1 Tesalonicenses 2 - Qheshwa Biblia DC

Pablo Tesalonicapi

¹ Hermanos, yachankichej jina, qankunata watukusqaykoqa mana qhasipajchu karqa.

² Astawanqa yachankichej, Filipospi ñaupajta ñak'arerqayku, k'amisqastaj karqayku; chaywampis Diosniyku kallpachawarqayku, paypa evangelionta qankunaman willanaykupaj, manchay churanaku chaupipi.

³ Umachakusqaykoqa mana pantaypichu, nitaj ch'ichichakuypichu, nitaj ch'aukiyaypichu karqa.

⁴ Imaynatachus Dios allimpaj qhawawasqaykuman jina, evangeliota qowarqayku; chayman jina parlayku, mana runata kusichinaykupajchu, astawanqa Diosllata. Payqa sonqosninchejta allinta rejsin.

⁵ Noqaykoqa, yachankichej jina, mana pitapis ni jayk'aj misk'i simiwan llunk'upayarqaykuchu; nitaj pakaymanta qolqetapis munapayarqaykuchu. Chaytaqa Dios yachan.

⁶ Noqaykoqa mana runakunapaj allin qhawasqa kaytachu mask'ayku, ni qankunapaj, nitaj wajkunapajpis. Atiykumampis karqa qankunawan imatapis yanapachikuyta, Cristoj apostolesnin jina.

⁷ Qankuna ukhupeqa llamp'u sonqos karqayku; imaynatachus uj sumaj mama wawasninta munakuywan uywan, ajinata.

⁸ Chay jinatapuni qankunata munakusqaykurayku, mana Diospa evangeliollantachu yachacherqayku; astawanqa kausayniykutapis qoyta munarqayku. Noqaykupajqa ancha munasqas kankichej.

⁹ Yuyarikuychej, hermanos, ruwasqaykumanta, sayk'usqaykumanta, tuta p'unchay llank'aspa; manataj mayqenniykichejpajpis carga jinachu karqayku, Diospa evangelionta qankunaman willashaspaqa.

¹⁰ Qankuna yachankichej, Diospis yachan, imaynatachus llimphus, cheqan kausaywan, mana k'aminas qankuna creejkunawan purisqaykuta.

¹¹ Yachallankichejtaj, imaynatachus uj tata wawasninta k'amin, ajinata k'amej, sonqochajtaj kayku sapa ujniykichejta.

¹² Umachajtaj kayku, Diospa wawasnin jina purinaykichejta; payqa wajyasorqachej reinonman, k'anchayninmantaj.

¹³ Chayrayku noqaykupis mana samaspa Diosman graciasta qoyku, maypachachus Diospa palabranta jap'isharqankichej noqaykumanta uyarispa; chaypacha mana runakunaj palabranta jinachu, cheqamanta Diospa palabranta jina jap'erqankichej. Chay palabrataj qankuna creejkunapi llank'ashan.

¹⁴ Hermanos, qankunaqa yachakojkuna kankichej Diospa iglesiasninmanta, mayqenkunachus Judeapi kashanku, Cristo Jesuspi; ima llakiytachus qankuna jap'ikorqankichej llajta masisniykichejmanta. Chay kikillantataj paykunapis judiosmanta jap'ikorqanku.

¹⁵ Paykunaqa Señor Jesusta wañucherqanku, jinallatataj profetasninkutapis. Noqaykutataj qhatiykachawarqayku. Chayrayku Diosta phiñachinku, tukuy runakunaj contrampitaj kashanku.

¹⁶ Paykunaqa jark'awayku gentilesman evangeliota willanaykuta salvasqas kanankupaj. Juchankoqa tupuman junt'aykunña, phiñakuytaj patankuman jamushanña, wiñaypaj jasut'isqas kanankupaj.

Pablo munan watukuyta Tesalonicapi kajkunata

¹⁷ Noqaykutaj, hermanos, uj pisi p'unchaykunata t'aqasqa kaspa, cuerpopi, mana sonqopichu, astawanraj munasqayku uyaykichejta rikuyta.

¹⁸ Chayrayku munarqayku qankunata watukuyta. Noqa Pablo, cheqamanta uj kutita, iskay kutitapis jamuyta munarqani, Satanastaj jark'awarqayku.

¹⁹ Kunanqa mayqentaj suyayniyku, chayri kusikuyniyku, chayri k'anchaj pilluykuri? Manachu qankuna kankichej, Señorninchej Jesuspa ñaupaqempi, paypa jamuynimpi?

²⁰ Qankuna kankichej sonqo junt'asqa kayniyku, kusikuyniykutaj.