1 Timoteo 6 - Qheshwa Biblia DC

¹ Kamachis kajkunaqa patronesninkuta allimpaj qhawaspa kasuchunku, ama Diospa sutin, nitaj yachachisqaykupis qhesachasqa kanampaj.

² Creej patronesniyoj kajkunaqa, paykunata ama qhesachachunkuchu hermanos kasqankurayku. Astawanqa allinta patronespa kamachisqankuta ruwachunku, creejkuna kasqankurayku, imaraykuchus kapuyninmanta yanapata jap'ejkunaqa, munasqa hermanos kanku. Kayta yachachiy, yuyaychaytaj:

Llullata yachachejkuna

^3-4 Sichus pillapis waj jinata yachachin, mana Señorninchej Jesucristoj ch'uwa yachachiyninman jina, nitaj Diosta yupaychana kasqanta yachachinchu chayqa, chay runa mana imata yachaspalla jatunchakun. Astawanqa t'ojpisqa jina tapunakuna, churanakuna palabrasta parlan. Chaykunamanta jamunku chhoqonakuykuna, ayñanakuy; Diospaj sajrata rimaykuna, sajra yuyaykuna ima.

⁵ Kallantaj sajra runaspa qhasi mana kaj churanakuynin. Paykunaqa cheqa kajta mana rejsinkuchu, yuyankutaj Diosta yupaychayqa qolqeta jap'inallapaj kasqanta. [Paykunamanta karunchakuy.]

⁶ Diosta yupaychayqa runata qhapajyachin uj imachus kapusqanwan kusisqalla kajtenqa.

⁷ Kay pachamanqa mana imayoj jamorqanchej, jinallataj ni imata kaymanta apasunchu.

⁸ Ajinaqa mikhunayoj, p'achayoj kaspaqa, chaywan kusisqa kakunanchej.

⁹ Qhapajyayta munajkunaqa, sajra munaywan atipachikuspa, tojllapi jina urmanku, tukuy qhasi munapayaykunaman. Chaykunaqa runasta wañuyman apanku, chinkaymantaj.

¹⁰ Tukuy sajra kajpa saphenqa qolqeta munakuy. Chayta munapayaspa wakenqa Diosmanta t'aqakorqanku, ashkha imaymana llakiykunapitaj rikukorqanku.

Ferayku maqanakuna

¹¹ Qanrí, Diospa runan, ayqekuy kay tukuy imasmanta. Kausaytaj cheqan kajpi Diosta yupaychaspa, fewan, munakuywan, pacienciawan, llamp'u sonqo kaywan ima.

¹² Sumajta maqanakuy ferayku, wiñay kausaymanta jap'iykukuy, chaypaj qanqa wajyasqa karqanki, tukuy rikushajtin Señorta sonqoykipi jap'ikusqaykirayku.

^13-14 Kunanqa, Diospa ñaupaqempi kamachiyki, pichus tukuy imasman kausayta qoj, Jesucristoj ñaupaqempipis, pichus Poncio Pilatosman allinta parlarqa, Diospa kamachisqanta kasuy, mana juchallikuspa, mana k'amina kanaykipaj Señorninchej Jesucristoj jamunankama.

¹⁵ K'ata Diosqa maychus tiempompi rikuchenqa Jesucristoj jamuyninta. Paymin yupaychasqa kachun. Payqa kamachejkunaj kamachejnin, señorkunaj Señornintaj.

¹⁶ Pay k'atamin mana wañojqa. Mana chimpay atina k'anchaypitaj tiyakun. Chaytaqa mana pipis rikorqachu, nitaj pipis rikuyta atinchu. Pay wiñaypaj yupaychasqa kachun. Amén.

¹⁷ Kay pachapi qhapajkunata kamachiy ama alabakunankuta, amataj kapuyninkupi suyanankuta. Chaykunaqa mana kajlla. Kausashaj Diosqa tukuy imata qowanchej ashkhata chaywan kausananchejpaj.

¹⁸ Qhapajkunaqa allin kajta ruwachunku, allin ruwasqasninkuta astawan yapachunku, khuyakuywantaj qorichunku mana mich'akuspa.

¹⁹ Ajinapi paykuna kikinkupaj kapuykunata tantachunku jamoj p'unchaykunapaj, wiñay kausaymanta mana kacharikuspa.

Pablo ujtawan Timoteota yuyaychan

²⁰ Ya, Timoteo, allinta waqaychay imatachus nerqayki chayta. Ama kasuychu qhasi mana kaj palabraswan thautiykunata. Amataj kasuychu llulla yachachiytapis, sumaj yachay nisqa chayta.

²¹ Chay llulla yachachiykunata qhatispa wakinkunaqa femanta t'aqakorqanku. Diospa khuyakuynin qankunawan kachun.