonqoyku niwayku allinta, llamp'u sonqos, maychus kajta purisqaykuta. Manataj runaj yachayninman jinachu, astawanqa Diospa khuyakuyninman jina allinta kausakorqayku kay pacha runaswan, astawanqa qankunawan.

¹³ Kay cartas escribimusqaykupeqa, mana kanchu astawan waj imas kay leesqaykichejmanta, chayrí imatachus unanchasqaykichejmanta, astawanqa suyashani tukukuykama unanchanaykichejta.

¹⁴ Ñapis qankuna uj chhikanta yachankichejña, noqayku qankunajta kusikuyniykichej kasqaykuta, ajinallataj qankunapis noqaykojta kusikuyniyku kasqaykichejta, Señor Jesuspa p'unchaynimpi.

¹⁵ Chayrayku, chay confianzawan ñaupajta jamuyta munarqani qankunaman, uj kutitawan kusikunaykichejpaj.

¹⁶ Munarqani qankunanejta Macedoniaman riyta, ujtawantaj Macedoniamanta jamuyta qankunajman; chaymantataj Judeaman qankunawan pusachikuyta.

¹⁷ Noqa ajinata suyashaspaqa, manachu allinta yuyaspa nimuykichej imatachus ruwayta yuyaspa? Aychaman jinachu yuyarqani noqapi kanampaj chay “arí”, chayrí “mana” ninaypis?

¹⁸ Astawanqa Dios yachan palabraykoqa qankunapaj mana “arí” nisqachu, nitaj “mana” nisqachu kasqanta.

¹⁹ Jesucristoqa Diospa Churin. Noqayku paymanta willarqayku qankuna ukhupi, noqa, Silvano, Timoteo ima. Manataj Jesucristopi karqachu “arí” niywan “mana” niywan khuska, astawanqa “arí” paypi karqa.

²⁰ Tukuy imata Dios qoyta munawasqanchejrí, Cristo Jesuspi “arí” kashan, payllapitaj “amén”, Dios yupaychasqa kanampaj noqanchejnejta.

²¹ Diostaj noqaykuta qankunatawan sinch'ita Cristopi sayachiwanchej, jinataj llimphuchawanchej.

²² Payllataj sellaykuwanchej, qowanchejtaj Santo Espirituta uj señata jina sonqonchejpi.

²³ Astawanqa Diosta wajyakuni almaymanta testigo kanampaj; qankunata allinta khuyayta munaspataj, manaraj Corintoman jamunichu.

²⁴ Mana noqaykoqa, feniykichejrayku kamachejkuna jinachu kayta munayku; astawanqa kusikuyniykichejta yanapayku, imaraykuchus feniykichejrayku sinch'ita sayashankichej.