1 Timoteo 2 - Qheshwa Biblia DC

Yachachin Diosmanta mañakunata

^1-2 Ñaupajtaqa munani hermanosman yachachinaykita Diosmanta majakunankuta, mañakunankuta, graciasta Diosman qonankuta, tukuy runakunapaj mañapuspa, tukuy reyespaj tukuy kamachejkunapaj ima, allin kausakuypi kausananchejpaj, ama ima ch'ajwapi Diosta yupaychaspa, cheqanta ruwaspataj kausananchejpaj.

³ Kaymin allin, sumajtaj Salvajninchej Diospa ñaupaqempi.

⁴ Pay munan tukuy runas salvasqas kanankuta, cheqan kajtataj rejsinankuta.

⁵ Uj k'ata Dios tiyan, jinallataj Dioswan runakunata allinyachejpis uj k'atalla, chaytaj Jesucristo runa.

⁶ Chantá, pay kikin kausayninta qorqa tukuyta salvanampaj. Chaymantaqa ñaupajtaña willasqa karqa.

⁷ Chaypi willaj apostoltaj churasqa karqani, cheqata nini mana llullakuspa, gentilespa yachachejnin, fepi, cheqa kajpitaj.

⁸ Chayrayku munani tukuynejpi qharis Diosmanta mañakunankuta, llimphu makista oqharispa, mana phiñakuspa, nitaj churanakuspa.

⁹ Ajinallatataj warmispis maychus kajta p'achallikuchunku, allin p'achawan, llamp'u sonqowantaj; ñajch'akuspaqa ama anchata chujchankuta k'achanchachunkuchu, nitaj qoriwan, nitaj walqaswan, nitaj ashkha qolqewan rantisqa p'achata churakuchunkuchu.

¹⁰ Manachayqa, allin ruwaykunata ruwachunku, Diosta yupaychaj warmis jina.

¹¹ Warmeqa ch'inllamanta yachaqachun, tukuy imapi kasukuspa.

¹² Mana munanichu warmi yachachinanta, nitaj qharita kamachinanta, manachayqa ch'inlla kakunanta.

¹³ Ñaupajtaqa Adanraj ruwasqa karqa, chaymantaña Evaqa.

¹⁴ Manataj Adanchu ch'aukiyasqa karqa. Astawanqa warmeqa, ch'aukiyasqa kaspa juchaman urmarqa.

¹⁵ Chay tukuywampis, salvasqa kanqa wawasniyoj kaspa, sichus allinta sayanqa, llamp'u sonqowan, fepi, munakuypi, llimphu kaypi ima chayqa.