1 Tesalonicenses 5 - Qheshwa Biblia DC

¹ Chay p'unchaymanta, chay horamantawanqa anchaña kanman, hermanos, escribimunayqa.

² Qankunaqa allinta yachankichej suwaqa tuta jamusqanta; ajinallatataj Señorpa p'unchaynimpis jamonqa.

³ Maypachachus runakuna nenqanku: Sonqo tiyasqa, waqaychasqataj kayku, nispa; chaypacha ujllata paykunaman wañuy jamonqa, imaynatachus onqoj warmiman nanay jamun, ajinata; paykunataj mana ayqeyta atenqankuchu.

⁴ Qankuna, hermanos, mana laqhayajpichu kashankichej, jaqay p'unchay suwa jina jap'isunaykichejpaj.

⁵ Tukuyniykichej k'anchaypa wawasnin, p'unchaypa wawasnintaj kankichej; manataj tutayajpatachu, nitaj laqhayajpatachu.

⁶ Chayrayku, ama chay ujkuna jinaqa puñunachu, astawanqa ama puñuspa qhawana, ch'aki sonqostaj kana.

⁷ Puñojkunaqa, tuta puñunku; machajkunapis tuta machanku.

⁸ Noqanchejrí p'unchaypata kaspa, ch'aki sonqos kana, fewan, munakuywantaj p'achallisqas, fierro pechoquerawan jina; salvación suyakuywantaj, monterawan jina.

⁹ Diosqa mana phiñakuypajchu churawarqanchej, astawanqa salvacionta tarinanchejpaj Señorninchej Jesucristonejta.

¹⁰ Payqa noqanchejrayku wañorqa; chayrayku ña rijch'arishaspa, ñataj puñushaspa, paywan khuska kausananchej.

¹¹ Chayrayku, qankuna ukhu sonqochanakuychej, qankunapurataj sayachinakuychej; imaynatachus ruwashankichej ajinata.

Pablo hermanosta yuyaychan

¹² Hermanos, mañakuyku qankuna ukhupi llank'ajkunata, Señorpi kamachisojkunata, yuyaychasojkunata ima allimpaj qhawanaykichejta.

¹³ Ruwasqasninkuraykutaj may munakuywan, paykunata allimpaj qhawaychej. Sonqo tiyakuywantaj qankunapura kausakuychej.

¹⁴ Ajinallatataj mañakuyku, hermanos, mana kasukojkunataqa k'amiychej, manchalistapis yanapaychej, pisi kallpayojkunatapis kallpachaychej, tukuypajtaj khuyakoj sonqoyoj kaychej.

¹⁵ Ama pipis sajrata ruwajman, sajrallatataj kutichichunchu; astawanqa, allin kajllatapuni qhatiychej, qankuna ukhupi, wajkuna ukhupipis.

¹⁶ Kusisqallapuni kakuychej.

¹⁷ Mana samaspa Diosmanta mañakuychej.

¹⁸ Tukuy imamanta graciasta qoychej. Kaymin qankunapaj, Jesucristopi Diospa munaynenqa.

¹⁹ Ama thasnuychejchu Espirituta.

²⁰ Ama qhesachaychejchu Diospa yuyaychasqasninmanta parlajkunata.

²¹ Sumajta tukuy imata qhawaychej, allin kaywantaj kakuychej.

²² Tukuy laya sajra kajmanta t'aqakuychej.

²³ Sonqo tiyachej Diosqa allintapuni qankunata llimphuchachun. Tukuy kayniykichej, espirituykichej, almaykichej, ukhuykichejpis mana k'aminayoj waqaychasqas kachunku Señorninchej Jesucristo jamunankama.

²⁴ Tukuy imapi junt'ajmin qankunata wajyajqa, chayta tukuychanqa.

Cartaj tukukuynin

²⁵ Hermanos, noqaykupajpis Diosmanta mañapuwayku.

²⁶ Tukuy hermanosta napaykuychej llimphu much'aykuywan.

²⁷ Señorpa sutimpi kamachiykichej kay cartata leenaykichejta tukuy hermanosman.

²⁸ Señorninchej Jesucristoj khuyakuynin qankunawan kachun.