1 Timoteo 3 - Qheshwa Biblia DC

Iglesiapi kamachejkuna imaynachus kanankumanta

¹ Palabraqa cheqapuni: Iglesiapi kuraj kayta munajqa, allin ruwanatapuni ruwayta munan.

² Payqa mana k'amina kanan tiyan, uj k'ata warmiyoj, mikhuypi ujyaypitaj allin yuyayniyoj, allimpaj qhawasqa, respetoyoj, wasinman wajyakoj, yachachinampajtaj allin wakichisqa.

³ Kanallantaj tiyan mana machaj, mana churanakoj, manachayqa llamp'u sonqoyoj, munakuyniyoj, mana qolqeta munapayaj.

⁴ Wasimpi allinta kamachichun, wawasninwan kasuchikuchun, tukuy imapitaj allin qhawasqa kachun.

⁵ Ajinaqa, pichus wasimpi mana allinta kamachiyta yachanchu chayqa, imaynatataj Diospa iglesianta qhawanqari?

⁶ Iglesiapi kamachejqa mana kananchu tiyan pichus mana unaymanta pachachu cristiano. Pajtataj jatunchakuspa, supay jina juchaman urmanman.

⁷ Jinallataj jawamanta kajkunapajpis allin qhawasqa kanan tiyan, ama p'enqayta supaypa tojlla churasqanman urmanampaj.

Diáconos imaynachus kanankumanta

⁸ Diaconospis ajinallataj kananku tiyan allimpaj qhawasqas, ama puraj uyaschu, nitaj vinoman qosqaschu, nitaj qhasimanta qolqeta munapayaj.

⁹ Creeypa pakasqa yachachiyninta llimphu concienciawan waqaychachunku.

¹⁰ Diaconosqa ñaupajta rejsisqasraj kachunku. Chaymantaraj yanapachunku iglesiapi mana k'amiyniyoj kaspa.

¹¹ Warmispis jinallataj allimpaj qhawasqas kachunku, ama tumpajkuna, mikhuypi ujyaypipis allin yuyayniyoj, tukuy imapipis allin kausayniyojkuna.

¹² Diaconosqa uj warmiyojlla kachunku. Wawasninkuta allinta kamachichunku, wasimpi kajkunatawan.

¹³ Diáconos chayta allinta ruwajtinkoqa, allimpaj qhawasqas kanku, Cristo Jesuspitaj astawan kallpachakunku creesqankuwan.

Diosta yupaychanamanta

¹⁴ Kayta escribimuyki, usqhayta jamuyta munaspa qanta watukoj.

¹⁵ Sichus qhepakusajraj chayqa, yachay imaynatachus Diospa wasimpi allinta kausakunaykita. Chaytaj kausashaj Diospa iglesian, cheqa kajta waqaychaj, sayachejtaj.

¹⁶ Cheqamanta jatumpuni Diosta yupaychanamanta pakasqa yachayqa: Dios rejsichikorqa aychallikuspa; Espiritunejta cheqa runapaj rejsisqa, angelespa rikusqan, gentilesman willasqa, mundontimpi creesqa, janaj pachaman oqharisqa.