1 Samuel 9 - Qheshwa Biblia DC

Saulqa Samuelwan tinkukun

¹ Benjamín ayllupi uj runa karqa Cis sutiyoj, pay karqa Abielpa wawan, Abielpa tatan Zeror, Zerorpa tatantaj karqa Becorat, Becoratpa tatantaj Afía. Cis runaqa tukuypaj allin qhawasqa karqa.

² Paypatataj karqa uj qhari wawan, waynaña, may alajitutaj, sutintaj Saul karqa. Waj runaqa israelitas ukhupi manapuni pipis Saul jina alajitoqa karqachu. Payqa jatun karay runa karqa, sayayninmanqa mana pipis hombronmanta patamanqa pasarqachu.

³ Uj kutipeqa Cispa china burrosnin chinkasqanku, paytaj wawan Saulta nerqa: Ujnin kaj kamachita pusariykukuspa riy chay china burrosta mask'amoj.

⁴ Saultaj rerqa, Efraimpa lomasninnejta rispa chayarqa Salisa chaynejkama, manataj burrostaqa tarerqachu. Chaymanta pasallarqataj Saalimkama, chanta Benjamimpa jallp'ankama, nillataj chaypipis tarerqankuchu.

⁵ Zuf chaynejman chayaspaña Saulqa paywan risharqa chay kamachisninman nerqa: Jaku kutipunachej, ichapis tatayqa burrosta qonqapunña, kunanqa noqanchejmanta llakikushan.

⁶ Chay kamachitaj kuticherqa: Kay llajtapi tiyan Diospa runan, paytaqa tukuy allimpaj qhawanku, imatapis nisqanqa junt'akojpuni kasqa. Jaku chayman rina, ichapis pay willawasunman mayqen ñantapis mask'aj rinanchejta.

⁷ Saultaj kuticherqa: Jaku ari, nispa. Chanta imatataj chay runaman apasunmanri? Manaña t'antapis wayaqasninchejpi kanchu. Manaña imanchejpis kanchu chay profetaman jaywarinapaj.

⁸ Chay kamachintaj kuticherqa: Noqajta tiyapuwan uj juch'uy qolqey, chayta Diospa runanman jaywasun, maymanchus mask'aj rinanchejta willanawanchejpaj.

⁹ [Unay watasqa mayqen israelitasllapis Diosta tapurikuyta munaj chayqa nej kay jinata: Jaku rina rikoj runaman, nispa. Chaymantataj kunan profetas nisqas kanku, ñaupajtarí rikoj runas, nisqas karqanku.]

¹⁰ Saulqa kuticherqa: Allinta ninki, jaku rina, nispa. Iskayninkutaj rerqanku, maypichus profeta tiyakorqa chay llajtaman.

¹¹ Chay llajtaman rina wichayta rishaspataj, yakuman rejkuna sipaskunawan tinkukorqanku, paykunatataj tapukorqanku: Kaypichu kashan chay rikoj runaqa?, nispa.

¹² Paykunataj kuticherqanku: Arí, payqa aswan jaqaypiraj kashan, usqhayllata riychej, kunallan llajtaman jamun, imaraykuchus paykunaqa kunan p'unchay loma patapi Señorman rikuchikuta jaywanqanku.

¹³ Jaqayman chayaytawankama, payta mask'aychej, amaraj chay loma pataman mikhoj rishajtin. Runasqa paytaraj mikhunankupaj suyanqanku, imaraykuchus paypuni chay rikuchikutaqa bendicenqa, chaymantaraj chay wajyarisqa kajkunapis mikhunanku tiyan. Chayrayku kunampacha riychej, kunitanqa chaypi taripankichej, nispa.

¹⁴ Paykunataj chay llajtaman rej ñantaqa wicharishallarqankupuni. Llajtaman chayashajtinkuñataj Samuelqa llojsimusharqa, paykuna cheqanta loma patapi Diosta yupaychanaman rinampaj.

¹⁵ Saul manaraj rishajtin chay ñaupaj diapi, Señorqa Samuelman parlasqa mosqoypi jina kay jinata:

¹⁶ Q'aya kay horasta Benjamimpa ayllunmanta uj runata kachamusqayki, paytataj aceitewan jawinki, Israel aylluypa kamachejnin kanampaj. Pay Israel aylluyta filisteospa atiyninmanta kacharichenqa, aylluy willakamuwan chayrayku, imaraykuchus noqa paykunamanta khuyakuni, llakiyta willakuwasqankurayku, nispa.

¹⁷ Saulta, Samuel rikojtinkamataj Señorqa payman nerqa: Kay chay runaqa, pimantachus parlarqayki chay. Pay aylluyta kamachenqa, nispa.

¹⁸ Ñapis llajta punkuta yaykuykushajtinña Saulqa Samuelman qayllaykuspa nerqa: Ama jinachu kay, willariway maypichus chay rikoj runaj wasin kasqanta, nispa.

¹⁹ Noqa chay runa kani, nispa Samuelqa kuticherqa. Jaku wicharina, jaqay loma patapi Diosta yupaychanaman, noqawan chaypi kunan mikhunki. Q'ayataj tutamanta willasqayki tukuy tapuykunasniykita, chaymanta ripullanki.

²⁰ Chay kinsa diataña chinkaj burrosmantaqa ama llakikuychu, chaykunataqa tarinkuña. Israelpa aswan munasqanqa qampaj, jinataj aylluykipajpis kanqa.

²¹ Saultaj kuticherqa: Noqaqa Benjamimpa ayllunmanta kani, Israel ukhupi aswan juch'uy kaj ayllumanta, aylluypis Benjamín ayllumanta aswan juch'uy kaj. Imaraykutaj chayta niwankiri?

²² Chaypacha Samuelqa Saultawan chay kamachintawan ima chay jatun kaj wasiman pusarqa, chaypitaj tukuy wajyasqasmanta aswan chaupipuni tiyacherqa, chay runastaj tukuyninkupi karqanku uj kinsa chunka jina.

²³ Chaymanta Samuelqa mikhuyta wayq'ojman nerqa: Apamuway jaywarqayki chay aychata, mayqentachus wajllaman waqaychanaykita nerqayki chayta.

²⁴ Chay wayq'ojqa chay ratopacha orqhomorqa pierna aychata, Saulmantaj jaywarqa. Chanta Samuelqa nerqa: Chayqa qampaj t'aqasqa kasharqa, jap'iy mikhurikuytaj; chaytaqa qampajpuni t'aqacherqani, tukuy runasta mikhunankupaj wajyachishaspa. Saulqa chay diapi Samuelwan mikhorqa.

²⁵ Loma patapi Diosta yupaychanamanta llajtaman uraykuspañataj, Saul puñunampaj camata wakichiporqanku patan kaj wasipatapi.

²⁶ Saultaj chaypi puñorqa, q'ayantintaj Saul patan kaj wasi patapi kashajtin Samuelqa payta wajyarqa, nerqataj: Sayarikuy ripunaykipaj, nispa. Saultaj sayarikorqa. Chay qhepantataj jawaman llojserqanku Samuelwan Saulwanqa.

²⁷ Paykuna chay llajtamanta llojsejtinkuñaqa Samuelqa Saulman nerqa: Kamachiykita niy ñaupa rinanta, qantaj uj chhikata qheparikuy Dios imatachus qanman ninasuyta niwarqa chayta willasunaypaj.