1 Tesalonicenses 1 - Qheshwa Biblia DC

Pabloj napaykuynin

¹ Pablo, Silvanowan, Timoteowan ima, Tesalónica llajtayojkunaj iglesianman kay cartata escribimuyku, pikunachus Dios Tatawan, Señor Jesucristowan ima ujchasqas kashanku chaykunaman. Dios [Tatanchej, Señor Jesucristowan,] khuyakuyta, sonqo tiyakuytataj qankunaman qochun.

Tesalonicensespa fenin

² Tukuyniykichejmanta Diosman graciasta qoykupuni mañakuyniykupi qankunamanta yuyarikuspa.

³ Dios Tatanchejpa ñaupaqempi mana samaspa, yuyarikuykupuni feniykichejpa ruwayninmanta, munakuywan llank'asqaykichejmanta, Señorninchej Jesucristopitaj, pacienciakuywan suyakusqaykichejmanta.

⁴ Hermanos, Diospa munakusqasnin, yachayku paypa ajllasqasnin kasqaykichejta.

⁵ Evangelioykoqa mana simillamantachu; astawanqa Santo Espíritoj atiynimpi qankunaman chayamorqa, sumaj cheqa yachachiypi. Yachankichej imayna allintachus qankuna ukhupi kausakusqaykuta qankunata munakusqaykurayku.

⁶ Qankunataj noqaykumanta, Señormantapis yachakorqankichej ancha llakiypi. Santo Espíritoj kusikuyninwantaj Diospa palabranta jap'erqankichej.

⁷ Chay jinamanta Macedoniapi, Acayapi ima, tukuy creejkunaman sumaj kausayniykichejta rikucherqankichej.

⁸ Qankunanejta Señorpa palabran willarakorqa, mana Macedoniallapichu, jinallataj Acayapipis; astawanqa Diospi feniykichej tukuynejpi yachakorqa. Chaymantaqa mana imata ninayku kanchu.

⁹ Paykunallataj noqaykumanta willanku imaynamantachus qankunaman yaykumusqaykuta, imaynamantachus qankunapis lantikunamanta kutirikusqaykichejta, kausaj cheqa Diosta kasunaykichejpaj.

¹⁰ Willallankutaj qankuna janaj pachamanta Diospa Churinta suyashasqaykichejta, pitachus Dios wañusqakunamanta kausarichimorqa. Chaytaj Jesús. Pay jamoj k'ajaj phiñakuymanta salvawarqanchej.