1 Tesalonicenses 4 - Qheshwa Biblia DC

Dios munan allinta kausanata

¹ Kay qhepantataj hermanos, qankunamanta mañakuyku, umachaykutaj Señor Jesuspi, imaynatachus noqaykumanta yachachisqas karqankichej, ajinata purinaykichejta, Diosta kusichispa, astawan astawantaj wiñaspa.

² Yachankichejña ima kamachiykunatachus Señor Jesucristomanta qosusqaykuta.

³ Kaymin Diospa munaynenqa: Llimphu sonqos kanaykichej, qhenchachakuymanta t'aqasqas.

^4-5 Sapa ujniykichej yachaychej warmisniykichejwan maychus kajta kausakuyta, llimphu sonqowan, mana aychaj munapayaynimpichu, imaynatachus ruwanku gentiles Diosta mana rejsisqankurayku, ajinataqa.

⁶ Ama pipis hermanompa kapuyninman yaykuchunchu, nitaj suwachunchu, imaraykuchus Señorqa jasut'enqa kay tukuy imasmanta, imaynatachus nerqaykuña.

⁷ Diosqa mana millay kausaymanchu wajyasorqachej, astawanqa llimphu kausayman.

⁸ Chayrayku, pichus kay imasta qhesachan chayqa, mana runatachu, manachayqa Diosta qhesachan. Paytaj Santo Espirituta qosorqachej.

⁹ Kunanqa, hermanopura munanakunamantaqa anchaña kanman escribimunayqa. Qankuna Diosmanta yachakorqankichej purajmanta munanakunaykichejta.

¹⁰ Cheqamanta qankunaqa, ajinata ruwashankichej tukuy Macedoniapi kajkuna hermanoswan. Chaywampis, hermanos, mañakuyku astawan astawan wiñanaykichejta.

¹¹ Mañakuychejpuni samasqa sonqo kakuyta. Ruwanaykichejta ruwakuychej, kikin makisniykichejwan llank'aspa kamachisusqaykuman jina.

¹² Allinta puriychej Diosta mana rejsejkunaj ñaupaqempi, nitaj pejpa imantapis munapayaspa.

Señorpa kutimuynin

¹³ Munayku, hermanos, qankuna yachanaykichejta wañojkunamanta, ama llakisqas kanaykichejpaj chay ujkuna jina, mana suyayniyoj kajkuna jina.

¹⁴ Sichus creenchej Jesús wañusqanta, kausarimusqantataj chayqa, ajinallatataj Diosqa, paywan khuska pusanqa, Jesuspi creespa wañojkunata.

¹⁵ Kaytaqa niyku Señorpa palabrampi: Noqanchejmanta kausajkuna, Señor jamunankama qhepakojkunaqa, mana ñaupaykusunchu, ñaupajta wañojkunata.

¹⁶ Kikin Señorpuni kamachej qhapariywan, arcangelpa qhaparisqanwan, Diospa pututunwantaj janaj pachamanta uraykamonqa, Cristopi wañojkunataj ñaupajta kausarimonqanku.

¹⁷ Chaymantaña, noqanchej, kausashaj qhepakojkunaqa, paykunawan khuska phuyusman oqharisqas kasunchej, Señorta taripamunanchejpaj pata wayrapi. Ajinata Señorwan wiñaypaj kamusunchej.

¹⁸ Chayrayku, kay palabraswan purajmanta sonqochanakuy chej.