1 Timoteo 4 - Qheshwa Biblia DC

Femanta t'aqakojkuna

¹ Santo Espíritu sut'ita nin: Jamoj p'unchaykunapi femanta wakin t'aqakonqanku, ch'aukiyaj espiritusta, supaypa yachachiyninta ima uyarispa.

² Puraj uyas parlanqanku llullakuspa. Paykunaj concienciankutaj rupha fierrowan jina marcasqa kashan.

³ Kaykunaqa casarajta jark'anku, Diospa churasqan mikhunatapis kamachinku ama mikhunata. Chaykunataqa Dios churarqa, creejkuna, cheqa kajta rejsejkuna ima Diosman graciasta qospa mikhunankupaj.

⁴ Diospa tukuy ruwasqanqa walejmin. Mana qhesachanapajchu, sichus graciasta qospa mikhusun chayqa.

⁵ Diospa palabranrayku, mañakusqanchejraykutaj chaykunaqa llimphuchasqaña.

Jesucristoj sumaj kamachin

⁶ Kaytachus hermanosman yachachinki chayqa, jap'ispa fe palabrasta, cheqa yachachiytataj imatachus jap'ikorqankiña chayta, Jesucristoj sumaj kamachin kanki.

⁷ Qhasi mana kaj palabrasta, paya warmispa cuentosninkutapis qhesachay. Astawanqa kallpachakuy Diosta yupaychaypi.

⁸ Cuerpota kallpachayqa pisillapaj, Diosta yupaychayrí sumaj tukuy imapaj; imaraykuchus allinmin kay kausaypi, jinallataj jamoj kausaypipis.

⁹ Kay palabraqa cheqapuni, allintaj tukuy jap'inankupaj.

¹⁰ Kayrayku llank'anchej sayaykukunchejtaj. Suyanchej ari kausaj Diospi, pichus tukuy runakunaj salvajnin, astawanqa creejkunajta.

¹¹ Kayta kamachiytaj yachachiytaj.

¹² Ama pipis wayna kasqaykirayku pisipi qhawasuchunchu; astawanqa creejkunaj ñaupaqenkupi allinta puriy: Parlaypi, allin kausaypi, munakuypi, espiritupi, fepi, llimphu kausaypi ima.

¹³ Jamunaykamaqa Escriturasta leey, sonqochay runasta yachachiytaj.

¹⁴ Ama qonqapuychu qanman atiy qosqa kasqanta, maypachachus Diospa yuyaychasqan ancianosqa makisninkuta qanman churasorqanku chaypacha.

¹⁵ Chaykunata ruway, chaykunapi sonqoykita churay, ñaupajman rishasqaykita tukuy rikunankupaj.

¹⁶ Qan kikiykita qhawakuy, yachachisqaykitapis. Chaypi allinta sayay. Kayta ruwaspa qan kikiykita salvakunki, jinallataj uyarisojkunatapis.